Emibiiri y’Abakwenda 22:1-30
22 “Balume, baghala betu, n’abobaba, muhulikirire, ngasonda eribakanirya ngoko emyatsi yiri.”
2 Babere babyowa Paulo akakania nabo omo mubughe w’Ekiebrania, abosi mubahunerera. Neryo Paulo mwabugha ati:
3 “Niri Muyahudi, nabutirawa e Tarso ye Kilikia, aliwe nasomera omo muyi ono. Gamalieli yo wabya mughalima waghe. Munakangiriribwa erikwama emighambo yosi yo ndeke-ndeke eyo abotata-kulu wetu babya bakakwama. Nabya n’omuhwa omo myatsi y’oMungu, ngoko inywe bosi muli munabwire.
4 Munaghalya n’eriita abandu ababya abakakwama Enzira eyi. Munaboha n’erighusa omo muliki abalume n’abakali.
5 Omuhereri mukulu n’abasyakulu bosi basi omwatsi oyo. Ibo bo babya bakamba esyobaruha sy’eritwalira abaghala betu be Damasko. Kandi nabya omo nzira ngayahamba abaliyo n’eriletabo e Yerusalema ibanabohire, batoke erihabwa amalipizi.
6 “Aliwe, hakuhi emedi ngasonda erihika e Damasko, ekyakakala mukyalua elubula n’erilw’ikyakolerya omwanya owabya anitimbireko.
7 Neryo munawa ahisi, namowa omulenge akanibwira ati: ‘Saulo, Saulo, busanaki ukaniaghalaya?’
8 Naghe munasubirya niti: ‘Ulindi kwe Mukama?’ Omulenge mwanisubirya ati: ‘Niri Yesu Omunazareti oyo ukaghalaya.’
9 Abalume ababya haghuma naghe mubalangira ekyakala, aliwe mubatowa omulenge owabya akakania naghe.
10 Neryo munabulya niti: ‘Mukama, ritolere inakolaki?” Omukama mwanisubirya ati: ‘Hangana, ughende e Damasko, eyo yo bakendikubwira ebyosi ebyo utolere iwakola.’
11 Aliwe kundi ameso waghe abya iniabirilibana busana n’ekyakakala kinene ekyo, ababya haghuma naghe mubanitwala e Damasko ibananihambire oko byala.
12 “Neryo Anania, omulume oyo wabya asaghire oMungu n’erikwama Emighambo, kandi oyo wabya iniakabughawako ndeke n’Abayahudi bosi, kandi oyo wabya ikereyo,
13 mwasyanibana. Mwimana hakuhi naghe, neryo amanibwira ati: ‘Saulo, mughala wetu, ameso waghu alibukale.’ Aho n’aho, munasumba ameso, namamulangira.
14 Mwanibwira ati: ‘OMungu w’abotata-kulu wetu abirikusombola utoke eriminya ebyo anzire, utoke erilangira oyutunganene, n’eryowa omulenge wiwe,
15 kundi ukendibya mwimiri* wiwe, neryo ukendibya ukabwira abandu bosi b’emyatsi eyo ulyalangira n’eryowa.
16 Neryo busanaki ukinalinda-linda? Hangana ubatisibawe n’eriyilusyako amalolo waghu omw’ibirikira erina riwe.’
17 “Aliwe kiro kighuma, inabirisuba e Yerusalema, nabya ininemusabira omo hekalu. Neryo munalangira enzoli.
18 Omo nzoli eyo, munalangira Omukama akanibwira ati: ‘Yira luba-luba, ulue omo Yerusalema, kundi sibendiligha ebyo ukendibabwira okw’ingye.’
19 Neryo munabugha niti: ‘Mukama, omo buli sinagogi* banasi ndeke-ndeke ngoko nabya ngaboha, n’erihunza ababya bakakwikirirya.
20 Omughulu bita Stefano, omwimiri* waghu, nabya inineho. Munatsemera omwatsi oyo, kandi n’ingye nabya ngateya esyongyimba* sy’ababya bakamwita.’
21 Aliwe mwanibwira ati: ‘Ghenda, kundi ngendikutuma oko bihanda by’ehali.’”
22 Mubamuhulikirira erihika omughulu abugha ebinywa ebyo. Neryo mubabugha omo mulenge muli bati: “Mulusaye omundu oyo omo kihugho, syatolere eribyaho.”
23 Babya bakalaka, n’erighusa-ghusa esyongyimba* syabo, n’erighusa olututu omo mwanya.
24 Neryo omukomanda mwabugha ati bingiraye Paulo y’omo kambi y’abasuda. Kandi mwabugha ati bamuhunze atoke eribugha, kundi abya anzire eriminya abandu nga babiritsurumira Paulo yo busanaki.
25 Aliwe, babere babimughotserya ahisi batoke erimuhunza, Paulo mwabwira omukulu w’abasuda oyo wabyaho ati: “Unahamulirwe erihunza Omunya Roma* isyalyatondesibwa?”
26 Omukulu w’abasuda abere owa ekyo, mwaya eyiri omukomanda, n’erimubwira ati: “Neryo ukendikolaki? Sini Munya Roma!”
27 Neryo omukomanda mwaya eyiri Paulo, amamubulya ati: “Terimbwira, uli Munya Roma?” Paulo mwamusubirya ati: “Inga.”
28 Omukomanda mwatasyamubwira ati: “Ingye munaliha esyofranga nene batoke eriniligha eribya Munya Roma.” Paulo mwabugha ati: “Aliwe ingye, nabutawa mo Munya Roma.”
29 Aho n’aho, abalume ababya bakasonda erimuhunza n’erimubulya amabulyo mubasuba enyuma. N’omughulu omukomanda aminya ngoko Paulo ni Munya Roma, mwasagha kutsibu kundi abya iniabiribugha ati Paulo abohawe omo minyororo.
30 Aliwe, ekiro ekikwamire, omukomanda abya anzire inaminya nga ni busanaki Abayahudi bakasitaka Paulo. Neryo mwabugha ati Paulo aboholawe, mwabwira abahereri bakulu n’Esanhedrini yosi ati bahindane. Neryo mubandaghalya Paulo, bamamwimania omo kati-kati kabo.
Amaelezo awehikwa
^ Kutse “mutemwe.”
^ Ulebaye amaana w’ebinywa.
^ Kutse “omutemwe.”
^ Kutse “esyongyimba sy’eryambalira oko sindi.”
^ Kutse “esyongyimba sy’eryambalira oko sindi.”
^ Kutse “omukalani we Roma.”
