Abalawi 11:1-47
-
Esyonyama esyerire n’esiterire (1-47)
11 Neryo Yehova mwabugha na Musa na Haruni ati:
2 “Mubwire Abaisraeli muti, ‘Ebihangyikwa* by’oko kihugho ebyo mwangalya by’ebi:
3 Enyama yosi-yosi eyiwite ekighera ekighabire, eyiwite ekisando ekitulire ndeke-ndeke, kandi eyikaghumula,* yanganalibwa.
4 “‘Aliwe esyonyama hino esikaghumula* kutse esiwite ebighera ebighabire isimwalyasyo: engamia, kusangwa ikaghumula aliwe siyiwite ekighera ekighabire. Siyerire okw’inywe.
5 N’ewibari,* kusangwa ikaghumula aliwe siyiwite ekighera ekighabire. Siyerire okw’inywe.
6 N’esungura,* kusangwa ikaghumula aliwe siyiwite ekighera ekighabire. Siyerire okw’inywe.
7 N’engulube, kusangwa yiwite ekighera ekighabire n’ekisando ekitulire ndeke-ndeke, aliwe siyirighumula. Siyerire okw’inywe.
8 Siritolere mukalya eyiswi yasyo yosi-yosi kutse eritula oko binda byasyo. Sisyerire okw’inywe.
9 “‘Oko bikabya omo maghetse ebyo mwangalya bya bino: Ekindu kyosi-kyosi ekiwite ebikibi* n’ebikora, kibye omo syongetse kutse omo syonyusi, mwanganalyakyo.
10 Nikwa ebindu byosi-byosi ebiri omo syongetse kutse omo syonyusi, ebitawite ebikibi* kutse ebikora, omo kati-kati k’ebihangyikwa byosi ebikabya omo bikuto n’ebindi bihangyikwa ebiriho* ebiri omo maghetse, ebyo ni nye okw’inywe.
11 Ebihangyikwa ebyo, litolere ibyabya nye okw’inywe, isimwalya esiswi syabyo, n’ebinda byabyo litolere imwalangirabyo mo nye.
12 Ekindu kyosi-kyosi ekiri omo maghetse ekitawite ebikibi* kutse ebikora, ni nye okw’inywe.
13 “‘Esyonyunyu esyo litolere imwalangira mo nye, sy’esi; siritolere sikalibwa kundi ni nye: erisamba, enguranga, ekipungu ekikinire,
14 akateluli, n’emihanda yosi y’ehisara,
15 emihanda yosi y’ebikororo,
16 embuni,* ekibukulu, edudumizi, emihanda yosi y’ebihungu,
17 akabukulu kake, ekisohi, ekibukulu ky’amahembe,
18 ekibata kinene ky’omo maghetse, emwari, ekipungu,*
19 ekirobi, emihanda yosi y’ebimongo, ehudi-hudi, n’ekilima-lima.
20 Ebihangyikwa byosi ebiwite ebipupa, ebikabya omo bikuto kandi ebikaghendera oko maghulu ani wosi, ni nye okw’inywe.
21 “‘Oko bihangyikwa ebiwite ebipupa kandi ebikabya omo bikuto kandi ebikaghendera oko maghulu ani wosi, ebyo mwangalya bisa byo biwite amaghulu abiri awalimo esyonungu, amali-mali kulenga awandi busana n’eritwa ekika oko kitaka.
22 Okw’ebi mwanganalya bino: emihanda mbiriri-mbiriri y’esyongyike, n’ebindi bituta ebikalibawa, ebinyamutsere, n’emisyenene.
23 Ebindi bihangyikwa ebikabya omo bikuto kandi ebiriko ebipupa kandi ebiwite amaghulu ani, ni nye okw’inywe.
24 Ebi byo byangabayiramo abeterire. N’omundu wosi-wosi amabitula oko kinda kyabyo, iniakendibya oyuterire erihika omw’igholo-gholo.
25 Omundu wosi-wosi amabiheka ekinda kyabyo, litolere inyafula esyongyimba siwe. Akendisyabya oyuterire erihika mw’igholo-gholo.
26 “‘Esyonyama syosi esiwite ekighera ekighabire aliwe ebisando byasyo isibitulire ndeke-ndeke kandi esiteghumula,* sisyerire okw’inywe. Omundu wosi-wosi oyukatula kusyo akendisyabya oyuterire.
27 Oko syonyama esikaghendera oko maghulu ani, enyama yosi-yosi eyikaghendera oko manono,* siyerire okw’inywe. Oyukatula oko kinda kyasyo akendisyabya oyuterire erihika omw’igholo-gholo.
28 Omundu wosi-wosi oyukaheka ekinda kyasyo, litolere inyafula esyongyimba siwe, kandi akendisyabya oyuterire erihika omw’igholo-gholo. Ni nyama esiterire okw’inywe.
29 “‘Omo bihangyikwa ebikabya omo bikuto, ebiterire okw’inywe by’ebi: ekingiri,* embeba, emihanda yosi y’ebihangala,
30 akakutu, ebihangala binene-binene, omusiribaba w’omo maghetse, omusiribaba w’omo mutsanga, n’akanyalungu.
31 Ebihangyikwa ebi ebikabya omo bikuto, si by’erire okw’inywe. Obuli mundu oyukatula oko kinda kyabyo, akendisyabya oyuterire erihika omw’igholo-gholo.
32 “‘Ekindu kyosi-kyosi ekyo bikendisyatogherako bikahola, kikendisyabya ekiterire; kibye kindu ekikokotibwe omo muti, lubye lukimba, engobi, kutse olukimba lw’esaki. Ekindu kyosi-kyosi, kibye ikikakolesibawa oko mubiiri wahi, litolere ikyalobekwa omo maghetse, kandi kikendsyabya ekiterire erihika omw’igholo-gholo; neryo enyuma sy’aho kikendisyabya eky’erire.
33 Byamabitoghera omo kindu ky’omutaka, imwatulangakyo, n’ebyosi ebiri mukyo ibikendibya ebiterire.
34 Amaghetse awakalua omo kindu ekiri ng’ekyo, amabiya oko kalyo kosi-kosi, akalyo ako ikakendibya aketerire, n’ekindu kyosi-kyosi ekikanywibawa ekiri omo kindu ekyo ikikendibya ekiterire.
35 Ekindu kyosi-kyosi ekyo ebinda byabyo bikatogherako, kikendisyabya ekiterire; ribye riko ry’emikati kutse erindi riko, litolere iwatulangabyo mo bitswe-bitswe. Si by’erire, kandi bikendisyabya ebiterire okw’inywe.
36 Enunga n’ekyuna ky’eribikamo amaghetse, ebyo bisa byo bikendisyabya ibinerire, aliwe omundu wosi-wosi oyukatula oko binda byabyo, akendisyabya oyuterire.
37 Ebinda byabyo byamabitoghera oko mbuto eyikendiherwa, embuto eyo ikendisyabya iyinerire.
38 Nikwa embuto yamabihirwako amaghetse n’akatswe k’ebinda byabyo kamabitoghera oko mbuto eyo, embuto eyo ikendisyabya eyiterire okw’inywe.
39 “‘Enyama eyo mukalya yamabihola, owosi-wosi oyukatula oko kinda kyayo akendisyabya oyuterire erihika omw’igholo-gholo.
40 Owosi-wosi oyukalya oko yiswi y’enyama eyiryahola eyo, litolere inyafula esyongyimba siwe kandi akendisyabya oyuterire erihika erigholo-gholo. Omundu wosi-wosi oyukaheka ekinda ky’enyama eyo, akendisyafula esyongyimba siwe n’eribya oyuterire erihika omw’igholo-gholo.
41 Ebihangyikwa byosi by’oko kihugho ebikabya omo bikuto, ni nye. Siritolere bikalibwa.
42 Isimwalya ekihangyikwa kyosi-kyosi ky’oko kihugho ekikakululuka oko nda yakyo, ekihangyikwa kyosi-kyosi ekikaghendera oko maghulu ani, ebihangyikwa byosi by’oko kihugho ebikabya mo bikuto kandi ebiwite amaghulu mangyi; kusangwa ni nye.
43 Isimwayiyira* mo nye erilabira ekihangyikwa kyosi-kyosi ekikabya omo bikuto. Isimwayitsandaya mubyo n’eribya abaterire.
44 Kusangwa indi Yehova Mungu wenyu, kandi litolere imwayihighula n’eribya babuyirire, kusangwa naghe nibuyirire. Neryo isimwayiyira mo abateririre omo kihangyikwa kyosi-kyosi ekikaghenda oko kitaka ekikabya omo bikuto.
45 Kusangwa indi Yehova oyukabalusaya omo kihugho kye Misri eribakangania ngoko indi Mungu. Litolere imwabya babuyirire, kusangwa indi mubuyirire.
46 “‘Oyu wo mughambo owalebirye esyonyama, ebihangyikwa* ebikaghuluka, ebihangyikwa byosi ebiriho ebikabya omo maghetse, n’ebihangyikwa byosi by’oko kitaka ebikabya omo bikuto,
47 hatoke eribya eritendisosana omo kati-kati k’ebiterire n’ebyerire n’omo kati-kati k’ebihangyikwa ebiriho ebyangalibwa n’ebite byangalibwa.’”
Amaelezo awehikwa
^ Kutse “esyonyama sy’oko kihugho.”
^ Kutse “eyikasubulaya.”
^ Kutse “esikasubulaya.”
^ Kutse “ekiyama.”
^ Kutse “esungura y’omoli.”
^ Kutse “ebipupura, ebipipira.”
^ Kutse “ebiwite obuyingo.”
^ Kutse “ebipupura, ebipipira.”
^ Kutse “ebipupura, ebipipira.”
^ Kutse “e otrishe.”
^ Kutse “ebihungu ebikalya ebinda.”
^ Kutse “esitesubulaya.”
^ Kutse “ebisando ebiriko amanono awaliko esyonyala, ng’eby’esimba, epusu, n’embwa.”
^ Kutse “efuku.”
^ Kutse “isimwayira esyonafsi syenyu.”
^ Kutse “esyonafsi.”
