Emibiiri y’Abakwenda 2:1-47
2 Nikwa, ekiro kikulu ky’Epentekoste babya haghuma omo mwanya mughuma.
2 Aho n’aho efuyo muyasira elubula, eyabya ng’erihunga rinene, n’efuyo eyo muyusula omo nyumba yosi eyo babya bikeremo.
3 Mubalangira ehirimi hy’omuliro ehyabya ng’olulimi, hyamayighaba, n’erikira oko buli mughuma wa kubo.
4 Neryo abosi mubusulamo ekirimu kibuyirire, n’eritsuka eribugha omo mibughe mbiriri-mbiriri, ngoko ekirimu kyatokesaya obuli mundu.
5 Oko mughulu oyo, Abayahudi ababya banzire emyatsi y’oMungu yo kutsibu, abalua omo bihugho byosi, babya ibane e Yerusalema.
6 Neryo omughulu efuyo eyo yowika, abandu bangyi mubahindana. Neryo mubasweka kundu. Obuli mundu abya akowabo ibanemubugha omo mubughe wiwe.
7 Oko kwenene, mubakukubala, n’eribugha bati: “Tahie! Abandu bosi aba abakabugha, si ni Banya Galilaya!
8 Neryo kyamatokekana kiti obuli mughuma w’okw’itwe, iniowa ibanemubugha omo mubughe wiwe w’amabutwa?”
9 Abanya Parti, Abamedi, Abaelamu, Abanya Mesopotamia, Abanya Yudea, Abanya Kapadokia, Abanya Ponto n’ab’omo kiharo kye Azia,
10 Abanya Frigia, ne Pamfilia, Abanya Misri, n’abomo biharo bye Libya, hakuhi ne Kirene, Abanya Roma, abali kuno, Abayahudi, n’ababindukira omo Kiyahudi,
11 Abanya Krete, n’Abaarabu, itwe bosi tunemwowa bakabugha emyatsi eyuwenenga ey’oMungu omo mibughe yetu.
12 Oko kwenene, abosi mubasweka n’erikukubala. Babya bakabwirana bati: “Eki ni bugha ambu ki kwe?”
13 Aliwe, abandi mubabasekererya, n’eribugha bati: “Abo babirinywa edivai nene eyisihire!”*
14 Aliwe, Petro mwahangana n’abandi bakwenda 11 n’eribugha nabo omo mulenge muli ati: “Balume be Yudea, n’inywe bosi, inywe mwikere e Yerusalema, muminye omwatsi ono, kandi munihulikirire ndeke.
15 Oko kwenene, abandu aba sibatamire, ngoko mukalengekanaya. Kundi yikine saha isatu* ey’etututu.
16 Aliwe, ebyo mwamalangira ebi, by’ebyo muminyereri Yoeli akanayako, omughulu abugha ati:
17 ‘“Omo biro by’enduli, oMungu ati, “Ngendisyutulira ekitswe ky’ekirimu kyaghe oko bandu bosi. Neryo abaghala n’abali benyu bakendisyabugha obuminyereri, n’abalwana benyu bakendisyalangira esyonzoli, n’abasyakulu benyu bakendisyalangira esyonzoli.
18 Kandi oko biro ebyo, ngendisyutulira ekitswe ky’ekirimu kyaghe nibya n’oko baghombe baghe b’obulume, n’oko baghombe baghe b’obukali, neryo nabo bakendisyabugha obuminyereri.
19 Kandi ngendisyakola emyatsi eyikaswekaya endata omo lubula, n’ebitiko-tiko eyikwa oko kihugho. Hakendisyabya omusasi, omuliro, n’ebitu by’omuki.
20 Eryuba rikendisyabya mwirima, n’omughenda iniabya musasi, embere ekiro kikulu n’eky’olukengerwa kya Yehova* kihike.
21 Kandi obuli mundu oyukabirikira erina rya Yehova* akendisyasabulwa.”’
22 “Balume be Israeli, muhulikirire ebinywa bino: Yesu Munazareti abya mundu oyo oMungu abakanganaya ndeke-ndeke erilabira emyatsi y’obutoki, emyatsi eyikaswekaya, n’ebitiko-tiko ebyo Mungu akola omo kati-kati kenyu erilabira iye, ngoko munasi inywibene-bene.
23 Omulume oyu itawa erikwamana n’ebyo Mungu abya iniabiripanga embere n’erikwamana n’obutoki bw’oMungu bw’eriminya emyatsi isiyiriyakoleka. Mumwamukongomerera oko muti erilabira abandu abatesikaya emighambo, kandi mumwamubughaho.
24 Aliwe, oMungu mwamulubukya omw’imulusya omo maghali* w’oluholo, kundi kyabya isikyangatokekana oluholo lukaghana erimulwika.
25 Kundi omughulu Daudi amukanayako, mwabugha ati: ‘Omughulu wosi ngahira Yehova* embere syaghe,* kundi ali oko luhande lwaghe lw’amali, sinangasuka-sukanibwa n’ahake.
26 Ekyo kikaleka omutima waghe iniatsema kutsibu n’olulimi lwaghe ilwatsema kutsibu, neryo ngendisyabyaho ininayiketere oMungu;
27 kundi siwendisyanileka omo Yisinda.* Siwendisyaligha n’ahake omutaleghula waghu akahonda.*
28 Wabirinikangirirya esyonzira sy’engebe, ukendisyanisulyamo obutseme bunene embere syaghu.’*
29 “Balume, baghala betu, muleke nibakaniraye oko Daudi omukulu w’ekihanda butsir’isagha. Mwahola, amatabwa n’eyisinda yiwe yikine omo muyi wetu erihika na munabwire.
30 Kundi abya muminyereri, kandi abya inianasi ngoko oMungu abirimulagha omwilapa ati akendisyikalya omughuma w’oko bana biwe oko kitumbi kiwe ky’obwami,
31 mwalangira embere erilubuka rya Kristo, kandi mwakania kuryo. Mwabugha ati Kristo syandisyalekwa omo Yisinda,* n’omubiri wiwe syendisyahonda.
32 Yesu oyo, oMungu mwamulubukya, n’itwe bosi mutwayilangirira omwatsi oyo.
33 Neryo kundi abirihirwa omo mwanya w’endata, oko luhande lw’amali lw’oMungu, kandi kundi Tata abirimuha ekirimu kibuyirire ekyalaghawa, abiryutula ekyo mukalangira n’eryowa.
34 Daudi mwatahetukira elubula. Aliwe, iyuwene-wene akabugha ati: ‘Yehova* mwabwira Omukama waghe ati: “Ikala oko luhande lwaghe lw’amali
35 erihika omughulu ngendisyahira esyonzighu syaghu mo kitumbi ky’ebisando byaghu.”’
36 Neryo ekihanda kyosi kye Israeli kiminye ndeke-ndeke ngoko oMungu mwamuyiramo Mukama kandi Kristo, ye Yesu oyu oyo mwakongomerera oko muti.”
37 Omughulu bowa ebinywa ebyo, mubyatula oko mitima yabo. Neryo mubabulya Petro n’abandi bakwenda bati: “Balume, baghala betu, ritolere itwakolaki?”
38 Petro mwababwira ati: “Muyisubeko n’obuli mughuma w’okw’inywe abatisibawe, omo rina rya Kristo, mutoke erighanyirwa amalolo wenyu. Kandi imukendihabwa ekihembo ky’ekirimu kibuyirire kyo busa.
39 Kundi endaghane ni yenyu n’abana benyu, n’abosi abali ehali, n’abosi abo Yehova* Mungu wetu akendisyabirikira.”
40 Kandi erilabira ebindi binywa, mwakangania ndeke-ndeke n’eribahana ati: “Muyilusaye omo kizazi* kino ekihengemire.”
41 Neryo abangirira ebinywa biwe n’obutseme, mubabatisibwa. Abandu hakuhi 3 000 mubahirwa oko mighanzo y’abigha.
42 Neryo mubataleka erikwama amakangirirya w’abakwenda, erihindana haghuma, erirya akalyo ko haghuma, n’erisaba.
43 Neryo abandu bosi mubatsuka erisagha n’abakwenda mubatsuka erikola emyatsi mingyi eyikaswekaya n’ebitiko-tiko.
44 Abosi abikiriraya babya haghuma. Babya bakahira ebindu byosi haghuma.
45 Babya bakaghulya ebindu byabo, obuteke bwabo, n’erighabira abosi ebyo balyasunga, erikwamana n’ebyo obuli mundu abya alaghireko.
46 Kandi obuli kiro, ibakahindana omo Hekalu, bakalandamirira ekindu kighuma, kandi ibakalira akalyo kabo omo manyumba mbiriri-mbiriri, n’eriryako haghuma ibanatsemire kutsibu, kandi n’omutima owuwene.
47 Ibakabya ibanemupipa oMungu n’eryanzwa n’abandu bosi. Kandi obuli kiro, Yehova* abya inianemuleta abandu ababya batolere erisabulwa.
Amaelezo awehikwa
^ Kutse “edivai nyihya-nyihya.”
^ Ni bugha ambu, hakuhi 9:00.
^ Ulebaye endomeko A5.
^ Ulebaye endomeko A5.
^ Kutse kandi, “bikoba.”
^ Ulebaye endomeko A5.
^ Kutse “embere syameso waghe.”
^ Kutse “Hadesi,” ni bugha ambu, eyisinda y’abandu bosi. Ulebaye amaana w’ebinywa.
^ Kutse “siwendisyaleka n’ahake enafsi yaghe ikahonda.”
^ Kutse “sy’obusu bwaghu.”
^ Kutse “Hadesi,” ni bugha ambu, eyisinda y’abandu bosi. Ulebaye amaana w’ebinywa.
^ Ulebaye endomeko A5.
^ Ulebaye endomeko A5.
^ Kutse “lulengo.”
^ Ulebaye endomeko A5.
