Emibiiri y’Abakwenda 18:1-28
18 Enyuma sy’aho, mwaya e Atene. Mwalua e Atene amaya e Korinto.
2 Mweyayo Akila Omuyahudi we Ponto. Iye n’omukali wiwe Prisila babya imo banamahika bakalua e Itali kundi Klaudio abya inyabiribugha ati Abayahudi bosi balwe e Roma. Neryo Paulo mwayasungana nabo.
3 Neryo kundi Paulo abya akakola omubiiri mughumerera nabo, mwikala nabo, bamabya bakakola omubiiri wo kughuma. Abosi ibakakokotaya esyohema.
4 Obuli sabato iniakalengekanaya* oko Masako n’abandu abali omo sinagogi* n’eriwatikya Abayahudi n’Abagiriki bikiriraye.
5 Aliwe, omughulu Sila na Timoteo bandaghalira e Makedonia, Paulo mwatsuka erilabya endambi yiwe yosi akakangirirya ekinywa ky’oMungu, akakangania Abayahudi ngoko Yesu ni Kristo.
6 Aliwe kundi abandu babya bakaghana erimuhulikirira, kandi babya bakamubughako muhanda, mwakunguta esyongyimba siwe n’eribabwira ati: “Omusasi wenyu abye oko mitwe yenyu. Ingye sindiko lubanza. Eritsuka lino ngaya eyiri abandu b’ebihanda.”
7 Neryo mwalua eyo,* amayingira omo nyumba y’omulume mughuma oyukahulawamo Titio Yusto, abya akaramya oMungu n’enyumba yiwe yabya yihambene n’esinagogi.*
8 Krispo, omwimaniri we sinagogi,* mwikirirya Omukama haghuma n’abosi b’omo nyumba yiwe. Abanya Korinto bangyi abowa engulu mbuya mubikiririrya n’eribatisibwa.
9 Kandi omo kiro, Omukama mwabwira Paulo omo nzoli ati: “Isiwasagha, isiwaleka erikania, kandi isiwabya bukutu,
10 kundi nine haghuma naghu. Sihali oyukendikuhutalya kundi omo muyi ono niwitemo bandu bangyi.”
11 Neryo mwabughamo mwaka mughuma n’emisi ndatu (6), inianemukangiriryabo ekinywa ky’oMungu.
12 Omughulu Galio abya mwimaniri w’ekiharo kye Akaya, Abayahudi mubalighirana erihutalya Paulo. Neryo mubamutwala oko tribinali.
13 Mubabugha bati: “Omulume oyu anemubugha ati abandu baramaye oMungu ngoko emighambo yitebugha.”
14 Aliwe Paulo abere akasonda eribugha, Galio mwabwira Abayahudi ati: “Inywe Bayahudi, omundu oyu angabere n’ekosa kutse olubanza lunene, nangabahulikirire ndeke-ndeke.
15 Aliwe kundi ni myatsi y’erikuba obuhaka oko binywa, oko mena, n’oko Mighambo yenyu, ebyo bibalebirye. Sinangasogha emyatsi eyo.”
16 Neryo mwabahigha omo tribinali.
17 Neryo abosi mubahamba Sostene, omwimaniri w’esinagogi,* neryo bamatsuka erimuhunza embere sy’etribinali. Aliwe, Galio mwatayingirya n’ahake omo myatsi eyo.
18 Aliwe, Paulo abere abibughayo ebiro bilebe, mwalagha abaghala babo, amimya obwato n’eriya e Siria. Mwaghenda haghuma na Prisila na Akila. Mwasisirwa e Kankrea kundi abya iniabiriyilagha.*
19 Babere babihika e Efeso, Paulo amabasigha aho. Mwingira omo sinagogi,* amalengekania n’Abayahudi oko myatsi eyiri omo Masako.
20 Nomo Abayahudi babugha ambu abughe nabo mughulu muli, mwaghana.
21 Aliwe, mwalaghabo n’eribabwira ati: “Tukendisyasyasungana, Yehova* amanza.” Neryo mwalua e Efeso y’omo bwato,
22 amaya e Kaisaria. Enyuma sy’aho, mwahetuka* n’eriyaramukya endeko. N’enyuma sy’aho, amandaghalira e Antiokia.
23 Abere abibughayo mughulu mulebe, mwalwayo. Abya akalaba omo biharo mbiriri-mbiriri by’ekiharo kye Galatia ne Frigia, inianemusikya obwikirirya bw’abigha bosi.
24 Kiro kighuma, Omuyahudi oyukahulawamo Apolo, embutirwa ye Aleksandria, mwahika Efeso. Abya iniasi eribugha, kandi iniasi Amasako wo ndeke-ndeke.
25 Abya iniabirikangiribwa enzira ya Yehova.* Neryo Kundi abya n’omuhwa munene busana n’ekirimu kibuyirire, abya akakania n’erikangirirya ndeke-ndeke emyatsi eyilebirye Yesu. Aliwe, abya asi olubatiso lwa Yohana lusa.
26 Mwatsuka erikania n’obutubaha omo sinagogi.* Prisila na Akila babere babyowa ebyo abya akabugha, mubaghenda naye. Neryo bamamwowisya ndeke-ndeke amakangirirya* w’oMungu.
27 Kandi kundi Paulo abya inianzire eriya e Akaya, abaghala betu mubahandikira abigha b’ebaruha batoke erimukokya ndeke. Neryo abere abihikayo mwawatikya kutsibu abikiriraya busana n’olukogho lw’oMungu.
28 Abya akakangania n’omuhwa embere sy’abandu bosi ngoko Abayahudi bakabugha amabehi. Abya akakolesya Amasako n’eribakangania ngoko Yesu ni Kristo.
Amaelezo awehikwa
^ Kutse “iniakakola ehotuba, iniakakola ediskuru.”
^ Ulebaye amaana w’ebinywa.
^ Ni bugha ambu, omo sinagogi.
^ Ulebaye amaana w’ebinywa.
^ Ulebaye amaana w’ebinywa.
^ Ulebaye amaana w’ebinywa.
^ Kutse “abya iniabirikola enaziri.”
^ Ulebaye amaana w’ebinywa.
^ Ulebaye endomeko A5.
^ Alinga mwahetukira e Yerusalema.
^ Ulebaye endomeko A5.
^ Ulebaye amaana w’ebinywa.
^ Kutse “enzira”
