Emibiiri y’Abakwenda 27:1-44
27 Neryo babere babiyisogha bati tukendiya e Itali omo bwato, mubabwira Yulio, omukulu w’abasuda w’omo kikuto kya Ogisto ambu ateghaye Paulo n’abandi bandu b’omuliki.
2 Mutwingira omo bwato obukalua e Adramitiamu obwangalabire omo myanya mbiriri-mbiriri eyiri oko musike w’engetse* omo kiharo kye Azia. Aristarko, Omumakedonia we Tesalonika, abya iniane haghuma netu.
3 Ekiro ekikwamire, mutwimana e Sidoni. Yulio mwakolera Paulo yo ndeke, kandi mwamulighira eriyabana abira biwe batoke erimuha ebyo alaghireko.
4 Eyo mutwalaba omo ngetse, twamalaba hakuhi ne Kipro, kundi ekihunga kyabya kikasonda eritutwala eyo tutelolera.
5 Neryo mutwalaba omo kati-kati k’engetse hakuhi ne Kilikia ne Pamfilia, twamayimana e Mira omo Lisia.
6 Eyo, omukulu w’abasuda mwasungayo obwato obwabya bukalua e Aleksandria bukaya e Itali, neryo mwabugha ati tusambire mubo.
7 Neryo mutwabya twabighenda bolo-bolo omo biro bilebe, mutwabulikira itwamahika e Kinido. Kundi ekihunga kyabya kikaleka itwatalola embere, mutwalaba hakuhi ne Salmone, twamaghenda e Krete iyinemututeya oko kihunga.
8 Mutwalaba oko musike w’engetse oko hambe-hambe, mutwahika ahakahulawamo Aho Amato Akimana Ahuwene.* Habya hakuhi n’omuyi we Lasea.
9 Habya ihabirilaba mughulu muli, kandi oko mughulu oyo habya ehatari erilaba omo ngetse, nibya amafungo w’ekiro ky’Erihanula abya iniabirihwa. Neryo Paulo mwabahana
10 ati: “Balume, namalangira olughendo luno lukendikala. Tukendiherya ebindu bingyi. Twanganaherya emizigo, obwato, nibya n’engebe yetu.*
11 Aliwe, omukulu w’abasuda mwahulikirira oyukaghendaya obwato n’omwinye-bwato omo mwanya w’erihulikirira Paulo.
12 Neryo kundi ahakimana amato habya isihatolere erilabiryaho omughulu w’embeho nene, abandu bangyi mubabugha bati tulueho, mubatubwira bati tulebaye nga twanganayikasa erihika e Feniksi iyo twayalabirya omughulu w’embeho nene. E Feniksi ni mwanya owali e Krete owakimanamo amato. Abandu banganahikaho bakasira omo kiharo ekiri omo kati-kati k’eyo eryuba rikasira n’eluhande lw’endata. Kandi abandu banganahikayo bakasira omo kiharo ekiri omo kati-kati k’eyo eryuba rikasira n’eluhande lw’endina.
13 Omughulu ekihunga kinene ekikasira oko luhande lw’endina kyabuhirira bolo-bolo, mubalengekania bati alinga bakendihika eyo babya bakaghenda. Mubasumba enanga,* bamaghenda, bamalaba hakuhi ne Krete oko musike-sike.
14 Muhabya habilaba mughulu muke, ekihunga ekikalire ekikahulawamo Erakilo* mukyalaba omo Krete.
15 Neryo kundi ekihunga kinene mukyahamba obwato n’erileka ibwataghenda ndeke, mutwalekakyo, kyamatutwala.
16 Neryo mutwatibita, ekisanga* kike ekikahulawamo Kauda ikinemututeya oko kihunga kinene. Nomo byanabya bitya, mukyakala erisabula obwato buke* obwabya bubohere oko kihande ky’enyuma ky’obwato bunene.
17 Babere babisambirya obwato buke obo omo bwato bunene, mubaboha obwato bunene obo omo bikoba. Kundi babya bakasagha bati obwato bwanganatsutsangikira e Sirti,* mubabohola ebindu ebikaleka obwato ibwaghenda, neryo ekihunga kinene mukyatutwala.
18 Neryo kundi ekihunga kinene kyabya kikatwala obwato eyi n’eyi, ekiro ekikwamire, mutwalusyamo oko bindu butoke eringwahirira.
19 Ekiro ky’akasatu, mubaghusa ebindu ebikawatikaya obwato erighenda.
20 Kundi eryuba n’esyongununu byabya isibyetalangirika omo biro bingyi, kandi kundi ekihunga kinene kyabya ikyabiritukalako, amaha w’erisabuka mwalw’iniatuhwamo.
21 Kundi abosi ababya omo bwato babya ibamabibugha mughulu muli isibetalya, Paulo mwimana omo kati-kati n’eribugha ati: “Balume, mwangakwamire erihano ryaghe kumbe mututalua e Krete. Sitwangaghalirwe tutya, n’eriherya ebindu byosi ebi.”
22 Aliwe, ngabasaba niti simubunike mutima. Sihali n’omughuma w’okw’inye oyukendihola, obwato busa bo bukenditsutsangika.
23 Omo kiro, omumalaika w’oMungu waghe, oMungu oyo ngakolera omubiiri mubuyirire, mwakimana hakuhi naghe.
24 Mwakanibwira ati: ‘Paulo, isiwasagha. Ukenditonda embere sya Kaisari, n’oMungu akendikusabula haghuma n’abosi abo uli nabo.’
25 Neryo balume, simusaghe, kundi nikirirye oMungu, ebyosi bikendibya ngoko analyabugha.
26 Aliwe, obwato bukenditsutsangika oko kisanga* kilebe.”
27 Mutwabugha ebiro 14, omo kiro n’omwitungyi, itunemuhekwa-hekwa eyi n’eyi omo Ngetse ye Adria. Neryo oko medi y’ekiro, abakakola emibiiri y’omo bwato mubatsuka erilengekania ambu alinga tukasonda erihika hakuhi n’ekitaka.
28 Mubakimya ekindu ekikapima obuli bw’amaghetse, bamasungaho esyometre hakuhi 36.* Neryo mubatasyaseghera hake, bamatasyatogheryamo ekindu ekikapima obuli bw’amaghetse, bamasungaho esyometre hakuhi 27.*
29 Kandi kundi babya ibanemusagha bati obwato bwanganahatira omo mabwe manene-manene,* mubimya esyonanga* ini esyabya oko kihande ky’enyuma ky’obwato, bamatogheryasyo omo maghetse. Babya banzire ibwakya luba.
30 Aliwe, omughulu abakakola emibiiri y’omo bwato basonda erilua omo bwato, kandi omughulu babya bakakimirya obwato buke b’omo ngetse bakabugha bati alinga bakendikolesyabo erikimya esyonanga* esiri oko kihande ky’embere eky’obwato,
31 Paulo mwabwira omukulu w’abasuda n’abasuda ati: “Abalume aba batitasighala omo bwato, simwangasabuka.”
32 Neryo abasuda mubatwa ebikoba ebyabya bibohire obwato buke, neryo mubwatoghera omo ngetse.
33 Bwabere bukasonda erikya, Paulo mwahana abosi ati balye. Mwababwira ati: “Munabwire mwamabibugha ebiro 14 imunemulinda n’erihangya-hangya, kandi butsir’irya.
34 Neryo batahi mulye, ekyo kikendibawatikya. Sihali n’omundu n’omughuma oyukendiherya oluywiri n’olughuma lw’oko mutwe wiwe.”
35 Abere abibugha atya, mwimya omukati, amasima oMungu embere sy’abosi, amatwagho, n’eritsuka erirya.
36 Neryo emitima y’abosi muyasika, nabo bamatsuka erirya.
37 Twabya omo bwato mo bandu* 276.
38 Babere babyughuta, bamangwahirirya obwato omw’ighusa engano y’omo ngetse.
39 Bwabere bwabikya, mubalangira ekitaka, aliwe isibasi nga ni hayi. Mubalangira aho engetse yingirire omo kitaka kandi ahali omutsanga. Neryo mubasonda eritwalaho obwato, kyamatokekana.
40 Neryo mubatwa ebikoba by’esyonanga* n’eritogherya esyonanga sy’omo ngetse. Mubaleya-leya ebikoba ebyabya bibohire esyongahya.* Babere babisambirya ebitambara ebikabya oko bwato by’endata erihunga ritoke eribuhirira kubyo, mubalolera oko musike-sike w’engetse.*
41 Babere babiyihuma oko mutsanga munene, owabya akahumwa n’amaghetse w’engetse awabya akasira oko syombande ibiri. Ekihande ky’embere ky’obwato mukyahatira, kyamalw’ikyasighala aho. Aliwe, ekihande ky’enyuma ky’obwato kyamatsutsangika busana n’ebisunda.
42 Neryo abasuda mubayisogha eriita abandu b’omuliki hakasyabya oyukatswa kundi asi erighenda omo maghetse.
43 Aliwe, omukulu w’abasuda abya anzire iniabalya Paulo, neryo mwabakakirya erikola ekyo bayisogha. Mwabugha ati abasi erighenda omo maghetse bayighuse omo ngetse n’eribya b’erimbere erihika oko musike w’engetse.
44 N’abandi mubakwamabo, abaghuma mubaghenda ibanahambirire oko syombagho n’abandi oko bihande by’obwato. Neryo abosi mubahika oko kitaka ibane ndeke.
Amaelezo awehikwa
^ Kutse “emyanya eyo mato akimanamo, esyoporo.”
^ Kutse “Eporo Eyuwene.”
^ Kutse “esyonafsi syetu.”
^ Ni kindu ekilitohire ekikokotibwe omo muti kutse omo kyuma, ekikaghusawa omo maghetse obwato butoke erimana haghumerera.
^ Ni bugha ambu, ekihunga kinene ekikasira omo kiharo ekiri omo kati-kati k’oluhande lw’eyo ryuba rikasira n’oluhande lw’endata.
^ Kutse “île.”
^ Obwato buke bwabya bukawatikya erisabula abandu bamasonda erisenda.
^ Ulebaye amaana w’ebinywa.
^ Kutse “île.”
^ Kutse “esyobrase 20.” Ulebaye endomeko B14.
^ Kutse “esyobrase 15.” Ulebaye endomeko B14.
^ Kutse “amatendere.”
^ Ni kindu ekilitohire ekikokotibwe omo muti kutse omo kyuma, ekikaghusawa omo maghetse obwato butoke erimana haghumerera.
^ Ni kindu ekilitohire ekikokotibwe omo muti kutse omo kyuma, ekikaghusawa omo maghetse obwato butoke erimana haghumerera.
^ Kutse “mw’esyonafsi.”
^ Ni kindu ekilitohire ekikokotibwe omo muti kutse omo kyuma, ekikaghusawa omo maghetse obwato butoke erimana haghumerera.
^ Engahya ni kindu ekiri ng’omuko ekyo bakaghendayamo obwato.
^ Kutse “plaje.”
