Emibiiri y’Abakwenda 3:1-26
3 Kiro kighuma, Petro na Yohana babya bakahetukira oko hekalu oko ndambi y’erisaba. Yabya hakuhi saa tisa y’eritungyi.*
2 Neryo abandu babya ibanahekire omulume oyo wabutawamo kirema. Obuli kiro ibakamuhira hakuhi n’omulango w’ehekalu owakahulawa mo Mulango Mubuya. Ibakamuhiraho atoke erisaba obuwatikya* oko bakingira omo hekalu.
3 Omughulu alangira Petro na Yohana bakasonda eringira omo hekalu, mwatsuka eribasaba obuwatikya.
4 Aliwe, Petro na Yohana mubamusamalira. Petro mwamubwira ati: “Utusamalire.”
5 Neryo mwasamalirabo akalengekania ati alinga banemwendimuha ekindu kilebe.
6 Aliwe, Petro mwamubwira ati: “Singwite oko feza* kutse oko horo. Aliwe, ngendikuha ekyo niri nakyo. Omo rina rya Yesu Kristo Munazareti, hangana!”
7 Neryo Petro mwamuhamba oko byala by’amali n’erimuhangania. Aho n’aho ebisando biwe n’ehikongulo hiwe mubyabyamo akaghala.
8 Mwatsuka erighenda inianemuyitsangura, amingira nabo omo hekalu. Abya akaghenda inianemuyitsangura n’eripipa oMungu.
9 Abandu bosi mubamulangira akaghenda n’eripipa oMungu.
10 Abandu mubamuminya, mubaminya ngoko y’omulume oyo wabya iniabeghere erikala oko Mulango Mubuya w’ehekalu akasaba obuwatikya. Kandi mubalw’ibahwerekerera n’erikukubala busana n’erilangira ngoko abirilama.
11 Omulume oyo abere iniakinamakirire Petro na Yohana, abandu bosi mubatibita eyo bali ahakahulawamo Ebaraza ya Solomona. Mubasweka kutsibu.
12 Omughulu Petro alangira omwatsi oyo, mwababwira ati: “Inywe bandu be Israeli, busanaki mukaswekera omwatsi oyu? Busanaki mwabiritutungerera? Mukalengekanaya muti omundu oyu alyatoka erighenda omo butoki bwetu kutse kundi tuli bataleghula oko* Mungu?
13 OMungu wa Abrahamu, wa Isaka, na Yakobo, oMungu w’abotata-kulu wetu abiriha Omughombe wiwe y’olukengerwa, ye Yesu, oyo mwahira omo byala by’abandu n’erimughana embere sya Pilato, nomo Pilato abya iniabiriyisogha erimubohola.
14 Oko kwenene, mumwaghana omubuyirire oyu kandi oyutunganene mwamabugha muti bababoholere omwiti,
15 aliwe mumwita Omusondoli Mukulu w’engebe. OMungu mwamulubukya, netu mutwayilangirira omwatsi oyo.
16 Omundu oyu, oyo mwamalangira kandi oyo mwasi, abiribya n’akaghala omo rina rya Yesu kandi kundi twikirirye erina rya Yesu. Obwikirirya obo tuli nabo omo Yesu bo bulyalamaya ndeke-ndeke omundu oyu embere syenyu inywe bosi.
17 Aliwe baghala betu, ninasi ngoko mwabya mukakola omo butaminya, ngoko abasondoli benyu nabo babya bakakola omo butaminya.
18 Nikwa omo nzira eyo, oMungu mwaberererya emyatsi eyo abugha kera erilabira abaminyereri bosi, ni bugha ambu, ati Kristo wiwe angaghalirwe.
19 “Neryo mubindule emitima yenyu, n’eriyisubako, amalolo wenyu atoke erisangulwa, neryo emighulu eyikatuleraya yilue oko Yehova,*
20 kandi atoke erituma Kristo oyo wasombolawa busana nenyu, ni bugha ambu, Yesu.
21 Yesu oyo, kyabya kitolere olubula ilwamubika erihika oko mughulu w’eritasyasubya emyatsi yosi mo mihya-mihya, omughulu ogho Mungu abugha erilabira abaminyereri biwe babuyirire ba kera.
22 Oko kwenene, Musa mwabugha ati: ‘Yehova* oMungu wenyu, akendisyasombola omuminyereri oyuli ngangye omo kati-kati k’abaghala benyu. Ritolere imwahulikirira ebyosi ebyo akendisyababwira.
23 Oko kwenene, obuli mundu* oyutendisyahulikirira omuminyereri oyo, akendisyatoghotibwa n’erilusibwa omo bandu.’
24 Kandi abaminyereri bosi eritsuka oko Samweli n’abosi abasa enyuma siwe, abosi ababugha, nabo mubakania ndeke-ndeke oko biro ebi.
25 Muli bana b’abaminyereri n’ab’endaghane eyo oMungu akola n’abotata-kulu wenyu, omughulu abwira Abrahamu ati: ‘Ebihanda byosi by’oko kihugho bikendisyatsumulwa erilabira olubuto lwaghu.’
26 OMungu mwabya abisombola omughombe wiwe, mwatsuka erimutuma okw’inywe atoke eribatsumula omw’iwatikya obuli mughuma w’okw’inywe erileka emyatsi mibi.”
Amaelezo awehikwa
^ Ni bugha ambu, hakuhi 15:00.
^ Kinywa kwa kinywa, “ebihembo by’erikwira omundu y’obulighe.”
^ Ni kindu ky’obughuli ekikalua omo kitaka.
^ Kutse kundi “tumakirire oMungu.”
^ Kinywa kwa kinywa, “oko busu bwa Yehova.” Ulebaye endomeko A5.
^ Ulebaye endomeko A5.
^ Kutse “nafsi.”
