Emibiiri y’Abakwenda 16:1-40
16 Neryo, mwahika e Derbe, n’enyuma sy’aho mwaghenda e Listra. Eyo yabya omwigha oyukahulawamo Timoteo. Abya mughala w’omukali Muyahudi oyo wikirirye. Aliwe, baba wiwe abya Mugiriki.
2 Abaghala be Listra ne Ikoniamu ibakamubughako emyatsi eyuwene.
3 Paulo abya anzire erighenda na Timoteo. Neryo mwamwimya, amamubania busana n’Abayahudi ababya omo biharo ebyo, kundi abosi babya ibanasi ngoko baba wiwe ni Mugiriki.
4 Omo miyi yosi eyo babya bakalabamo, babya bakabwira abaghala babo ebyo Abakwenda n’abasyakulu ababya e Yerusalema babiriyisogha, abaghala babo abo batoke erikwamabyo.
5 Neryo esyondeko musyalola embere eribya isinasikire omo bwikirirya n’erikanya obuli kiro.
6 Kandi mubalaba e Frigia ne Galatia, kundi ekirimu kibuyirire kyabya ikyabiribabwira kiti isibahubiraya ekinywa omo kiharo kye Azia.
7 Kandi omughulu bahika e Misia, mubayikasa eriya e Bitinia. Aliwe ekirimu kya Yesu mukitalighirabo eriyayo.
8 Neryo mubalaba e Misia, bamandaghalira e Troa.
9 Neryo omo kiro, Paulo mwalangira enzoli. Omo nzoli eyo, mwalangira omulume Mumakedonia inianemumulemba-lemba n’erimubwira ati: “Usokere e Makedonia, utuwatikaye.”
10 Abere abilangira enzoli eyo, mutwayikasa eriya e Makedonia, kundi mutwalangira ngoko oMungu yulyatubwira ati tuyatulaghanaye engulu mbuya oko bandu b’eyo.
11 Mutwalwa e Troa omo bwato, twamahika e Samotrake isitwetimana. Aliwe ekiro ekikwamire, mutwaghenda e Neapoli.
12 Mutwalwa e Neapoli, twamaya e Filipi, omuyi w’Abanya Roma,* owabya muyi mukulu omo kiharo kye Makedonia. Mutwalabya ebiro bilebe omo muyi oyo.
13 Omo kiro kye Sabato, mutwalaba omo mulango w’omuyi, twamaya hakuhi n’olusi, eyo twabya tukalengekania tuti alinga yiri aho bakasabira. Mutwikala, mutwakania n’abakali ababya bahindeneho.
14 Neryo omukali oyukahulawamo Lidi, oyo wabya akaghulya esyongyimba sy’erangyi y’olubono-bono,* omukali oyo wabya we Tiatira kandi abya iniakaramaya oMungu, kandi abya akahulikirira, na Yehova* mwakingula omutima wiwe atoke erihulikirira ndeke emyatsi eyo Paulo abya akabugha.
15 Omughulu iye, n’ab’oko kihanda kiwe babatisibawa, mwatulemba-lemba ati: “Mwamabya imwamalangira ngoko niri mutaleghula oko Yehova,* mwase eka waghe.” Neryo mwatuhatikana ati tughende ewiwe.
16 Neryo kiro kighuma itunemuya aho bakasabira, mutwahindana n’omughombe mukali oyo wabyako ekirimu kibi ky’erilaghula. Iniakaleka abakama biwe ibabana esyofranga nene busana n’erilaghula.
17 Abya akatukwama itune na Paulo, inianemubugha omo mulenge muli ati: “Abalume aba, ni baghombe b’oMungu Ow’endata Kutsibu, kandi banemubahubirya enzira y’erisabuka.”
18 Abya akakola atya omo biro bingyi. Neryo Paulo mwasala aluha. Mwabinduka, amabwira ekirimu ekyo ati: “Omo rina rya Yesu Kristo ngakubwira niti ulwe omo mukali oyu.” Aho n’aho mukyamulwamo.
19 Abakama biwe babere babilangira ngoko sibendisyabya bakabana esyofranga, mubahamba Paulo na Sila, bamabakurira omo soko ahali abakulu.
20 Mubatwalabo oko batsweri b’abandu n’eribabwira bati: “Abandu aba banemudunga omuyi wetu wo kutsibu. Ni Bayahudi,
21 kandi banemukangirirya emyatsi eyo tutahamulirwe erikwama, kutse erikola kundi tuli Banya Roma.
22 Neryo abandu mubabatsurumirako n’abatsweri b’abandu mubabugha bati balusibawe esyongyimba syabo, neryo mubabwira abandu bati babahunze esyofimbo.
23 Babere babibahunza kutsibu, mubabaghusa omo ngomo, bamabwira oyukateghaya engomo bati abateghaye kutsibu.
24 Neryo kundi mubamubwira batya, mwaghusabo omo kyumba ky’emwisi ky’engomo. Mwabohera ebisando byabo omo kati-kati k’esyombagho ibiri.
25 Omo kati-kati k’ekiro, Paulo na Sila babya ibanemusaba n’eripipa oMungu omo syonyimbo. N’ababya omo ngomo babya bakahulikirirabo.
26 Aho n’aho, omusiki munene mwalaba, mwasukania esyofondasyo sy’engomo, emilango yosi muyalw’iyayikingula, n’eminyororo eyabya oko buli mundu muyalegha-legha.
27 Omughulu oyukateghaya engomo atsumbuka n’erilangira ngoko emilango y’engomo siyikingire, mwimya omuyali wiwe, mwasonda eriyita, kundi abya akalengakania ati abali omo ngomo babiritswa.
28 Aliwe, Paulo mwabirikira omo mulenge muli ati: “Isiwayita, kundi itwe bosi tune hano.”
29 Neryo mwabugha ati bakaye etala, amalw’iningira omo ngomo inianemutitimana, amakukama embere sya Paulo na Sila.
30 Mwaghenda nabo eyihya, neryo amababulya ati: “Bakama, ritolere inakolaki nitoke erisabulwa?”
31 Mubamusubirya bati: “Wikiriraye Omukama Yesu. Wamamwikirirya, ighukendisabuka, iwe n’ekihanda kyaghu kyosi.”
32 Neryo mubamukangirirya ekinywa kya Yehova,* iye n’abosi ababya omo nyumba yiwe.
33 Oko mughulu oyo, ibukine kiro, mwimyabo, amerya ebironda byabo. Enyuma sy’aho, iye n’abosi ab’omo nyumba yiwe mubabatisibwa butsira lindi-lindi.
34 Mwatwalabo ewiwe, amabahirira akalyo k’oko mesa, iye n’abosi b’omo nyumba yiwe kundi abya iniabirikirirya oMungu.
35 Bwabere bwabikya, abatsweri b’abandu mubatuma abapolisi bati bayabughe bati: “Ubohole abalume abo.”
36 Neryo oyo wabya akateya engomo mwabwira Paulo ebyo balyamubwira. Mwabugha ati: “Abatsweri b’abandu mubakatuma hano h’abalume bati tubabohole inywe babiri. Muhuluke, mughende buholo.”
37 Aliwe, Paulo mwababwira ati: “Mubakatuhunzira embere sy’abandu isitwetwatonda, itwe Banya Roma, kandi mubakatughusa omo ngomo. Nikwa banzire eritubohola omo bubiso-biso? Iyehe, sibyangaghenda bitya. Muleke ibibene-bene base, batulusaye muno.”
38 Neryo Abapolisi mubayabwira abatsweri b’abandu ebinywa ebyo. Abatsweri b’abandu mubasagha kutsibu babiminya ngoko abalume abo ni Banya Roma.
39 Neryo abatsweri b’abandu mubasa, bamabalemba-lemba. Babere babibalusya omo ngomo, mubababwira bati balue omo muyi.
40 Aliwe, babere babilua omo ngomo, mubaya ewa Lidi. Paulo na Sila babere babilangira baghala babo, mubabasikya mutima, neryo bamaghenda.
Amaelezo awehikwa
^ Omuyi oyo syabya omo kihugho kye Itali. Ababya mugho babya n’esyombangwa sighumerera ng’esy’abakalani be Itali.
^ Kutse “erangyi y’omunyama, pourpre.”
^ Ulebaye endomeko A5.
^ Ulebaye endomeko A5.
^ Ulebaye endomeko A5.
