Ebaruha oko Abaebrania 4:1-16
4 Neryo kundi endaghane y’eringira omw’iluhuka ry’oMungu yikine, tuyiteghaye* omw’inywe mukasyabya oyutatolere eringira omw’iluhuka eryo.
2 Kundi netu twabiryowa engulu mbuya, ngoko nabo bowayo. Aliwe, ekinywa ekyo bowa mukyatabawatikya kundi obwikirirya bwabo sibwabya buwatire ng’obw’abahulikirira.
3 Kundi itwe twabirikangania ngoko twikirirye, tukingira omw’iluhuka. Kiri ngoko abugha ati: “Neryo munalapa ininahitene niti: ‘Sibendisyingira omw’iluhuka ryaghe.’” Mwalapa atya nomo emibiiri yiwe yabya iyabirihwa eritsuka omughulu ahiraho efondasyo y’ekihugho.
4 Kundi omo risako righuma mwabugha oko kiro ky’eririnda (7) ati: “Neryo oMungu mwaluhuka oko mibiiri yiwe yosi omo kiro ky’eririnda (7).”
5 Kandi akatasyabugha ati: “Sibendisyingira omw’iluhuka ryaghe.”
6 Neryo kundi abandu balebe bakinawite akanya k’eringira omw’iluhuka eryo, kandi kundi abatsuka eryowa engulu mbuya mubatingira omw’iluhuka busana n’obutowa,
7 amatasyahiraho ekiro kilebe ebiro binene enyuma sy’aho, omughulu akabugha omo lwimbo lwa Daudi ati: “Munabwire”; ngoko twabiribugha aho mbere halya: “Munabwire, mwamowa omulenge wiwe, isimwakalaya emitima yenyu.”
8 Kundi Yoshua amabya imwabatwala omo mwanya w’eriluhukiramo, oMungu syangahulire ekindi kiro enyuma sy’aho.
9 Neryo hakisiya eriluhuka ry’esabato ry’abandu b’oMungu.
10 Kundi omundu oyo wabiringira omw’iluhuka ry’oMungu abiriluhuka n’oko mibiiri yiwe, ngoko Mungu aluhuka oko mibiiri yiwe.
11 Kwesi, tuyikase kutsibu eringira omw’iluhuka eryo, hakasyabya oyukaghana eryowa ngoko bakola.
12 Kundi ekinywa ky’oMungu kiriho kandi kiwite akaghala. Kitwire kulenga omuyali owakatwira oko syombande ibiri. Kikingira, neryo ikyaghaba enafsi* n’omutima,* n’erighaba esyongunyiro n’omungoso. Kandi kiri n’obutoki bw’eriminya ebiri omo mutima w’omundu.
13 Kandi sihali ekihangyikwa ekibiseme omo meso w’oMungu. Aliwe, ebindu byosi biri ndumbu, kandi bilangirikire ndeke-ndeke omo meso w’oyo tukendisyatonda embere siwe.
14 Neryo kundi tuli n’omuhereri mukulu oyo w’abiringira omo lubula, ye Yesu, Omughala w’oMungu, situleke erihubirya emyatsi eyo twabirikirirya okw’iye.
15 Kundi omuhereri wetu mukulu si mundu oyutewangatoka eritukwira obulighe omughulu tukalemawa, aliwe tuwite omuhereri mukulu oyo wabirilengwako omo myatsi yosi nga twe, nikwa mwatakola erilolo.
16 Neryo tuseghere hakuhi n’ekitumbi ky’Obwami ky’olukogho, n’erisaba oMungu itune n’obwiranda bw’eribugha tutoke erighanyirwa n’eriwatikibwa oko ndambi eyitolere busana n’olukogho lwiwe.
Amaelezo awehikwa
^ Kinywa kwa kinywa, “tusaghe.”
^ Ulebaye amaana w’ebinywa.
^ Kutse “ekirimu.” Ulebaye amaana w’ebinywa.
