Emibiiri y’Abakwenda 12:1-25
12 Oko mughulu oyo, Omwami Herode mwatsuka eryaghalya ab’omo ndeko.
2 Mwita Yakobo omughala wabo Yohana omo muyali.
3 Omughulu alangira ngoko Abayahudi bamatsemera omwatsi oyo, mwayahamba na Petro. (Ekyo kyabya omughulu w’ekiro kikulu ky’omukati owatemo levire.)*
4 Mwamuhamba n’erimuhira omo ngomo, mwamuhira omo byala by’ebikuto bini by’abasuda ababya bakakombolana; obuli kikuto kyabyamo abasuda bani. Abya anzire erimutondesya* embere sy’abandu Epasaka* yabilaba.
5 Omughulu Petro abya iniane omo ngomo, endeko yabya ikamusabira oko Mungu ko kutsibu.
6 Omo kiro, embere Herode amutondesaye, Petro abya inianaghotsere omo kati-kati k’abasuda babiri, inianabohirwe omo minyororo eyibiri, n’abateya babya ibanimene embere sy’omulango bakateya engomo.
7 Aliwe, omumalaika wa Yehova* mwahuluka, n’ekyakakala mukyabya omo kyumba ekyo Petro abya abohirwemo. Mwatula oko lukanga lwa Petro akamubukya. Mwamubwira ati: “Hangana luba!” Neryo eminyororo eyabya oko byala biwe muyatogha.
8 Omumalaika mwamubwira ati: “Mbala esyongyimba syaghu n’ebiryato byaghu.” Neryo Petro mwakola atya. Neryo kandi mwamubwira ati: “Wambale olukimba* lwaghu, neryo unikwame.”
9 Petro mwahulukira ehihya n’erikwama omumalaika oyo. Aliwe syabya asi ngoko ebyo akalangira ni kwenene. Mwalengekania ati akalangira enzoli.
10 Mubaghenda, bamalaba oko bateya b’erimbere n’abakabiri. Babere babihika oko mulango w’ekyuma, ogho mundu akalabamo erilua omo ngomo atoke eriya omo muyi, omulango oyo mwayikingula embere syabo. Babere babihika ehihya, bamalaba omo nzira mo haghuma. Muhatahwa endambi nene, omumalaika amalw’iniaghenda.
11 Oko mughulu oyo, Petro mwaminya ngoko emyatsi eyo abya akalabamo ni kwenene. Neryo mwabugha ati: “Oko kwenene, namalangira ngoko Yehova* mwakatuma omumalaika wiwe n’erinyilusya omo byala bya Herode n’erinyilusya omo myatsi yosi eyo Abayahudi balue banzire iyanihikira.”
12 Abere abilengekania oko mwatsi oyo, mwaya ewa Maria mama wa Yohana oyo wabya akahulwamo Mariko. Abandu balebe babya ibanahindene ewa Maria kandi babya ibanemusaba.
13 Omughulu akongota oko mulango, omughombe mukali oyukahulawamo Roda mwaghenda akayalebya oyulyakongota oko omulango nga nindi.
14 Abere abyowa ngoko ni mulenge wa Petro, mwatsema kutsibu neryo omo mwanya w’erikingula omulango, mwasuba omo nyumba inianemutibita, amayabwira abalimo ngoko Petro ane oko mulango.
15 Mubamusubirya bati: “Iwe, wabiribya musire kwe?” Aliwe, mwahatikana ngoko kwenene ni Petro yuli oko mulango. Neryo mubatsuka eribugha bati: “Ni mumalaika wiwe.”
16 Aliwe, Petro mwasighala oko mulango inianemukongota. Babere babikingula omulango, mubamulangira, neryo bamakukubala.
17 Aliwe mwababwira omo byala ati bahune. Neryo mwabakanirya emyatsi yosi ngoko Yehova* alyamulusaya omo ngomo. Mwabugha ati: “Emyatsi eyi mubwireyo Yakobo n’abaghala betu.” Neryo mwahuluka, amaya omo kindi kiharo.
18 Neryo bwabere bwakya, abasuda mubahandabuka. Mubayibulya Petro ng’abiriya hayi.
19 Herode mwamurondya ehosi, aliwe mwatamusunga. Neryo mwabulya abateya n’eribugha ati bahabawe amalipizi. Neryo Herode mwalua e Yudea amandaghalira e Kaisaria. Mwalabya eyo y’omughulu mulebe.
20 Nikwa Herode abya inianahitene oko abandu be Tiro ne Sidoni. Neryo abandu bosi abo mubayisogha eriyamusunga. Mubalemba-lemba Blasto oyo wabya imanire enyumba y’omwami bati abawatikaye. Neryo mubakania n’omwami batoke erikola naye obuholo, kundi ekihugho ky’Omwami Herode kyo kyabya kikalisyabo.
21 Omo kiro kighuma ekyahirawaho, Herode mwambala esyongyimba siwe sy’obwami, amikala oko kitumbi ky’omutsweri neryo amatsuka erikania n’abandu.*
22 Neryo abandu ababya bahindeneho mubatsuka eribugha omo mulenge muli bati: “Oyo ni mulenge w’omungu, si mulenge w’omundu!”
23 Aho n’aho omumalaika wa Yehova* mwamughusako obukoni, kundi mwataha oMungu y’olukengerwa. Mwalibwa n’eminyole neryo amahola.
24 Ekinywa kya Yehova* mukyahika oko bandu bangyi kandi abandu bangyi mubikiriryakyo.
25 Neryo Barnaba na Saulo babere babibugha omubiiri w’eriyawatikya abaghala babo be Yerusalema, mubasubula, mubaghenda haghuma na Yohana, oyukatasyahulawamo Mariko.
Amaelezo awehikwa
^ Kutse “kihamya.”
^ Kutse “erimuhulukya.”
^ Kutse “Erikiruka.”
^ Ulebaye endomeko A5.
^ Kutse “olukimba lw’eryambalira oko lundi.”
^ Ulebaye endomeko A5.
^ Ulebaye endomeko A5.
^ Kutse “amakola ehotuba, amakola ediskuru.”
^ Ulebaye endomeko A5.
^ Ulebaye endomeko A5.
