Emibiiri y’Abakwenda 25:1-27
25 Muhabya habilaba ebiro bisatu, Festo abihika omo kiharo ekyo n’eritsuka eritabala, Festo mwalua e Kaisaria, amahetukira e Yerusalema.
2 Neryo abakulu b’abahereri n’abandu abasikibwe b’omo Bayahudi mubasitaka Paulo oko Festo. Mubalemba-lemba Festo
3 bati atume abandu bayende Paulo n’erimuleta e Yerusalema. Aliwe, babya banzire erimulimbya n’erimwitira omo nzira.
4 Nikwa Festo mwabasubirya ati Paulo akendibya iniane omo muliki e Kaisaria, kandi ngoko iyuwene-wene hakisiya hake iniasubayo.
5 Neryo mwabugha ati: “Oko kwenene, omundu oyo amabya imwakakola ekosa, abakulu b’omo kati-kati kenyu bandaghale haghuma naghe, bamusitake.”
6 Abere abibugha nabo ebiro nga munani kutse ikumi, mwandaghalira e Kaisaria. Ekiro ekikwamire, mwikala omo kitumbi ky’omutsweri, amabugha ati balete Paulo.
7 Paulo mwabya abihika, Abayahudi abalua e Yerusalema mubamutimbako, n’erimusitaka bati mwakolire amakosa manene-manene, aliwe mubatatoka erikangania nga nina kwenene.
8 Aliwe Paulo mwatonda ati: “Mundataruka oko Mighambo y’Abayahudi, kutse eritsandya Ehekalu, kutse erikosera Kaisari.”
9 Festo, oyo wabya akaronda enyanzawe oko Bayahudi, mwabwira Paulo ati: “Wanzire iwaya e Yerusalema n’eritswerwa embere syaghe busana n’emyatsi eyi?”
10 Aliwe Paulo mwabugha ati: “Niri embere sy’etribinali ya Kaisari, hano ho nitolere eritswerwa. Mundakosera Abayahudi, naghu wabirilangira ekyo kyo ndeke-ndeke.
11 Namabya iniri mukola-nabi kutse inabirikola omwatsi owatolere inakwa, sinighanire erikwa. Aliwe, emyatsi eyo abandu aba bakanisitaka si kwenene. Sihali oyo wangabugha ati asingene erinihira omo byala byabo busana n’eribatsemesya. Ngasaba niti niyatondere eyiri Kaisari!”
12 Neryo Festo, abere abikola akasyakulu n’abahani biwe, mwamusubirya ati: “Wamasaba uti ngambe uyatondere eyiri Kaisari, ukendiyatondera embere sya Kaisari.”
13 Habere habilaba ebiro bilebe, omwami Agripa na Berenike mubahika e Kaisaria bakasyabana Festo.
14 Kundi mubabughayo ebiro binene, Festo mwakanirya omwami oko lubanza lwa Paulo. Mwamubwira ati:
“Hano hane omulume oyo Feliksi asigha omo muliki.
15 Omughulu nabya e Yerusalema, abahereri bakulu n’abasyakulu b’Abayahudi mubamusitaka n’eribugha bati ahabawe amalipizi.
16 Aliwe, munabasubirya niti Abanya Roma sibabeghere erihira omundu omo byala by’abakamusitaka busana n’eritsemesya abakamusitaka; ritolere oyukasitakawa iniatsuka eritondera embere sy’abakamusitaka n’erihabwa akanya k’erikangania ebyo bakamusitaka nga ni kwenene, kutse iyehe.
17 Mubabya babihika hano, munakola luba. Ekiro ekikwamire, munabugha niti balete omulume oyo y’oko tribinali nitoke erimutswera.
18 Abamusitaka mubahika. Aliwe, mubatamusitaka emyatsi mibi eyo nabya niyilindirireko.
19 Aliwe, babya bakakuba naye obuhaka oko myatsi y’eriramya ryabo n’oko myatsi eyilebirye omulume mughuma oyukahulawamo Yesu, oyo wahola, aliwe oyo Paulo akabugha ati aneho.
20 Kundi mundatoka eribugha obuhaka obo, munamubulya ng’anzire eriya e Yerusalema, neryo eyo yo bayamutswera busana n’emyatsi eyo.
21 Aliwe, omughulu Paulo asaba ati bamuleke omo muliki inianemulinda ebyo Ow’olukengerwa akendisoha, munabugha niti bamuleke omo muliki erihika omughulu ngendisyamutuma eyiri Kaisari.”
22 Neryo Agripa mwabwira Festo ati: “Naghe nanzire inahulikirira omulume oyo.” Neryo Festo mwamusubirya ati: “Ukendisyamuhulikirira omungya.”
23 Neryo mubwabya bwabikya, Agripa na Berenike mubasa n’olukengerwa lunene, bamingira omo kyumba ky’erihulikiriramo esyombanza. Babya n’abakomanda n’abalume abasikibwe b’omo muyi. Neryo Festo abere abibugha ati balete Paulo, bamamuleta.
24 Festo mwabugha ati: “Iwe mwami Agripa, nenyu inywe bosi muli hano haghuma netu, mwamalangira omulume oyu, Abayahudi bosi e Yerusalema na hano babirimusitaka okw’ingye, ibanemubugha omo mulenge muli bati ritolere omundu oyo iniakwa.
25 Aliwe ingye, munalangira ngoko mwatakola ekyangaleka iniakwa. N’omughulu iyuwene-wene asaba ati ngambe ayatondere eyiri Ow’olukengerwa, munayisogha erimutumayo.
26 Aliwe, namahandikira Omukama waghe, sinasi nganangamuhandikira niti omulume oyu alyakolaki, kyo kyaleka inamutondesya embere syenyu inywe bosi, kutsibu-tsibu embere syaghu, iwe mwami Agripa. Nabya ngalengekania niti ngendibya nabimutondesya, inasunga eky’erihandika.
27 Kundi sinilangire nga nina ky’amenge erituma omundu oyubohirwe butsir’ikangania ebyo bakamusitakako.”
