Ebaruha oko Abaebrania 1:1-14
1 Kera oMungu mwabugha n’abo tata-kulu wetu erilabira abaminyereri. Mwabugha nabo ngendo nyingyi kandi omo syonzira nyingyi.
2 Aliwe omo biro bino by’enduli, abiribugha netu erilabira Mughala wiwe. Abiriha Mughala wiwe y’ebindu* byosi. Kandi erilabira Mughala wiwe, oMungu mwahiraho emighulu.*
3 Omughala akakanganaya olukengerwa lw’oMungu. Asosire oMungu yo ndeke-ndeke. Kandi akahambirira ebindu byosi omo kinywa ky’amaka wiwe. Kandi abere abitweryako amalolo wetu, mwikala oko luhande lw’amali lw’oMungu Mukulu, oyuli endata.
4 Neryo mwabya mukulu kulenga abamalaika, kundi mwahabwa erina eryuwene kutsibu kulenga ery’abamalaika.
5 Muterilengekania, ni mumalaika ndi oyo Mungu abiribwira ati: “Uli mughala waghe; naghe munabwire namabya Tata waghu?” Kutse kandi: “Ngendisyabya Tata wiwe, naye akendisyabya mughala waghe?”
6 Aliwe, omughulu akatasyaleta Akambere kiwe oko kihugho, akabugha ati: “Abamalaika bosi b’oMungu bamukukamire.”
7 Kandi akabugha oko b’amalaika ati: “Akayira abamalaika biwe mo balimu, n’abaghombe* biwe akabayiramo kirimi ky’omuliro.
8 Aliwe oko Mughala wiwe, akabugha ati: “OMungu ni kitumbi kyaghu ky’obwami kera na kera. Ebakora* y’Obwami bwaghu ni bakora y’eritunganene.
9 Muwanza eritunganene n’eripona obubi. Kyo kyaleka oMungu, oMungu waghu, iniakuhirako amaghuta w’obutseme kulenga abalikyenyu.”
10 Kandi: “Oko mwanzo, Mukama, muwahiraho esyofondasyo sy’ekihugho, kandi muwahangyika olubula omo byala byaghu.
11 Lukendisyahwaho, aliwe iwe ukendisyabyaho kera na kera. Ngoko olukimba lukakula, olubula nalo lukendisyakula.
12 Kandi ukendisyalingalo ng’erikoti, ng’olukimba, neryo lukendisyalusibwaho ihaya oluhya-luhya. Aliwe iwe, uli ngoko ukanabya, n’emyaka yaghu siyendisyahwa n’ahake.”
13 Nikwa ni mumalaika ndi oyo oMungu abiribwira ati: “Wikale oko luhande lwaghe lw’amali, erihika omughulu ngendisyayira esyonzighu syaghu mo kitumbi ky’ebisando byaghu”?
14 Simwasi ngoko abosi ni balimu abakakola omubiiri mubuyirire,* abakatumawa busana n’erikolera abakasyasabulwa?
Amaelezo awehikwa
^ Kutse “Abirimuyiramo oyukendisyasighalya ebindu.”
^ Ulebaye amaana w’ebinywa.
^ Kutse “abaghombe biwe abakakolera abandi.”
^ Kutse “Efimbo, Omutso.”
^ Kutse “omubiiri w’eriwatikya abandi.”
