Emibiiri y’Abakwenda 11:1-30
11 Nikwa abakwenda n’abaghala babo ababya e Yudea mubowa ngoko abandu b’ebihanda nabo babiriligha ekinywa ky’oMungu.
2 Neryo omughulu Petro ahetukira e Yerusalema, abandu ababya bakabugha bati ritolere abandu b’ebindi bihanda nabo ibabanibwa, mubatsuka erikuba naye obuhaka.
3 Mubabugha bati: “Mukingira omo nyumba y’abandu abatabanibwe n’erirya haghuma nabo.”
4 Neryo Petro mwabakanirya ngoko emyatsi yiryabya. Mwababwira ati:
5 “Omughulu nabya omo muyi we Yopa ininemusaba, munalangira enzoli. Munalangira ekindu ekiri ng’olukimba lunene lw’ekitani kikandaghala erilua elubula ikihambirwe oko syongonde* ini. Ekindu ekyo mukyandaghalira aho niri.
6 Nabere nabilebererya nga muliki, munalangira esyonyama sy’amaghulu ani sy’oko kihugho, esyonyama sy’omoli, esyonyama esikakululuka, n’esyonyunyu sy’omo kyanya.
7 Kandi munowa omulenge akanibwira ati: ‘Petro, hangana, ukere, ulye!’
8 Aliwe, munabugha niti: ‘Iyehe, Mukama, sinangakola ekyo, kundi ekindu ekituwene n’ekiterire sikirikyatingira omo buno bwaghe ekiro n’ekighuma.’
9 Kandi munowa omulenge engendo y’akabiri akalua elubula. Mwanibwira ati: ‘Ebindu ebyo oMungu abiriyiramo eby’erire, isiwahula byo mo biterire.’
10 Munowa omulenge oyo w’engendo y’akasatu, neryo ebyosi byamasambibwa elubula.
11 Kandi oko mughulu oyo musa-musa abalume basatu mubahika oko nyumba aho twabya. Batumawa erilua e Kaisaria erisyanyenda.
12 Neryo ekirimu mukyanibwira kiti nighende nabo, isinatika-tika n’ahake. Abaghala betu ndatu (6) bano, nabo mubaghenda haghuma naghe. Neryo mutwingira omo nyumba ya Kornelio.
13 “Kornelio mwatukanirya ngoko mwalangira omumalaika inianimene omo nyumba yiwe, ngoko mwamubwira ati: ‘Utume abalume be Yopa, bayende Simoni oyukahulawamo Petro,
14 akendikubwira emyatsi eyo ritolere iwe n’ekihanda kyaghu kyosi imwakola mutoke erisabulwa.’
15 Aliwe, omughulu natsuka eribugha, abandu abo mubahabwa ekirimu kibuyirire ngoko netu twahabawakyo oko nzuko.
16 Neryo munibuka ebinywa by’Omukama, ngoko abya iniabeghere eribugha ati: ‘Yohana mwabatisya omo maghetse, aliwe inywe mukendisyabatisibwa omo kirimu kibuyirire.’
17 Neryo, oMungu amabya iniabiribaha ekihembo kighumerera kyo busa ngoko netu atuhakyo itwe twikiriraya Omukama Yesu Kristo, ingye niri ndi nitoke erikakirya oMungu?”*
18 Omughulu bowa emyatsi eyi, mubahuna. Neryo mubapipa oMungu. Mubabugha bati: “Kwesi oMungu anzire n’abandu b’ebihanda ibabindula emitima batoke eribana engebe.”
19 Ababya ibabiripanzwa-panzwa busana n’erighalibwa eryahuluka Stefano abihola, mubahika e Foenike, e Kipro, ne Antiokia. Aliwe, babya bakahubirya ekinywa oko Bayahudi basa.
20 Nikwa abandu balebe be Kipro ne Kirene mubahika e Antiokia. Neryo mubatsuka erihubirya engulu mbuya y’Omukama Yesu oko bandu abakabugha Ekigiriki.
21 Neryo kundi ebyala bya Yehova* byabya haghuma nabo, abandu bangyi mubikirirya n’erikwama Omukama.
22 Endeko ye Yerusalema muyowa engulu eyo. Neryo mubatuma Barnaba ye Antiokia.
23 Omughulu ahikayo n’erilangira olukogho lw’oMungu, mwatsema n’erisikya abosi bo mutima ati sibaleke erikwama Omukama n’omutima wosi.
24 Barnaba abya mundu oyuwene, abya iniaswiremo ekirimu kibuyirire n’obwikirirya. Busana n’ekyo, abandu bangyi mubikirirya Omukama.
25 Neryo mwaghenda e Tarso eriyarondya Saulo.
26 Abere abimubana, mwamutwala e Antiokia. Neryo omo mwaka mughuma, babya bakahindana n’endeko n’erikangirirya abandu bangyi kutsibu. E Antiokia yo abigha batsuka eryahulwamo Abakristo. OMungu yo wabaha erina eryo.
27 Oko biro ebyo, abaminyereri mubalwa e Yerusalema, bamandaghalira e Antiokia.
28 Omughuma wa kubo oyukahulawamo Agabo, ekirimu kibuyirire mukyamusondola eribugha ati enzala nene yikendibya omo kihugho kyosi. Na kwenene, ekihugho mukyabyamo enzala nene oko mughulu wa Klaudio.
29 Neryo abigha mubayisogha eritumira abaghala babo be Yudea obuwatikya. Obuli mundu mwabya akateka ekyo angabana.
30 N’ekyo kyo bakola. Neryo ebyo basonga-songaya, mubahabyo Barnaba na Saulo batoke eritwalirabyo abasyakulu.
Amaelezo awehikwa
^ Kutse “esyosonda, coins.”
^ Kutse “eriyihanda omo nzira y’oMungu?”
^ Ulebaye endomeko A5.
