Emibiiri y’Abakwenda 6:1-15
6 Nikwa oko mughulu oyo, omughulu emighanzo y’abigha yakanya, Abayahudi ababya bakabugha Ekigiriki mubatsuka eriyilungumula busana n’Abayahudi ababya bakabugha Ekiebrania, kundi abakwa-kali babo ibakasololawa omughulu w’erighaba akalyo k’obuli kiro.
2 Neryo abakwenda 12 mubahindania abigha bangyi n’eribabwira bati: “Sikyuwene okw’itwe erileka ekinywa ky’oMungu busana n’erighabira abandu b’akalyo oko syomesa.
3 Neryo baghala betu, musombole omo kati-kati kenyu mw’abalume irinda (7) abasibwe ko bali n’emibere eyuwene, aboswiremo ekirimu, n’abali n’amenge manene. Neryo tukendibaha omubiiri oyo ow’omughaso.
4 Aliwe itwe, tukendiyitsinga oko musabe n’oko mubiiri wetu w’erikangirirya ekinywa ky’oMungu.”
5 Ebyo babugha mubyatsemesya abandu bosi. Neryo mubasombola Stefano, omulume w’obwikirirya bunene kandi oyuswiremo ekirimu kibuyirire. Kutya, mubasombola Filipo, Prokoro, Nikanori, Timoni, Parmena, na Nikola, omundu we Antiokia, oyo wabindukira omo Kiyahudi.
6 Mubatwala abalume abo embere sy’abakwenda. Neryo abakwenda babere babisaba, mubahira kubo kw’ebyala.
7 Neryo ekinywa ky’oMungu mukyahika oko bandu banene kutsibu n’emighanzo y’abigha yabya yikakanya kutsibu omo Yerusalema, n’abahereri bangyi mubikirirya.
8 Nikwa Stefano, oyo oMungu abya iniabirikangania olukogho lunene, n’erimuha obutoki bunene, abya akakola emyatsi minene eyikaswekaya n’ebitiko-tiko omo kati-kati k’abandu.
9 Abalume b’esinagogi,* eyikahulawamo Sinagogi y’Abandu Abali Bwiranda, mubasa haghuma n’Abanya Kirene, n’Abanya Aleksandria, n’abandu be Kilkia ne Azia, busana n’erikuba obuhaka na Stefano.
10 Aliwe, mubatatoka erisinga Stefano, kundi abya akabugha n’amenge kandi abya akawatikibwa n’ekirimu kibuyirire.
11 Neryo mubatsuka eribwira abandu omo bubiso-biso ambu babughe bati: “Mutukowa omundu oyu akatsuma Musa n’oMungu.”
12 Neryo mubaleka abandu, abasyakulu, n’abahandiki ibahitana. Neryo mubamuhikako kitsumbukirania, bamamuhamba kinyamaka n’erimutwala oko Sanhedrini.*
13 Kandi mubaleta abimiri* b’amabehi. Abimiri abo mubabugha bati: “Omulume oyu akabya inianemubugha muhanda oko habuyirire n’oko Mighambo.
14 Eky’erileberyako, mutwowa akabugha ati Yesu Munazareti akendisyasambula hano n’eribindula ebyo Musa atukangiriraya.”
15 Neryo omughulu abosi ababya bikere omo Sanhedrini bamutungerera, mubalangira obusu bwiwe ibwabiribya ng’obusu bw’omumalaika.
