Emibiiri y’Abakwenda 26:1-32
26 Agripa mwabwira Paulo ati: “Wanganatonda.” Neryo Paulo mwakakya ebyala biwe n’eribugha ati:
2 “Mwami Agripa, niri n’obutseme bw’erisunga akanya k’eritondera embere syaghu munabwire busana n’emyatsi yosi eyo Bayahudi bakanisitaka.
3 Niri n’obutseme kutsibu-tsibu kundi unasi ndeke-ndeke emibere y’Abayahudi n’emyatsi eyo batehulikiriranako. Neryo ngakusaba niti unihulikirire n’omutima mughuma.
4 “Abayahudi bosi banasi ngoko nabya ngayighendya omo kati-kati k’abo* n’omo Yerusalema eritsuka omo bulwana bwaghe.
5 Neryo baniasi erilua kera. Bamanza, ibakendikubwira ngoko nabya Mufarisayo. Kandi ngoko unasi, akasomo k’Abafarisayo kawite emighambo minene kulenga abandi Bayahudi.
6 Aliwe, ngatondesibawa munabwire busana n’ekyo oMungu alagha abotata-kulu wetu.
7 N’ebihanda byetu 12 binemulindirira eribererera ry’endaghane eyo, eyo Mungu alagha. Neryo binemukolera oMungu yo kutsibu omubiiri owabuyirire omo kiro n’omwitungyi. Mwami, ekyo kyo kikaleka Abayahudi ibanisitaka kundi nikirirye endaghane eyo.
8 “Busanaki simwikirirye ngoko oMungu anganalubukya* abaholi?
9 Naghe nabya nikirirye ngoko ritolere inaghana koto-koto erina rya Yesu Omunazareti.
10 N’ekyo kyo nakola omo Yerusalema. Munahira ababuyirire banene omo muliki, kundi abahereri bakulu babya ibabirinihamulira, kandi nabya ingaligha niti ababuyirire bitawe.
11 Kangyi-kangyi omo syosinagogi syosi, nabya ngabaha amalipizi batoke erighana obwikirirya bwabo. Kundi nabya inabiribahitanako kutsibu, munahika n’oko kika ky’eriyabaghalya nibya n’omo yindi miyi.
12 “Omughulu nabya ngaya e Damasko busana n’eriyabaghalya, n’abahereri bakulu ibabirinihamulira n’erimba omubiiri oyo,
13 Mwami, oko medi, inine omo nzira, munalangira ekyakakala kikalua elubula. Kyabya ikikakoleraya kutsibu kulenga eryuba. Mukyakolerya omwanya owabya inianitimbireko n’owabya atimbire oko ababya haghuma naghe.
14 Itwe bosi mutwawa ahisi. Neryo munowa omulenge akakania naghe omo mubughe w’Ekiebrania ati: ‘Saulo, Saulo, busanaki, ukaniaghalaya? Ukayitesa omw’ilwa naghe.’*
15 Munabulya niti: ‘Uli ndi kwe Mukama?’ Omukama mwanisubirya ati: ‘Ingye Yesu, oyo ukaghalaya.
16 Aliwe, uhangane. Mungakuhulukira nitoke erikuyiramo mughombe n’omwimiri* w’emyatsi eyo ulyalangira n’emyatsi eyinilebirye eyo ngendikukangania.
17 Ngendisyabya ngakusabula oko bandu aba n’oko bandu b’ebihanda, b’eyo ngakutuma
18 utoke erikingula ameso wabo, eribalusya omo mwirima n’eribaleta omo kyakakala, n’eribalusya oko Sitani n’eribaleta oko Mungu, batoke erighanyirwa amalolo wabo n’erisyabana omwandu haghuma n’abakayirawamo babuyirire busana n’erinikirirya.’
19 “Neryo, Mwami Agripa, munitaghana erikwama ebyo nabwirawa omo nzoli eyo eyalua elubula.
20 Aliwe, munayabwira abandu niti ritolere ibabindula emitima yabo n’erikwama oMungu omw’ikola ebikakanganaya ngoko babiribindula emitima yabo. Munatsuka eribwira abakalani be Damasko, enyuma sy’aho namayabwira abakalani be Yerusalema, kandi namayatimba-timba omo Yudea yosi, namayabwira n’abandu b’ebihanda.
21 Ekyo kyo kyaleka Abayahudi ibanihamba omo hekalu n’erisonda eriniita.
22 Aliwe, kundi oMungu abya akaniwatikya, nikinahubiraya abalere n’abakulu. Ekyo ngahubiraya kye n’ekyo Abaminyereri erihirako na Musa babya ibabiribugha
23 bati kyabya kitolere Kristo iniaghalwa. Kandi kundi angabere w’erimbere erilubuka, angayiriyahubirya n’eritwalira abandu b’ebihanda b’ekyakakala.”
24 Omughulu Paulo abya akatonda n’eribugha emyatsi eyo, Festo mwabugha omo mulenge muli ati: “Paulo, wamabya musire kwe! Eriminya myatsi mingyi ryamaleka omutwe waghu iniatsanda!”
25 Paulo mwasubirya ati: “Iwe w’olukengerwa Festo, si bugha ambu namabya musire, ebyo ngabugha ni by’ekwenene kandi ni by’obwenge.
26 Kandi ninasi ngoko omwami oyo ninemukania naye bweghu-bweghu anasi emyatsi yosi eyo; nikirirye ngoko sihali n’ekyo atasi, kundi emyatsi eyo muyitakoleka omo bubiso-biso.
27 Mwami Agripa, unikirirye Abaminyereri? Ninasi ngoko wikirirye.”
28 Agripa mwamusubirya ati: “Hakisiya hake iwaleka naghe inabya Mukristo.”
29 Neryo Paulo mwamubwira ati: “Habye ihakisiya hake, kutse ihakine mughulu muli, embere sy’oMungu, nanzire iwe n’abosi abanemunihulikirira munabwire imwabya nga ngye. Aliwe, sinanzire mukabohwa nga ngye.”
30 Neryo omwami mwahangana n’omuguvernere na Berenike n’abalume bosi ababya bikere nabo.
31 Babya bakaghenda ibanemubwirana bati: “Omulume oyu mwatakola ekyangaleka iniakwa kutse iniahirwa omo muliki.”
32 Agripa mwabwira Festo ati: “Omulume oyu kwatasaba ati ayatondere eyiri Kaisari, twangamuboholire.”
Amaelezo awehikwa
^ Kutse “omo kihanda kyaghe.”
^ Kinywa kwa kinywa, “anganahangania.”
^ Kinywa kwa kinywa, “omw’iyikoroghosania oko fimbo y’ekyuma.” Ni fimbo eyiyitsongire eyo bakabingamo enyama.
^ Kutse “n’omutemwe.”
