Ebaruha oko Abaebrania 5:1-14
5 Kundi obuli muhereri mukulu oyukasombolawa omo bandu akahirawaho atoke erikolera oMungu busana n’abandu abo, kusudi abye akaherera ebihembo n’amahere busana n’amalolo.
2 Anganatoka erikwira obulighe* abakakola amalolo busana n’eritendiminya n’abakahera oko nzira, kundi naye akabya inianemulwa n’obulema bwiwe.*
3 N’ekyo kyo kikaleka iniabya akaherera amahere busana n’amalolo wiwe, ngoko akanaherera amahere busana n’amalolo w’abandu.
4 Omundu yuteyiyiramo muhereri mukulu, aliwe oMungu musa yukamusombolamo muhereri mukulu, ngoko asombola Haruni.
5 Kutya Kristo naye mwatayiyiramo muhereri mukulu, aliwe ayirawamo muhereri mukulu n’oyo wamubwira ati: “Uli mughala waghe; naghe munabwire namabya tata waghu.”
6 Omo rindi risako mwabugha ati: “Uli muhereri mukulu kera na kera nga Melkisedeki.”
7 Omughulu Kristo abya hano h’oko kihugho, mwasaba n’erilemba-lemba oyo wabya n’obutoki bw’erimusabula omo luholo. Mwakola atya inianemulaka n’eritoghongya emisonia. Neryo oMungu mwamowa kundi Kristo abya iniamukengire.
8 Nomo anabya mughala wiwe, amaligho ogho alabamo mwaleka inyigha eribya akowa.
9 Abere abikangania ndeke-ndeke ngoko akowa,* mwabya nzira y’eriwatikyamo abosi abakamwowa eribana omulamo wa kera na kera,
10 kundi oMungu abirimuyiramo muhereri mukulu nga Melkisedeki.
11 Tuli n’emyatsi mingyi ey’eribugha okw’iye. Aliwe, emyatsi eyo yikalire eribughayo kundi simulyowa luba.
12 Lino,* n’inywe mwangabere bakangirirya, aliwe n’inywe mukatasyalagha oko mundu w’eribakangirirya emyatsi y’erimbere y’omo kinywa ky’oMungu kibuyirire. Kandi mwanzire imwanywa amaziwa omo mwanya w’erirya akalyo akakala-kalire.
13 Kundi obuli mundu oyukinanywa maziwa syasi ekinywa ky’eritunganene, kundi ni mwana mulere.
14 Aliwe, akalyo akakala-kalire ni k’abandu bakulu, abo busana n’erikolesya obwenge* bwabo, babiritoka eriminya* ekyuwene n’ekituwene.
Amaelezo awehikwa
^ Kutse “erikolera omundu y’omo bolo.”
^ Kutse “isyahika-hikene.”
^ Kutse “Abiyirwamo oyuhika-hikene.”
^ Kinywa kwa kinywa, “Erikwamana n’endambi.”
^ Kutse “n’eriyiteghererya.”
^ Kutse “eritofautisya.”
