Emibiiri y’Abakwenda 9:1-43
9 Aliwe Saulo, abya iniaponire kutsibu abigha b’Omukama kandi abya inianzire eriitabo. Neryo mwayasungana n’omuhereri mukulu.
2 Mwamusaba esyobaruha sy’erikangania esyosinagogi* sye Damasko atoke eriyaboha abalume n’abakali bosi abo akendyeyayo, abakakwama Enzira, n’eriletabo e Yerusalema.
3 Omughulu abya iniane omo lughendo, akasonda erihika hakuhi ne Damasko, ekyakakala ekikalua elubula mukyalw’ikyakolerya aho abya.
4 Mwawa ahisi, neryo amowa omulenge akamubirikira ati: “Saulo, Saulo, busanaki ukaniaghalaya?”
5 Saulo mwabulya ati: “Ulindi kwe Mukama?” Naye mwamusubirya ati: “Niri Yesu, oyo ukaghalaya.
6 Hangana, wingire omo muyi. Bakendikubwira ekyo utolere iwakola.”
7 Abalume ababya omo lughendo haghuma naye mubasighala bukutu. Babya ibanowire omulenge, aliwe isibalangire omundu.
8 Neryo Saulo mwahangana. Nomo ameso wiwe abya inianakingulire, abya isyangalangira kindu. Neryo mubamuhamba oko byala, bamamutwala e Damasko.
9 Muhahwa ebiro bisatu isyalyatalangira kindu, kandi isyalyatalya kutse erinywa.
10 E Damasko, yabya omwigha oyukahulawamo Anania. Omukama mwamubwira omo nzoli ati: “Anania!” Neryo Anania mwasubirya ati: “Mukama, ingye yono.”
11 Omukama mwamubwira ati: “Hangana, ughende omo nzira Eyilungukere, ughende ewa Yuda, neryo ubabwire uti wanzire iwasungana n’omulume oyukahulawamo Saulo owe Tarso, kundi anemusaba,
12 kandi mwakalangira omo nzoli omulume oyukahulawamo Anania akasa n’erimuhirako ebyala atoke eritasyalangira.”
13 Aliwe, Anania mwabugha ati: “Mukama, nabiryowa abandu bangyi bakabugha oko mulume oyo, bakabugha n’oko bitsibu ebyo abirikolera ababuyirire e Yerusalema.
14 Kandi abahereri bakulu babirimuhamulira erihamba abosi abali hano abakabirikira erina ryaghu.”
15 Aliwe, Omukama mwamubwira ati: “Ghenda, kundi omundu oyu ni kindu ekyo nabirisombola atoke eriminyisya erina ryaghe oko bandu b’ebihanda n’oko bami n’oko bana be Israeli.
16 Ngendimukangania ndeke-ndeke amaligho wosi awakendilabamo busana n’erina ryaghe.”
17 Neryo Anania mwaghenda. Mwabya abingira omo nyumba eyo Saulo abyamo, mwamuhirako ebyala n’eribugha ati: “Saulo, mughala wetu, Omukama Yesu, oyo wakuhulukira omo nzira eyo ulyasiramo mwakanituma nitoke erikuwatikya eritasyalangira, kandi utoke eryusulamo ekirimu kibuyirire.”
18 Aho n’aho, ebindu ebiri ng’ebikora mubyatoghonga omo meso wiwe, neryo amatasyalangira. Neryo mwahangana, amabatisibwa.
19 N’enyuma sy’aho, mwalya, amatasyabana akaghala.
Mwabugha biro bilebe n’abigha ababya e Demasko.
20 Mwalw’iniatsuka erihubirya omo syosinagogi* mw’emyatsi eyilebirye Yesu, akababwira ngoko Yesu ni Mughala w’oMungu.
21 Aliwe, abosi ababya bakowa ebyo akabugha mubasweka n’eribugha bati: “Tahie, oyu s’iyo mulume oyo wabya akaghalya kutsibu abosi ababya bakabirikira erina eryo e Yerusalema? K’alinga mwahika eno busana n’erisyabahamba n’eribatwala* oko bahereri bakulu, ko bite bitya?”
22 Aliwe, Saulo abya akabana akaghala kiro kwa kiro kandi abya akaswekya Abayahudi ababya e Damasko omughulu abya akabakangania ndeke-ndeke ngoko Yesu yo Kristo.
23 Aliwe, habere habilaba ebiro bingyi, Abayahudi mubakola embita y’erimwita.
24 Aliwe, Saulo mwowa oko mbita eyo. Abayahudi abo babya bakateya kutsibu emilango y’omuyi, omo kiro n’omwitungyi, batoke erimwita.
25 Neryo omo kiro, abigha biwe mubamuhira omo kitiri, bamamulabya omo kitobo ky’oko luhimbo, n’erimukimya.
26 Mwabya abihika e Yerusalema, mwayikasa eriyighunga oko bigha, aliwe abosi mubamusagha, kundi isibetaligha ngoko abiribya mwigha.
27 Neryo Barnaba mwamuwatikya, amamutwala eyiri abakwenda, n’eribakanirya ndeke-ndeke ngoko omughulu Saulo abya omo lughendo, mwalangira Omukama, kandi ngoko Omukama mwakania naye, kandi ngoko omughulu Saulo abya e Damasko mwakanirya abandu n’obutubaha oko rina rya Yesu.
28 Neryo Saulo mwasighala nabo. Mwabya akalendera iniane bwiranda omo Yerusalema, inianemubwira abandu n’obutubaha oko rina ry’Omukama.
29 Abya akakania n’erikuba obuhaka n’Abayahudi ababya bakabugha Ekigiriki. Aliwe, Abayahudi abo mubasonda erimwita.
30 Abaghala babo babere baminya omwatsi oyo, mubamutwala e Kaisaria, n’erimulabirya e Tarso.
31 Neryo endeko omo Yudea yosi, e Galilaya yosi, ne Samaria yosi, muyabya omo katambi k’obuholo, kandi muyasika. Kundi babya ibasaghire Yehova* kandi ibakakiranibawa n’ekirimu kibuyirire, abigha mubakanyirira buli kiro.
32 Omughulu Petro alaba omo kiharo kyosi ekyo, mwandaghalira n’eyiri ababuyirire ababya e Lida.
33 Yabya omulume oyukahulawamo Ainea. Habya ihamabihwa emyaka munani iniakabya inianaghotsere oko ngyingo kundi abyako ebitsuko ebibasire.
34 Petro mwamubwira ati: “Ainea, Yesu Kristo akakulamaya. Hangana, usese engyinyo yaghu.” Neryo mwalw’iniahangana.
35 Omughulu abandu bosi be Lida ne Saroni bamulangira, mubakwama Omukama.
36 E Yopa, yabya omwigha oyukahulawamo Tabita. Omo Kigiriki, ni “Dorika.”* Abya iniakakola emyatsi mingyi eyuwene kandi iniakawatikaya abera.*
37 Aliwe oko biro ebyo, mwalwala, amahola. Neryo mubamunabya n’eriyamuhira omo kyumba ky’endata.
38 Neryo kundi e Lida yabya hakuhi ne Yopa, abigha babere babyowa ngoko Petro ane omo muyi we Lida, mubatumayo abalume babiri bayamulembe-lembe bati: “Kisi, wase luba.”
39 Neryo Petro mwaghenda nabo. Mwabya abihikayo, mubamutwala omo kyumba ky’endata. Abakwa-kali bosi mubaseghera hakuhi naye ibanemulira n’erikangania Petro y’esyongyimba n’esyokanzu nyingyi esyo Dorika akokotaya isyalyahola.
40 Neryo Petro mwalusya abosi b’omo nyumba, amakukama, amasaba, neryo amabindukira omubiri wa Tabita n’eribugha ati: “Tabita, hangana!” Neryo Tabita mwakingula ameso, amalangira Petro, neryo amahangana.
41 Neryo Petro mwamuhamba oko byala, amamuhangania. Abere abimuhangania, amabirikira ababuyirire n’abakwa-kali, amabakangania Tabita iniabirisuba.
42 Abandu bosi be Yopa mubowa omwatsi, n’abangyi mubikirirya Omukama.
43 Petro mwabugha e Yopa yo biro bilebe. Abya ikere ewa Simoni, oyo wabya akakokotya esyongobi.*
Amaelezo awehikwa
^ Kutse “amanyumba w’eriramiryamo.”
^ Kutse “amanyumba w’eriramiryamo.”
^ Kinywa kwa kinywa, “n’eribatwala ibanabohire.”
^ Ulebaye endomeko A5.
^ Erina ry’Ekigiriki Dorika n’ery’Ekiaramu Tabita rikamaanisaya “Eswala.”
^ Kutse “iniakaha abandi b’ebihembo busana n’eribakwira obulighe.”
^ Kutse “mubambi w’esyongobi.”
