Ebaruha oko Abaebrania 11:1-40
11 Erikirirya ni ligha butsir’itika-tika ngoko emyatsi eyo tukahiramo amaha yikendisyabya, kandi erikirirya n’ibya n’emyatsi eyikakanganganaya ndeke-ndeke ngoko ebindu ebyo tutelangira bine.
2 Kundi abandu ba kera* babya n’obwikirirya obuli ng’obo, oMungu mwakangania ngoko alighirebo.
3 Erikirirya rikaleka itwaminya ngoko emighulu* yatondekawa erilabira ekinywa ky’oMungu, neryo emyatsi eyo tukalangira muyalua omo myatsi eyo tutelangira.
4 Busana n’erikirirya, Abeli mwaherera oMungu y’obuhere obwabya n’obughuli bunene kulenga obwa Kaini. Neryo busana n’erikirirya eryo, oMungu mwakangania ngoko Abeli abya atunganene kundi mwaligha ebihembo biwe. Nomo abirihola, akinabugha erilabira obwikirirya bwiwe.
5 Busana n’erikirirya, Enoka mwatwalwa ehandi akasyahola. Kandi mwatasungika ehosi-hosi kundi oMungu abya iniabirimutwala ehandi. Embere atwalawe ehandi, oMungu mwakangania ngoko Enoka abirimutsemesya.
6 Kandi omundu amabya isikirirye, syangatoka eritsemesya oMungu. Kundi oyo wanzire eriramya oMungu atolere inikirirya ngoko oMungu ane, kandi ngoko akahemba abakamusonda-sonda n’omutima wosi.
7 Busana n’erikirirya, Noa mwakangania ngoko akengire oMungu omughulu oMungu amubwira emyatsi eyabya isiyiriyatalolwako. Kandi mwahimba esafina atoke erisabula ekihanda kiwe. Kandi busana* n’erikirirya eryo, mwatswera ekihugho kandi mwaghanzwamo mutunganene busana n’obwikirirya bwiwe.
8 Busana n’erikirirya, Abrahamu mwowa omughulu oMungu amubwira ati aghende. Neryo mwaghenda omo kihugho ekyo bangamuhere mo mwandu. Mwaghenda nomo anabya isyasi eyo akaya.
9 Busana n’erikirirya, Abrahamu mwabya mugheni omo kihugho ekyo Mungu alagha erimuha, mwabya mukyo ng’omugheni. Mwikala omo mahema haghuma na Isaka na Yakobo. Nabo, oMungu mwalaghabo eribaha ekihugho ekyo.
10 Kundi abya akalindirira omuyi owali n’esyofondasyo sy’ekwenene. Omuhimbi n’oyo watsukisaya omuyi oyo ni Mungu.
11 Busana n’erikirirya, Sara naye mwabana obutoki bw’eriheka obukule, nomo anabya inabirilaba omo myaka y’eributa, kundi abya asi ngoko oyo wamulagha ni mutaleghula.*
12 Neryo omundu mughuma oyo wabya iniakalengekanaya ati syangatasyabuta, mwabuta abana, abana bangyi ng’esyongununu sy’elubula, kandi abana obutaghanzika ng’omutsanga w’oko musike w’engetse.
13 Abosi abo mubahola ibanikirirye, nomo batalangira emyatsi eyo oMungu abalagha ikabererera. Aliwe, mubalangirirayo ehali n’eryangirirayo. Kandi mubakangania abandu ngoko ibo ni bagheni, abakalani b’ebiro bike omo kihugho ekyo.
14 Abakabugha batya bakakanganaya ndeke-ndeke ngoko bakasondaya ekihugho kyabo.
15 Ngababya bakibuka ekihugho ekyo baluamo, bangasubire mukyo.
16 Nikwa lino bakasonda ekihugho ekyuwene okw’aho, eky’elubula. Ekyo kyo kikaleka oMungu iniatakwa esisoni busana nabo, kandi syalikwa esisoni sy’eribirikirwamo Mungu wabo, kundi abiribateghekanirya omuyi.
17 Busana n’erikirirya, omughulu Abrahamu alengawako, mwabya ng’abiriherera Isaka. Ye Abrahamu oyo wangirira n’obutseme ebyo oMungu amulagha mwasonda eriherera ekyusa kiwe.
18 Mwakola atya nomo oMungu abya iniabirimubwira ati: “Olukendisyahulwamo olubuto lwaghu lukendisyasa erilabira Isaka.”
19 Aliwe, abya inianasi ngoko oMungu ali n’obutoki bw’erilubukya Isaka. Neryo Abrahamu abya ng’amatasyamubana ng’oyukabilubuka.
20 Busana n’erikirirya, Isaka naye mwatsumula Yakobo na Esau akababwira emyatsi eyangasire.
21 Busana n’erikirirya, embere Yakobo ahole, mwatsumula abaghala ba Yozefu. Kandi mwaramya oMungu inianahambirire oko mutwe-mutwe w’omutso wiwe.
22 Busana n’erikirirya, Yozefu abere akasonda erihola, mwabugha ngoko abana be Israeli bakendisyalua e Misri. Kandi mwababwira ati bakendisyaheka amakuha wiwe.*
23 Busana n’erikirirya, ababuti ba Musa mubamubisa omo misi isatu abibutwa, kundi mubalangira ngoko abya mubuya. Kandi mubatasagha ebyo omwami abugha.
24 Busana n’erikirirya, Musa abere abikula, mwaghana eryahulwamo omwana wa mwali wa Farao.
25 Mwasombola erinuba haghuma n’abandu b’oMungu omo mwanya w’eritsemera erilolo omo katambi kake,
26 kundi mwalangira amaligho wa Kristo m’obuteke bunene kulenga obuteke bwe Misri, kusangwa abya akalindirira kutsibu eribana ekihembo.
27 Busana n’erikirirya, mwalua e Misri isyasaghire erihitana ry’Omwami. Mwabya inianasikire kundi abya ng’oyukalangira Oyutelangirika.
28 Busana n’erikirirya, mwakola Epasaka* n’erihira omusasi w’oko mulango kusudi oyukita, isita* ehimbere hyabo.
29 Busana n’erikirirya, mubalaba omo Ngetse y’Engula ngoko omundu akalaba oko kitaka ekyumire. Aliwe, omughulu Abamisri basonda erikola batya, mubasenda.
30 Busana n’erikirirya, esyombimbo sye Yeriko musyatera abandu babitimba kusyo omo biro irinda (7).
31 Busana n’erikirirya, Rahabu, oyo wabya mumbalaka, mwatatoghotibwa haghuma n’abandu abatowa, kundi mwakokya ndeke abapelelezi.
32 Ngetasyabugha nitiki? Endambi iyikendibya nge namabibugha niti ngakanaya oko Gideoni, Baraka, Samsoni, Yefta, Daudi, na Samweli, n’abandi baminyereri.
33 Erikirirya ryabo muryaleka ibakinda amami, ibahiraho eritunganene, oMungu iniahabo esyondaghane siwe, ibakinga obuno bw’esyosimba,
34 ibalimya omuliro, ibabala oko muyali, ibahabwa akaghala omughulu babulako, ibabya n’akaghala k’amalwa, ibatibita oko milondo y’abasuda eyasyalwa nabo.
35 Abakali mubasungana kandi n’abanzwa babo babilubuka. Abandi bandu mubaghalibwa, aliwe mubataleghula oko Mungu busana n’erisonda eribya bwiranda. Mubataleghula kundi babya banzire erilubukibwa omo nzira eyuwene kundu.
36 Abandi mubasekereribwa n’erihunzwa esyofimbo, nibya mubabohwa omo minyororo, n’erihirwa omo ngomo.
37 Mubabaghusako amabwe, obwikirirya bwabo mubwalengwako, mubatwibwa omo musumeno mo bihande bibiri, mubitibwa omo muyali, mubalendera ibanambite esyongobi sy’esyombuli n’esy’esyombene, ibalaghire oko buwatikya, ibane omo maligho, ibanemunubibwa.
38 Ekihugho sikyabya kyanzirebo. Babya bakaghanga-ghanga omo mbwarara, oko bitwa, omo myangalu, n’omo byuna by’omo kitaka.
39 Nibya nomo oMungu akanganaya abosi abo ngoko bakamutsemesaya busana n’obwikirirya bwabo, mubatalangira emyatsi eyo Mungu abalagha yikabererera,
40 kundi oMungu abya iniabirituteghekanirya ekindu ekyuwene kutsibu. Mwakola atya bakasyayirwamo abandu abahika-hikene embere syetu.
Amaelezo awehikwa
^ Kutse “abotata-kulu wetu.”
^ Ulebaye amaana w’ebinywa.
^ Kutse “obwato.”
^ Kutse “ow’eriyiketera.”
^ Kutse “mwababwira ng’akendisyatabwa ati.”
^ Kutse “Erikiruka.”
^ Kinywa kwa kinywa, “isyatula oko.”
