Ebaruha oko Abaebrania 7:1-28
7 Melkisedeki oyu abya mwami we Salemu kandi abya muhereri w’oMungu ow’Endata Kutsibu. Mwahindana na Abrahamu omughulu Abrahamu abya akalua eyo ayitira abami, neryo mwatsumula Abrahamu.
2 Abrahamu mwamuha ekighuma ky’omwikumi ky’ebindu byosi. Eky’erimbere, erina riwe rikamaanisaya “Omwami w’Eritunganene.” Kandi ni mwami we Salemu, ni bugha ambu, “Omwami w’Obuholo.”
3 Iye syawite baba, syawite mama, syawite ekihanda. Syawite ekiro ky’eributwa n’eky’erihola. Omo nzira eyo, ali ng’Omughala w’oMungu. Neryo akendisyabya muhereri kera na kera.
4 Omundu oyo abya mukulu kutsibu. Kyo kyaleka nibya Abrahamu, tata-kulu wetu, iniamuha ekighuma ky’omwikumi ky’ebindu ebyuwene ebyanyegha.
5 Oko kwenene, erikwamana n’Emighambo, abahereri b’omo kihanda kya Lawi bo basabirwe erikuma-kuma ekighuma ky’omwikumi oko bandu, ni bugha ambu, oko balikyabo, nomo bane bana ba Abrahamu.
6 Aliwe omundu oyu, oyo watabya omo kihanda kya Lawi, mwimya ekighuma ky’omwikumi oko Abrahamu. Kandi mwatsumula oyo Mungu aha esyondaghane siwe.
7 Neryo butsir’itika-tika, omukulu mwatsumula omulere.
8 Omo mwatsi w’erimbere, abandu abakahola bo bakahabawa ekighuma ky’omwikumi. Abalawi abakahabawa ekighuma ky’omwikumi ni bandu abakahola. Aliwe, oghundi mundu olya, oyo wahabawa ekighuma ky’omwikumi, Amasako akabugha ndeke-ndeke ngoko aneho.
9 Kandi twanganabugha tuti nibya na Lawi, oyukahabawa ekighuma ky’omwikumi, mwaliha ekighuma ky’omwikumi erilabira Abrahamu,
10 kundi abya iniakendisyabutwa na* Abrahamu, omughulu Melkisedeki ahindana na Abrahamu.
11 Abahereri b’omo kihanda kya Lawi bamabya imo banatoka eriwatikya abandu eribya butsira malolo (kundi Emighambo yo yahiraho abahereri abo busana n’eriwatikya abandu), twanganasirisyalagha oko ghundi muhereri oyuli nga Melkisedeki? Omuhereri nga Haruni syangatosire?
12 Kundi obuhereri bunemubindulwa, ritolere n’Emighambo nayo iyabindulwa.
13 Kundi omundu oyo emyatsi eyi yikakanayako ni w’omo kindi kihanda. Omo kihanda ekyo, simuli n’omundu n’omughuma oyo wabirikolera oko kiherero.
14 Kundi tunasi ndeke-ndeke ngoko Omukama wetu ni w’omo kihanda kya Yuda. Aliwe, Musa mwatabugha ati hakendisyabya bahereri b’omo kihanda ekyo.
15 N’ekyo tukatasyalangirakyo ndeke-ndeke omughulu hakahuluka oghundi muhereri, oyuli nga Melkisedeki.
16 Abiribya Muhereri. Aliwe, si bugha ambu kundi ni w’omo kihanda ekyo Emighambo yikabugha yiti kumbe omuhereri inialuamo. Nikwa ni muhereri kundi awite obutoki obukamuha engebe eyiteyangatoghotibwa.
17 Kusangwa oMungu akamwimira omughulu akabugha ati: “Uli muhereri kera na kera nga Melkisedeki.”
18 Neryo ekyalayiro kya kera kyabirihwa. Sikyabya n’akaghala, kandi sikyangatuwatikya.
19 Kundi Emighambo muyituwania emyatsi. Aliwe, amaha awuwene aw’oMungu atuha muwania emyatsi, n’amaha ayo anemutuwatikya eribya bira b’oMungu.
20 Kandi oMungu mwalapa omughulu ayira Yesu mo muhereri
21 (hane abandu ababya bahereri isihali erilapa, aliwe olya, iye abya muhereri omughulu oMungu abugha ati: “Yehova* abirilapa, syendisyayisubako.* ‘Uli muhereri kera na kera’”),
22 neryo Yesu abiribya iyukakanganaya ndeke-ndeke ngoko erilaghana eryuwene rikendisyabererera.
23 Kandi abahereri banene mubabya bakasubukana kundi oluholo ilukaleka ibatabya bahereri omo biro binene.
24 Aliwe kundi iye aliho kera na kera, sihali omuhereri oyo wangimya omwanya wiwe.
25 Neryo anganasabula ndeke-ndeke abosi abakabya abira b’oMungu erilabira iye, kundi mughulu wosi akabya inianeho busana n’eribasabira.
26 Oyo yo muhereri mukulu oyo twabya tutolere. Ni mutaleghula, syali n’ekibi, erire, syali ng’abakakola amalolo, kandi abirihirwa endata kutsibu.
27 Kundi syali ng’abandi bahereri bakulu, syalaghire okw’ibya akaherera obuhere obuli kiro busana n’amalolo wiwe iyuwene-wene, n’enyuma sy’aho busana n’amalolo w’abandu, kundi mwakola atya ngendo nguma nyisa omughulu ayiherera.
28 Kundi Emighambo yikahiraho abahereri bakulu abali n’obulema. Aliwe, ekinywa ky’erilapa ekyabughawa enyuma sy’Emighambo kikahiraho Omughala, oyo wabiriyirwamo omundu oyuhika-hikene kera na kera.
Amaelezo awehikwa
^ Kinywa kwa kinywa, “abya iniakine omo mbindi ya.”
^ Ulebaye endomeko A5.
^ Kutse “syendisyayikubya bomo.”
