Emibiiri y’Abakwenda 23:1-35
23 Paulo mwasamalira abali omo Sanhedrini,* amabugha ati: “Balume, baghala betu, munayighendya n’obunya-mutima* obuwene embere sy’oMungu erihika na munabwire.
2 Neryo omuhereri mukulu Anania mwabwira ababya bimene hakuhi na Paulo ati bamuhunze oko buno.
3 Neryo Paulo mwabugha ati: “OMungu akendikuhunza, iwe luhimbo oluliko erangyi y’omusohe!* Wikere aho busana n’erinitswera erikwamana n’Emighambo, kandi ighunemutaruka oko Mighambo omw’ibugha uti banihunze?”
4 Ababya bimene aho mubabugha bati: “Ukatsamba omuhereri mukulu w’oMungu?”
5 Paulo mwabugha ati: “Baghala betu, nilue isinasi ngoko ni muhereri mukulu, kundi kihandikire kiti: ‘Isiwabugha muhanda oko mukulu w’omo kihugho kyenyu.’”
6 Paulo mwaminya ngoko enusu y’abandu ababya omo Sanhedrini* babya ini Basadukayo, n’eyindi nusu ini Bafarisayo. Neryo mwabugha omo mulenge muli ati: “Balume, baghala betu, niri Mufarisayo, omwana w’Abafarisayo. Amaha w’erilubuka ry’abaholi w’akaleka inatondesibwa!”
7 Abere abibugha ebyo, muhabya eritendihulikirirana omo kati-kati k’Abafarisayo n’Abasadukayo, neryo mubaghabana.
8 Kundi Abasadukayo bakabugha bati sihali erilubuka, sihali abamalaika, sihali n’ebirimu. Aliwe, Abafarisayo bikirirye ebyosi ebyo.
9 Neryo muhabya efuyo nene, n’abahandiki balebe b’omo kyama ky’Abafarisayo mubahangana n’eritsuka eribugha ibanahitene bati: “Sitwetasunga oko mundu oyu kw’ekosa; aliwe ekirimu kutse omumalaika amabya imwakakanaya naye—.”
10 Eritendihulikirirana ryabere ryabibya rinene, omukomanda mwasagha ati abandu banganatahangula Paulo mo hihande-hihande. Neryo mwabwira abasuda ati bandaghale, bayalusaye Paulo omo kati-kati k’abandu n’erimusubya omo kambi y’abasuda.
11 Aliwe ekiro ekikwamire, omo kiro, Omukama mwimana hakuhi naye n’erimubwira ati: “Isiwasagha! Kundi wabirihubirya ndeke-ndeke erina ryaghe e Yerusalema, kutya utolere iwahubiryaryo ne Roma.”
12 Bwabere bwabikya, Abayahudi mubasohera Paulo kandi mubalapa bati sibendirya kutse erinywa batebita Paulo.
13 Abalume abalapa eriita Paulo babya banene oko 40.
14 Abalume aba mubayasungana n’abahereri bakulu n’abasyakulu, n’eribabwira bati: “Twabirilapa tuti sitwendirya kindu kyosi-kyosi tutetwita Paulo.
15 Neryo inywe haghuma n’Esanhedrini,* mubwire omukomanda muti abaletere Paulo, mubye nga mwanzire eritasyabulirirya Paulo emyatsi milebe. Nikwa embere ahike, tukendibya itwabiriyiteghekania erimwita.”
16 Aliwe, omughala w’omwali wabo Paulo* mwowa ngoko banemupanga eriyalimbya Paulo. Neryo mwingira omo kambi y’abasuda n’eribwira Paulo ngoko banemupanga eriyamulimbya.
17 Neryo Paulo mwabirikira omughuma w’oko bakulu b’abasuda n’erimubwira ati: “Utwale omulwana oyu eyiri omukomanda, anawite eky’erikania naye.”
18 Neryo mwatwala omulwana oyo eyiri omukomanda, n’erimubwira ati: “Ye Paulo, oyuli omo muliki, mwakanibirikira n’erinibwira ati nilete omulwana ono eyo uli, kundi anawite omwatsi w’erikubwira.”
19 Omukomanda mwamuhamba oko byala, bamayihengeka, neryo amamubulya ati: “Nakwa utiki?”
20 Omulwana oyo mwamusubirya ati: “Abayahudi babirilighirana bati bakendikubwira bati usyatwala Paulo omo Sanhedrini,* omungya. Bati bakendisyabya nga banzire eriminya myatsi mingyi oko lubanza lwa Paulo.
21 Aliwe, isiwanataligha, kundi abalume banene oko 40 babirimulimbya. Babirilapa bati sibendirya kutse erinywa batebita Paulo. Babiriyiteghekania, iwe musa yo bakinalinda.”
22 Neryo omukomanda mwabwira omulwana oyo ati aghende. Aliwe embere aghende, mwamubwira ati: “Isiwanatabwira omundu n’omughuma ebyo ulyambwira.”
23 Neryo mwabirikira abakulu babiri b’abasuda n’eribabwira ati: “Muteghekanaye abasuda 200, abalume 70 abasi erighenda oko syosabayiri,* n’abasuda 200 abahekire amatumo, abakendighenda e Kaisaria oko saha isatu sy’ekiro.*
24 Muteghekaniraye na Paulo esyosabayiri,* atoke erihika ndeke eyiri omuguvernere Feliksi.”
25 Kandi mwahandika ebaruha, ati:
26 Ebaruha eno ikalua oko Klaudio Lusia. Ngatumirayo omuguvernere Feliksi, Oyusikibwe. Namakuramukya!
27 Abayahudi mubahamba omundu oyu kandi babya bakasonda erimwita. Aliwe ingye n’abasuda baghe mutwalw’itwasa luba erimulusya omo byala byabo, kundi munowa ngoko ni Munya Roma.
28 Munamuleta embere sy’Esanhedrini* yabo nitoke eriminya ekiryaleka ibamusitaka.
29 Munafumbula ngoko bakamusitaka busana n’Emighambo yabo, aliwe habya isihali n’omwatsi n’omughuma owangaleka itwamwita kutse erimuboha.
30 Aliwe kundi mubanibwira ngoko Abayahudi babirimusohera, ngalw’inakutumira omulume oyo kandi ngabwira abakamusitaka niti bayakubwire ebikaleka ibamusitaka.”
31 Neryo Abasuda mubakwama ebyo mukulu wabo ababwira, bamimya Paulo, bamamutwala e Antipatri omo kiro.
32 Ekiro ekikwamire, mubamusigha haghuma n’abalume ababya oko syosabayiri,* aliwe ibo mubasubula oko kambi y’abasuda.
33 Ababya bakaghenda oko syosabayiri* mubingira e Kaisaria, bamaha ebaruha y’omuguvernere, n’erileta Paulo embere sy’omuguvernere oyo.
34 Neryo mwasoma ebaruha eyo, amabulya Paulo nga ni w’omo kiharo kyahi. Paulo amamubwira ati ni we Kilikia.
35 Omuguvernere mwamubwira ati: “Ngendihulikirira olubanza lwaghu lwo ndeke-ndeke abakakusitaka babihika.” Neryo mwabugha ati bateghaye Paulo omo nyumba y’omwami Herode.
Amaelezo awehikwa
^ Ulebaye amaana w’ebinywa.
^ Kutse “ezamiri.”
^ Kutse “enzeru, blanc.”
^ Ulebaye amaana w’ebinywa.
^ Ulebaye amaana w’ebinywa.
^ Kutse “omuhwa wa Paulo.”
^ Ulebaye amaana w’ebinywa.
^ Kutse “syofarasi, esyoshevale.”
^ Ni bugha ambu, hakuhi 21:00.
^ Kutse “esyofarasi, esyoshevale.”
^ Ulebaye amaana w’ebinywa.
^ Kutse “esyofarasi, esyoshevale.”
^ Kutse “esyofarasi, esyoshevale.”
