Ebaruha oko Abaebrania 9:1-28
9 Erilaghana ry’erimbere ryabya n’Emighambo eyabya yikasondola omubiiri mubuyirire, kandi ryabya n’ahabuyirire oko kihugho.
2 Kundi ekyumba ky’ekwanza ky’ehema mukyahimbwa. Kyabyamo ekindu ky’erihirako esyotala, n’emesa eyabya yikahirwako emikati eyibuyirire,* n’ekyumba ekyo ikikahulawamo Ahabuyirire.
3 Aliwe, enyuma sy’erido y’akabiri habya ekyumba ky’ehema ekikahulawamo Ahabuyirire Kutsibu.
4 Kyabyamo ekindu ky’eritimiryako obukwa eky’ehoro, esanduku y’erilaghana eyabya iyiswikirweko ehoro. Omo sanduku eyo, mwabya erilegha ry’ehoro eririmo amana, n’omutso wa Haruni owasako omusanga, n’amabwe w’erilaghana.
5 N’endata oko sanduku eyo kwabya abamakerubi abakangabasenie, ababya bakaswika omo kitsutsu ky’ebipupa byabo ekikuningo ky’esanduku.* Aliwe, eno si y’endambi y’erikania oko myatsi eyo ko buli.
6 Ebindu ebyo mubyabya byabihimbwa bitya, obuli kiro abahereri ibakingira omo kyumba ky’ekwanza ky’ehema bakayakoleramo emibiiri mibuyirire.
7 Aliwe, omuhereri mukulu iye musa iyukingira omo kyumba ky’akabiri kaghuma oko mwaka. Kandi isyalingiramo isyali n’omusasi ogho akendiherera busana naye iyuwene-wene, kandi busana n’amalolo ogho bandu bakakola omwitendiminya.
8 Omo nzira eyo, ekirimu kibuyirire kikakanganaya ngoko enzira eyikatwala ahabuyirire yabya isiyiriyakanganibwa, kundi ehema y’ekwanza yabya iyikineho.
9 Ehema eyi ni kisosekanio ky’emyatsi ya lino. Kandi erikwamana n’ekisosekanio ekyo, ebihembo n’amahere binemuhererwa. Aliwe ebyo, sibyangawatikya omundu oyukakola omubiiri mubuyirire abye n’obunya-mutima* obuhika-hikene.
10 Bilebirye emyatsi eyi misa: akalyo, eby’erinywa, n’emihanda mbiri-mbiriri y’erinaba. Ebyosi ebi byabya bisabirwe n’Emighambo kandi byabya ibilebirye omubiri. Kandi byahirawaho erihika oko mughulu w’erilungula emyatsi.
11 Aliwe, omughulu Kristo, omuhereri mukulu asa, oyo wangaletire emyatsi mibuya eyabiribyaho lino, mwingira omo hema ngulu n’eyihika-hikene kutsibu. Ehema eyo muyatahimbwa omo byala, ni bugha ambu, muyatahimbwa n’ekindu ekyahangyikawa.
12 Mwingira ahabuyirire. Mwatingiraho n’omusasi w’esyombene, n’ow’esyonume sy’esyonde esikine silere. Aliwe mwingiraho n’omusasi wiwe-wiwe kaghuma kasa, neryo mwatusabula* kera na kera.
13 Omusasi w’esyombene, n’ow’esyonume sy’esyonde esikine silere, n’eribu ry’ende nyilere erikatsatsangawa oko abandu abaterire, byamabya ibikabayiramo abandu aberire kinya-mubiri,
14 simulangire ngoko omusasi wa Kristo, oyo erilabira ekirimu kya kera na kera, mwayiherera oko Mungu isyali n’ekosa, akendyerya ndeke-ndeke obunya-mutima* bwetu isibwabyako emyatsi eyituwene, tutoke erikolera oMungu oyuliho omubiiri mubuyirire?
15 Ekyo kyo kikaleka iniabya musangania w’erilaghana rihya-rihya. Mwabya musangania kusudi ababirikirawa batoke eribana endaghane y’omwandu wa kera na kera. Ebyosi mubyatokekana busana n’oluholo lwiwe olwabya mbanulo eyabalusaya omo malolo ogho bakola ibane omwilaghana rya kera.
16 Kundi omughulu hakabya erilaghana, omundu oyukakola erilaghana kikatolera iniahola,
17 kusangwa erilaghana rikahamba ndeke-ndeke omundu oyo abihola, kundi erilaghana eryo siryangahamba ndeke-ndeke oyulyakolaryo iniakineho.
18 Busana n’ekyo, erilaghana rya kera naryo muritahamba ndeke-ndeke hatehutika omusasi.
19 Kundi Musa abere abibugha n’eribwira abandu bosi b’Emighambo yosi, mwimya omusasi w’esyonume sy’esyonde esikine silere n’ow’esyombene, amimya n’amaghetse, obweya bw’esyombuli bw’erangyi y’omusasi,* n’ehisopo, neryo mwatsatsangagho oko kitabu* n’oko bandu bosi.
20 Neryo mwabugha ati: “Ono ni musasi w’endaghane eyo Mungu abiribasaba erisikya.”
21 Kutya mwimya omusasi amatsatsangagho oko hema n’oko bindu byosi ebikakolesibawa omo mubiiri mubiyirire.*
22 Erikwamana n’Emighambo, hakuhi ebindu byosi bikeribawa omo musasi. Omusasi atitutika, sihangabya erighanyirwa.
23 Neryo kyabya kitolere ebisosekanio by’emyatsi eyiri elubula ibyeribwa omo syonzira esyo. Aliwe, ebindu by’elubula bisabire amahere awuwene kwilabaho.
24 Kundi Kristo mwatingira ahabuyirire ahahimbawa omo byala, ahakasosekanaya ahabuyirire h’ekwenene. Aliwe, mwingira omo lubula. Neryo lino ali embere sy’oMungu busana netu.
25 Kristo mwatingira elubula busana n’eriyiherera kangyi-kangyi, ngoko omuhereri mukulu akingira ahabuyirire obuli mwaka iniane n’omusasi owate wiwe.
26 Kristo ngakola atya, angaghalirwe kangyi-kangyi eritsuka omughulu efondasyo y’ekihugho yahirawaho. Aliwe, mwayikangania kaghuma kasa oko nduli y’emighulu.* Mwakola atya atoke eribughaho erilolo omwiyiherera.
27 Obuli mundu akendisyahola kaghuma kasa, n’enyuma sy’aho ibamutswera.
28 Kristo naye mwayiherera kaghuma kasa atoke eriheka amalolo w’abandu bangyi. N’omughulu akendisyasa engendo y’akabiri, syendisyasa busana n’erilusyaho erilolo. Aliwe, akendisyasa busana n’erisabula abakamulindirira.
Amaelezo awehikwa
^ Kutse “emikati y’erikangania.”
^ Kutse “aherihanulira.”
^ Kutse “ezamiri.”
^ Kutse “mwatulihira embanulo.”
^ Kutse “ezamiri.”
^ Kutse “lukula-kula, écarlate.”
^ Kutse “ekitabu ky’erilinga.”
^ Kutse “omubiiri w’eriwatikya abandu.”
^ Ulebaye amaana w’ebinywa.
