Emibiiri y’Abakwenda 28:1-31
28 Twabere twabihika ndeke oko kitaka, mubatubwira ambu ekisanga* ekyo kikahulawamo Malta.
2 Abandu b’eyo mubatukolera ebyuwene. Mubatwakirya omuliro n’eritukokya ndeke itwe bosi, kundi embula yabya yikawa kandi habya embeho.
3 Paulo mwayasenya esyongwe. Neryo abere akasonda erihirasyo oko muliro, enzoka muyalua musyo busana n’ekihuhania, n’eriyilingira-lingira oko byala biwe.
4 Abandu b’eyo babere babilangira enzoka eyirimo esumu iyinemulelemba oko byala bya Paulo, mubatsuka eribwirana bati: “Kwenene omundu oyu ni mwiti, nomo anamabala oko lw’engetse, Eritunganene* siryanzire akabyaho.”
5 Aliwe, mwakunguta ebyala biwe atoke eritogherya enzoka eyo y’omo muliro, neryo mwatahutala.
6 Ibo babya bakalengekania bati alinga omubiri wiwe akendibimba neryo inialw’inialeghetsana n’erihola. Babere babilinda omo mughulu muli n’erilangira ngoko syatakwa kindu, mubabindula amalengekania wabo, bamatsuka eribugha bati iye ni mungu.
7 Hakuhi n’aho habya ebitaka by’omulume mughuma oyusikibwe omo kisanga* ekyo, oyukahulawamo Publio. Omulume oyo mwatukokya ndeke omo biro bisatu.
8 Nikwa baba wa Publio abya omo ngyingo kundi omubiri wiwe abya iniahuhene, kandi abya iniakwire obukoni bw’erihara omusasi. Paulo mwayamubana, amasaba, amamuhirako ebyala, neryo mwamulamya.
9 Enyuma sy’aho, abandi bakalani b’omo kisanga* ekyo ababya balwere mubatsuka eryasa eyiri Paulo atoke erilamyabo.
10 Nabo mubatusikya omw’ituha ebihembo bingyi. Omughulu twatsukalo, mubatuha ebyosi ebyo tulaghireko.
11 Twabere twabibugha emisi isatu omo kisanga* ekyo, mutwasambira omo bwato. Embere, oko bwato obo, kwabya esanamu “y’Abaghala ba Zeu.” Obwato obo bwabya bukalua e Aleksandria, kandi mubwalabya omughulu w’embeho nene omo kisanga* ekyo.
12 Mutwimana e Sirakuse, twamabughayo ebiro bisatu.
13 Mutwalwa aho, twamayahika e Regio. Ekiro ekikwamire, muhabya erihunga erikasira oko luhande lw’endina. Habere habilaba ebiro bibiri, mutwahika e Puteoli.
14 Abaghala betu abo tweghayayo mubatuhatikana bati tusighale nabo omo biro irinda (7), n’enyuma sy’aho twamaya e Roma.
15 Abaghala betu be Roma babere babyowa ngoko tunemwasa, mubasyatubana ahali Esoko ye Apio n’ahali Esyorestora Isatu. Paulo abere alangira ngoko banemwasa, mwasima oMungu n’omutima wiwe mwasika.
16 Twabere twabulikira twahika e Roma, Paulo mwalighirwa erikala omo nyumba yiwe iyuwene, aliwe mwabya akateyibwa n’omusuda.
17 Habere habilaba ebiro bisatu, mwabirikira Abayahudi ababya basikibwe. Babere babihindana, mwababwira ati: “Balume, baghala betu, mundakosera abandu kandi mundaghana erikwama easili y’abotata-kulu wetu. Aliwe, mubaniboha e Yerusalema n’erinihira omo byala by’Abanya Roma.
18 Babere babinitondesya, mubasonda erinibohola, kundi mubatasunga ekyangaleka inakwa.
19 Aliwe, kundi Abayahudi mubaghana bati isinaboholawa, munalangira ikyuwene eritwala olubanza lwaghe eyiri Kaisari. Aliwe, si bugha ambu nabya ngasonda erisitaka Abayahudi nga ngye.
20 Ekyo kyo kiryaleka inanza eribalolako nitoke erikania nenyu, kundi amaha agho Baisraeli bali nagho w’akaleka inabyako eminyororo eno.”
21 Mubamubwira bati: “Sitwetasunga n’ebaruha n’enguma eyikabugha omwatsi wosi-wosi okw’iwe eyikalua e Yudea. Kandi sihali n’omughala wetu n’omughuma oyo waluayo, oyo wasyatubwira kutse erikania omwatsi mubi okw’iwe.
22 Aliwe, kyanganuwana iwuwene-wene iwatubwira amalengekania waghu, kundi tunasi ngoko ehosi-hosi bakabugha muhanda oko kasomo aka.”
23 Neryo mubapanga ekiro ky’eritasyasunganamo, kandi mubasa banene aho Paulo abya apangire. Eritsuka omo tututu erihika omw’igholo, mwabakanirya emyatsi ngoko yiri. Mwabakangania ndeke-ndeke emyatsi eyilebirye Obwami bw’oMungu n’eribawatikya erikirirya Yesu akakolesya Emighambo ya Musa n’ebyo Abaminyereri bahandika.
24 Abandu balebe mubikirirya emyatsi eyo abugha; aliwe abandi mubatikiriryayo.
25 Neryo kundi mubatahulikirirana, mubatsuka erighenda. Neryo Paulo mwabugha ati:
“Ekyo kyo kyaleka, erilabira omuminyereri Isaya, ekirimu kibuyirire ikyabugha n’abotata-kulu wenyu
26 kiti, ‘Ghenda eyiri abandu aba n’eribabwira uti: “Mukendisyowa, aliwe simwendisyaminya nga bikasonda eribugha bitiki. Mukendisyasamalira, aliwe simwendisyalangira n’ahake.
27 Kusangwa abandu aba babiribya n’emitima eyikalire, kandi amatwi wabo akowa aliwe sibalikola. Kandi babiriliba ameso wabo sibalangire omo meso wabo. Kandi babiriliba amatwi wabo sibowe omo matwi wabo n’eriminya omo mitima yabo nga bikasonda eribugha bitiki batoke eribinduka, naghe nitoke eribalamya.”’
28 Neryo muminye ngoko engulu y’omulamo eyikalua oko Mungu yabiritulughanibwa oko bandu b’ebihanda. Oko kwenene, bakendisyalighayo.”
29 * ——
30 Neryo mwabugha emyaka ibiri omo nyumba yiwe eyo abya akalihira. Iniakakokaya ndeke abosi ababya bakasyamubana.
31 Iniakabwirabo oko Bwami bw’oMungu n’erikangirirya n’obutubaha emyatsi eyilebirye Omukama Yesu Kristo, isihali ekyangamukakirya.
Amaelezo awehikwa
^ Kutse “e île.”
^ Omo Kigiriki ni Diʹke. Alinga kikamaanisaya omungu-mukali oyukasosekanaya eritunganene erikatuhulaya, kutse alinga kikamaanisaya omubere w’eritunganene.
^ Kutse “île.”
^ Kutse “île.”
^ Kutse “île.”
^ Kutse “île.”
^ Ulebaye endomeko A3.
