Abalawi 1:1-17
-
Obuhere bw’eryokererya (1-17)
1 Kandi Yehova mwabirikira Musa n’erikania naye erilua omo hema y’erihindanamo ati:
2 “Ukanaye n’Abaisraeli* n’eribabwira uti, ‘Omundu wosi-wosi omo kati-kati kenyu amabiletera Yehova y’obuhere omo kati-kati k’esyonyama sy’eka, litolere imwaleta obuhere bwenyu erilua omo kihangulo ky’esyonde n’erilua omo kihyo ky’esyombuli.
3 “Obuhere bwiwe bwamabya ini buhere bw’eryokererya obo alyalusaya omo syonde, litolere inialeta enume eyiteko obulema. Litolere inialetayo embere sya Yehova omwanza liwe oko lukyo lw’ehema y’erihindanamo.
4 Akendisyahira ebyala biwe oko mutwe w’enyama y’obuhere bw’eryokererya, nabo bukendisyaliwa busana naye erihanulira amalolo wiwe.
5 “‘Neryo enume y’ende eyikine nyilere eyo, ikendisyakererwa embere sya Yehova. N’abaghala ba Haruni, abahereri, bakendisyaleta omusasi wayo n’eritsatsangagho oko mbande syosi sy’ekiherero ekiri oko lukyo lw’ehema y’erihindanamo.
6 Obuhere bw’eryokererya litolere ibwalusibwako engobi n’erighabwa mo maghabo-maghabo.
7 Abaghala ba Haruni, abahereri, bakendisyabya bakakya omuliro n’erihira kugho kw’esyongwi.
8 Abaghala ba Haruni, abahereri, bakendisyatonda amaghabo w’obuhere bw’eryokererya haghuma n’omutwe n’ebisabu by’oko syombiko oko syongwi esiri oko muliro oko kiherero.
9 Amala n’emilenge y’obuhere obo, litolere iby’eribwa omo maghetse. N’omuhereri akendisyahisya ebyosi oko kiherero mo buhere bw’eryokererya busana n’erilusya omuki, obuhere obukahisibawa omo muliro, ekikumbo ekyuwene* busana na Yehova.
10 “‘Amabya iniakalusaya obuhere bwiwe bw’eryokererya omo kihyo, omo kati-kati k’esyombangale kutse esyombene esikine silere-silere, litolere inialeta ey’obulume eyiteko obulema.
11 Ikendisyakererwa oko luhande lw’endata lw’ekiherero embere sya Yehova, n’abaghala ba Haruni, abahereri, bakendisyatsatsanga omusasi wayo oko mbande syosi sy’ekiherero.
12 Akendisyaghabayo mo maghabo-maghabo, n’omuhereri akendisyatonda omutwe wayo n’ebisabu byayo by’oko syombiko oko syongwi esiri oko muliro owali oko kiherero.
13 Akendisyerya amala n’emilenge omo maghetse. N’omuhereri akendisyaleta ebyosi n’erihisyabyo mo buhere bw’eryokererya busana n’erilusya omuki oko kiherero. Ni buhere bw’eryokererya, obuhere obukahisibawa omo muliro, ekikumbo ekyuwene* busana na Yehova.
14 “‘Nikwa syamabya ini nyunyu syo akendileta mo buhere bw’eryokererya busana na Yehova, akendisyaleta obuhere bwiwe erilua omo hitungula kutse ehipijo ehikine hilere-hilere.
15 Omuhereri akendisyaleta enyunyu eyo oko kiherero iniakonyola omutwe wayo neryo inyahisiriryayo oko kiherero busana n’erilusya omuki. Aliwe omusasi wayo akendisyasononekeribwa oko luhande lw’ekiherero.
16 Akendisyalusya muyo mw’ekitolero n’eriputsa kuyo kw’ebyeya, iniaghusabyo emusike w’ekiherero, ahali eribu,* oko luhande lw’eyo eryuba likasira.
17 Akendisyatulayo aho ebipupa bihindene butsira erighabayo mo bihande bibiri. Neryo omuhereri akendisyahisiriryayo oko kiherero oko syongwi esiri oko muliro busana n’erilusya omuki. Ni buhere bw’eryokererya, obuhere obukahisibawa omo muliro, ekikumbo ekyuwene* busana na Yehova.
Amaelezo awehikwa
^ Kinywa kwa kinywa, “abaghala ba Israeli.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “eribu ry’ebisabu.” Ni bugha ambu, eribu eritulungenemo ebisabu ebikalua omo mahere.
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
