Ebaruha oko Abaebrania 10:1-39
-
Amahere w’esyonyama mwatatoka eribugha amalolo w’abandu (1-4)
-
Emighambo yabya kitsutsu (1)
-
-
Kristo mwayiherera kaghuma kasa (5-18)
-
Enzira nyihya-nyihya kandi eyiriho y’eritutwala oko ngebe (19-25)
-
“Isitwaleka eribya tukahindana” (24, 25)
-
-
Isitwakola erilolo omwiyiririra (26-31)
-
Eriyiketera oMungu n’erimwikirirya bikatuwatikaya eriyiyinia (32-39)
10 Kundi Emighambo ni kitsutsu ky’emyatsi eyuwene eyangasire, aliwe oko kwenene si y’emyatsi eyo eyuwene, siyangawatikya n’ahake abakaramaya oMungu erihika-hikana erilabira amahere awabya akahererwa obuli mwaka.
2 Amahere ayo ng’awatikayabo erihika-hikana, sikyangabere ky’omughaso eritasyabya tukaherera amahere. Kundi abakakola omubiiri mubuyirire bangabere ibabiryeribwa kaghuma olosi, kandi obunya-mutima* bwabo sibwangabere bukabibukya amalolo wabo.
3 Obuli mwaka, amahere ayo iniakibukaya abandu ngoko bakakola amalolo,
4 kundi omusasi w’esyonume sy’esyonde n’ow’esyombene syangatoka eribughaho amalolo.
5 Neryo omughulu akasa oko kihugho, akabugha ati: “‘Mughutanza obuhere kutse ekihembo, aliwe muwaniteghekanirya omubiri.
6 Mughutaligha amahere w’eryokererya n’amahere w’erilolo.’
7 Neryo munabugha niti: ‘Mungu waghe, ngasa (omo kitabu ky’erilinga mubahandikamo busana naghe) busana n’erikola erisonda ryaghu.’”
8 Mwatsuka eribugha ati: “Mughutanza kutse eriligha amahere n’ebihembo, amahere w’eryokererya n’amahere w’erilolo, amahere awabya akahererwa erikwamana n’Emighambo,
9 neryo mwatasyabugha ati: “Ngasa busana n’erikola erisonda ryaghu.” Mwalusyaho eky’erimbere atoke erihiraho eky’akabiri.”
10 Erilabira erisonda eri, twabiryeribwa erilabira obuhere bw’omubiri wa Yesu Kristo, owahererawa kaghuma kasa.
11 Kandi, obuli muhereri akabya omo mwanya wiwe obuli kiro akakola omubiiri mubuyirire, n’eriherera amahere maghumerera kangyi-kangyi. Amahere ayo syangabughaho amalolo wo ndeke-ndeke.
12 Aliwe, omundu oyu mwaherera obuhere bo kaghuma kasa busana n’amalolo, neryo mwikala oko luhande lw’amali lw’oMungu.
13 Eritsuka aho, anemulinda erihika omughulu esyonzighu siwe sikendisyayirwamo ekitumbi ky’ebisando biwe.
14 Kundi erilabira obuhere obwaherera, abiriwatikya abanemweribwa babye bandu abahika-hikene mughulu wosi.
15 Kandi ekirimu kibuyirire nakyo kikatukanganaya ngoko ni kwenene, kundi kikatsuka eribugha kiti:
16 “‘Eno y’endaghane eyo ngendisyakola nabo enyuma sy’ebiro ebyo,’ Yehova* atya. ‘Ngendisyahira emighambo yaghe omo mitima yabo n’erihandikayo omo bwenge bwabo.’”
17 Kandi kikabugha kiti: “Sinendisyasyibuka amalolo wabo n’ebibi byabo.”
18 Kundi ahali obughanyiri bw’ebyosi ebyo, sihangatasyabya obuhere bw’erilolo.
19 Neryo baghala betu, kundi situkisagha eringira ahabuyirire busana n’omusasi wa Yesu,
20 erilabira enzira nyihya-nyihya eyo abiritukingulira n’eyikatwala oko ngebe, eyatukingulira erilabira erido, ni bugha ambu, omubiri wiwe,
21 kandi kundi tuwite omuhereri mukulu oyukimanira enyumba y’oMungu,
22 tuseghere hakuhi n’oMungu n’omutima wetu wosi kandi butsir’itika-tika. Tukole tutya n’omutima owabiryeribwa n’obunya-mutima* obuwene n’omubiri awabiryeribwa omo maghetse awerire.
23 Isitwaleka eribya tukabwira abandi amaha wetu, kundi oyo watulagha ni mutaleghula.
24 Kandi obuli mundu abye akatsomana oghundi, kandi tubye tukawatikania* eribya n’olwanzo n’erikola ebyuwene.
25 Isitwaleka eribya tukahindana, ngoko abandi babeghere erikola, aliwe tubye tukasikania mutima, kundi ngoko munalangire ekiro kinemuseghera hakuhi.
26 Kundi twamabeghera erikola erilolo omwiyiririra itwabiriminya ekwenene, sihakiri obundi buhere bw’amalolo.
27 Aliwe, ekitulindire ry’eritswera erikalire n’erihitana erikalire erikendisyatsandya esyonzighu sy’oMungu.
28 Oyukabula erisikya Emighambo ya Musa akitibawa butsir’imukwira obulighe, abimiri* babiri kutse basatu babikangania ngoko mwakakola atya.
29 Simulangire ngoko omundu oyukalyatangira Omughala w’oMungu n’eripokya omusasi w’erilaghana owamweraya n’eritsweba ekirimu ky’olukogho atolere erihabwa amalipizi awakalire kwilabaho?
30 Kundi tunasi oyo wabugha ati: “Erituhulya ni ryaghe, n’ingye ngendisyalihabo.” Kandi: “Yehova* akendisyatswera abandu biwe.”
31 Kikita obuba erihabwa amalipizi n’oMungu oyuliho.
32 Neryo mubye mukibuka ngoko kera, mwabere mwabilangira ekyakakala, mumwayiyinia omo myatsi mingyi imunemwaghalwa.
33 Ihakanabya omughulu imwatsambwa n’eryaghalibwa embere sy’abandu,* kutse imwaghalwa* n’abanemwaghalwa.
34 Mumwakwira obulighe ababya babohirwe, n’eriligha n’obutseme erisaghulwa ebindu byenyu, kundi imunasi ngoko muwite ekindu ekyuwene kutsibu n’ekitendisyahwa.
35 Neryo isimwaleka eribya n’omutima w’obutubaha. Akendisyahembwa kutsibu.
36 Kundi ritolere imwayiyinia. Neryo mukendisyabya mwabikola erisonda ry’oMungu, imwabana eby’oMungu alagha.
37 Kundi “hakisiya hake,” kandi “oyukasa akendihika, syenditselewa.”
38 “Omutunganene waghe akendisyabyaho busana n’obwikirirya bwiwe.” Kandi “amabisuba enyuma, sinangamutsemera.”
39 Kundi itwe situli abandu abakasuba enyuma n’eriheribwa, aliwe tuli abandu abikirirye tutoke erisabulwa.
Amaelezo awehikwa
^ Kutse “ezamiri.”
^ Ulebaye endomeko A5.
^ Kutse “n’ezamiri.”
^ Kutse “tukahira omo bandi m’omuhwa.”
^ Kutse “abatemwe.”
^ Ulebaye endomeko A5.
^ Kinywa kwa kinywa, “imwakanganibwa ng’abandu abali ah’erisatira eteatre.”
^ Kutse “mumwimana hakuhi.”
