Ebaruha oko Abaebrania 13:1-25
13 Mwanzane ebiro byosi ng’abasubeneko.
2 Simubirirawe eribya mukakokya abagheni,* kundi busana n’eribya n’omubere oyo, abandi mubakokya abamalaika butsir’iminya.
3 Simwibirirawe abali omo ngomo. Mubye nga mune omo ngomo* haghuma n’abo. Kandi simubirirawe abakaghalibawa, kundi nenyu muli bandu.*
4 Endwa yisikibawe n’abandu bosi, n’engyingo y’endwa yibye iyinerire, kundi oMungu akendisyatswera abaraghane* n’abasingiri.
5 Simwanze esyofranga omo ngebe yenyu, aliwe mutsemere ebyo muwiteko. Kundi abiribugha ati: “Sinendisyakuleka n’ahake, kandi sinendisyakusighania n’ahake.”
6 Ekyo kikaleka itwatasagha, neryo itwatoka eribugha tuti: “Yehova* ni muwatikya waghe, sinendisyasagha. Omundu akendiniyira ati?”
7 Mwibuke abakabasondola, abababwira ekinywa ky’oMungu. Kandi omughulu mukalengekanaya oko ndundi eyo bakabana busana n’eribya n’emighendere eyuwene, muyikase eribya n’obwikirirya obuli ng’obwabo.
8 Yesu Kristo syalyatabinduka muligholo, na munabwire syalyatabinduka, kandi syendisyabinduka erihika kera na kera.
9 Isimwatebawa n’amakangirirya mbiriri-mbiriri awatasosire ogho mwakangiriribawa, kundi kyuwene omutima erisikibwa omo lukogho, omo mwanya w’erisikibwa omo kalyo* akateletera endundi abakalangirako mo k’omughaso munene.
10 Tuwite ekiherero ekyo abakakola omubiiri mubuyirire omo hema, sibahamulirwe erirya akalyo akakahererawa kukyo.
11 Esyonyama esyabya sikahererwa, ibakatimirayasyo eyihya w’ekambi. Aliwe, omuhereri mukulu iniakatwala omusasi wasyo ahabuyirire, amalolo w’abandu atoke erighanyirwa.
12 Yesu naye mubamwaghalya eyihya w’omuyi atoke eryerya abandu b’omo musasi wiwe.
13 Kwesi, tuye eyali, eyihya w’ekambi, netu tuhemulawe ngoko ahemulawa.
14 Kundi eno situwiteyo omuyi owakendisyasighalaho. Aliwe, tunemusonda kutsibu owakendisyasa.
15 Erilabira Yesu, tubye tukapipa oMungu. Obo bo buhere obo tukamuha. Tukakola tutya omughulu tukakolesaya obuno bwetu eribwira abandu b’erina ry’oMungu.
16 N’ekindi, simwibirirawe erikola ebibuya n’eriha abandi oko bindu ebyo muwiteko, kundi oMungu akatsemera amahere awali ng’ayo.
17 Mwowe abakabasondola, kandi mukole ebyo bakababwira, kundi bakabya ibanemubateya,* kandi bakendisyatonda embere sy’oMungu. Mwamabikola mutya, ibakendikola omubiiri wabo ibanatsemire. Isibendikolagho bakayilungumula, kundi nenyu ekyo isikyendibaletera endundi.
18 Mubye mukatusabira, kundi tunasi ngoko tuli n’obunya-mutima* obuwene, kandi kundi twanzire eriyighendya ndeke omo myatsi yosi.
19 Aliwe, ngabasaba niti mubye mukanisabira nitoke eryasa ewenyu yo luba.
20 Neryo oMungu w’obuholo oyo walubukaya omulisya mukulu w’esyombuli, Omukama wetu Yesu, oyo wabya n’omusasi w’erilaghana rya kera na kera,
21 abahe obuli kindu ekyuwene mutoke erikola erisonda riwe. Kandi erilabira Yesu Kristo, akole ebikamutsemesaya. OMungu ahabawe olukengerwa kera na kera. Amina.
22 Baghala betu, ngabasaba muhulikirire ndeke ekinywa eki ky’eribasubya mutima. Ebaruha eyo niryabahandikira ni nguhi.
23 Nanzire imwaminya ngoko omughala wetu Timoteo abirilua omo muliki. Amabyasa luba, itukendisyasa naye, tukasyababana.
24 Muramukaye abosi abakabasondola, n’ababuyirire bosi. Abali e Itali, bamabaha obuholo.
25 Olukogho lw’oMungu lubye haghuma nenyu, inywe bosi.
Amaelezo awehikwa
^ Kutse “erikolera abagheni omo lukogho.”
^ Kutse “ababohire.”
^ Kutse kandi, “Mubye nga mukaghalawa haghuma n’abo.”
^ Ulebaye amaana w’ebinywa, “Oburaghane.”
^ Ulebaye endomeko A5.
^ Ni bugha ambu, byalayiro ebilebirye akalyo.
^ Kutse “bakateghaya esyonafsi syenyu.”
^ Kutse “n’ezamiri.”
