Emibiiri y’Abakwenda 19:1-41
19 Enyuma sy’aho, Apolo iniane e Korinto, Paulo mwalaba omo biharo ebiri hali oko ngetse n’erindaghalira e Efeso. Mweyayo abigha balebe.
2 Mwababulya ati: “Mumwanapokera ekirimu kibuyirire omughulu mwikiriraya?” Mubamusubirya bati: “Sitwetwatowa nga hane n’ekirimu kibuyirire.”
3 Paulo mwababulya ati: “Mwabatisibawa oko lubatiso lwahi?” Mubamusubirya bati: “Twabatisibawa oko lubatiso lwa Yohana.”
4 Paulo mwababwira ati: “Yohana abya akabatisya olubatiso olukanganaya ngoko omundu abiribindula omutima. Kandi mwabya akabwira abandu ati bikiriraye oyukendisyasa enyuma siwe, ni bugha ambu Yesu.”
5 Babere babyowa omwatsi oyo, mubabatisibwa omo rina ry’Omukama Yesu.
6 Neryo Paulo abere abibahirako ebyala, mubapokera ekirimu kibuyirire, neryo bamatsuka eribugha omo yindi mibughe n’eribugha obuminyereri.
7 Abosi ababyaho babya bandu 12.
8 Omo misi isatu, Paulo abya akingira omo sinagogi* n’eribugha n’obutubaha. Abya akakangirirya* n’erisonda erilighisyabo ekwenene eyilebirye Obwami b’oMungu.
9 Aliwe, abandu balebe mubakalya-kalya emitima yabo, bamaghana erikirirya. Bamabya bakabugha oko Nzira eyo ko muhanda embere sy’abandu. Neryo Paulo mwasighabo, amaghenda n’abigha. Neryo obuli kiro abya akakangirirya* omo kyumba ky’akalasi ke Tirano.
10 Mwakola atya omo myaka ibiri. Neryo abosi ababya bikere omo kiharo kye Azia mubowa ekinywa ky’Omukama, Abayahudi n’Abagiriki.
11 Neryo oMungu mwabya akakola ebitiko-tiko erilabira Paulo.
12 Abandu mubahika n’oko kika ky’eritwalira abakoni b’esyongyimba n’esyotabliye esiryatula oko mubiri wa Paulo. Neryo mubalama n’ebirimu ebituwene byamabalwamo.
13 Aliwe, Abayahudi balebe ababya bakaya eyi n’eyi busana n’eritibita oko syombinga, nabo mubapima erikolesya erina ry’Omukama Yesu oko bandu ababyako ebirimu ebituwene. Babya bakabugha bati: “Omo rina rya Yesu oyo Paulo anemuhubirya, ngakubwira niti ulue omo mundu oyu.”
14 Abaghala irinda (7) b’omuhereri mukulu Omuyahudi oyukahukawamo Seva, nabo babya bakakola batya.
15 Ekirimu ekituwene mukyabasubirya kiti: “Ninasi Yesu, ninasi na Paulo. Inywe muli bahi?”
16 Aho n’aho omundu oyo wabyako ekirimu ekituwene, mwabaghulukira, amabya n’akaghala kanene kubalenga, amasingabo, neryo bamalw’ibalua omo nyumba eyo n’eritibita isibambite, kandi ibabiribyako ebironda.
17 Abayahudi n’Abagiriki ababya e Efeso, abosi mubowa omwatsi oyo, abosi mubasagha kutsibu. Neryo erina ry’Omukama Yesu muryapipwa kutsibu.
18 Abangyi abikiriraya babya bakasa n’erighungama amalolo wabo butsir’ibisa.
19 Abangyi ababya bakumu mubakuma-kumira ebitabu byabo byo haghuma n’eritimyabo embere sy’abandu bosi. Mubahandako, neryo mubalangira ibyanganalwako ebihande 50 000 by’efeza.*
20 Neryo omo butoki bunene ekinywa kya Yehova* mukyahika omo biharo bingyi n’erihanda emirihi.
21 Enyuma sy’aho, Paulo mwayisogha ati akendilaba e Makedonia ne Akaya, neryo enyuma sy’aho iniaya e Yerusalema. Mwabugha ati: “Ngendibya nabihikayo kumbe inahika ne Rome.”
22 Neryo mwatuma e Makedonia y’abandu babiri ababya bakamuwatikya, ni bugha ambu, Timoteo na Erasto. Aliwe iye, mwasighala mughulu mulebe omo kiharo kye Azia.
23 Oko mughulu oyo, muhabya obutsumbu-tsumbu busana n’ababya bakakwama Enzira y’Omukama.
24 Omulume oyukahulawamo Demetrio, oyo wabya akakokotya esyohekalu sya Artemi omo feza,* abya akaleka abafundi nga ye ibabana esyofranga nene.
25 Mwahindaniabo haghuma n’abandi bafundi amababwira ati: “Munasi ngoko omubiiri ono w’abirileka itwabana esyofranga nene.
26 Ibwa mwabirilangira n’eryowa ngoko omo Efeso kandi hakuhi omo kiharo kyosi kye Azia, Paulo oyu abirilighisya abandu banene n’eribahiramo awandi malengekania ati emiungu eyikakokotibawa omo byala by’abandu si miungu n’ahake.
27 N’akandi, ngasagha niti abandu banganatsuka eribugha muhanda oko mubiiri wetu. N’akandi ngasagha niti ehekalu ya Artemi, omungu mukali mukulu, yikendilangirwamo bule, iye oyukaramibawa omo kiharo kyosi kye Asia nomo kihugho kyosi syendisyasikibwa.”
28 Abandu abo babere babyowa ebinywa ebyo, mubahitana kutsibu n’eritsuka eribugha omo mulenge muli bati: “Artemi w’Abanya Efeso ni Mukulu!”
29 Neryo abandu bosi b’omo muyi mubatsuruma, bamatibita haghuma ah’erikolera ebitsange, ibanemukurubana Gayo na Aristarko, Abanya Makedonia ababya bakaghenda na Paulo.
30 Paulo abya inianzire eringira ah’erikolera ebitsange n’erimana embere sy’abandu. Aliwe, abigha mubaghana.
31 Nibya n’abandu balebe ababya bakimanira esyofete n’ebitsange mubamukwira obulighe. Mubamutumira omulaghe w’erimulemba-lemba bati isyanatapima eringira ah’erikolera ebitsange.
32 Oko ndambi eyo, babya bakabugha eki, n’abandi kirya, kundi obuli mundu abya oko kiwe. Abandi babya isibasi nibya nga balyahindana busanaki.
33 Neryo Abayahudi mubalusya Aleksanda omo kati-kati k’abandu ibanemumukuna. Neryo Aleksanda mwabugha nabo omo byala kundi abya inianzire eribwira abandu emyatsi nga yiri yiti.
34 Aliwe, abandu babere babiminya ngoko ni Muyahudi, omo syosaha hakuhi ibiri, abosi babya bakabugha omo mulenge muli bati: “Artemi w’Abanya Efeso ni Mukulu!”
35 Omukulu w’omuyi oyo mwabya abisala atulerya abandu, mwabugha ati: “Balume be Efeso, nindi omo kati-kati k’abandu yutasi ngoko omuyi w’Abanya Efeso w’alimo ehekalu eyirimo Artemi mukulu n’esanamu eyatogha erilua elubula?
36 Kundi sihali oyo wangaghana emyatsi eyo, mubye bukutu kandi simuhumayire.
37 Kundi abalume abo mulyaleta hano si bibi b’ebiri omo hekalu, kandi sibalitsuma omungu wetu mukali.
38 Neryo Demetrio n’abafundi balikyabo bamabya ibane n’olubanza n’omundu, hane ebiro by’eritonda kandi hane n’abimaniri b’ebiharo. Batwalane oko tribinali.
39 Aliwe, mwamabya imukasondaya oghundi mwatsi, iniakendisohwa oko muhindano w’abakulu.
40 Tutetalebya ndeke busana n’omwatsi owamakoleka munabwire, banganabugha ambu tukasonda eritsukisya omulele. Kundi sitwenditoka erikangania ekikaleka abandu ibahindana batya n’erileta efuyo.”
41 Abere abibugha ekyo, amabwira abandu ati baghende.
Amaelezo awehikwa
^ Ulebaye amaana w’ebinywa.
^ Kutse “akakola ehotuba, akakola ediskuru.”
^ Kutse “akakola ehotuba, akakola ediskuru.”
^ Ni kindu ky’obughuli ekikalua omo kitaka.
^ Ulebaye endomeko A5.
^ Ni kindu ky’obughuli ekikalua omo kitaka.
