Abalawi 13:1-59
13 Yehova mwasyabugha na Musa na Haruni ati:
2 “Engobi y’omundu yamabyasako ekisusu, ekikokyo, kutse ekitingu, ekyanganabya bukoni bw’ebihagha* oko ngobi* yiwe, litolere omundu oyo inialetwa eyiri Haruni, omuhereri, kutse eyiri omughuma w’oko baghala biwe, abahereri.
3 Omuhereri akendisyayiteghererya obukoni obuli oko ngobi yiwe. Obweya obuli oko mukoni oyo bwamabya ibwabiribya bweru-bweru, n’obukoni bwamabya ibwingire kutsibu omo mubiri erilaba oko ngobi, eryo ebyo ini bihagha. Omuhereri akendisyayiteghererya obukoni obo, neryo iniahula omukoni oyo mo oyuterire.
4 Nikwa ekitingu ekiri oko ngobi yiwe kyamabya ikyabiribya kyeru-kyeru, kandi ikyalangirika nga kiri oko ngobi nyisa, sikingire omo mubiri, n’obweya isibwetabya bweru-bweru, aho omuhereri akendisyahighula omundu oyulwere oyo omo biro 7.
5 Oko kiro kye 7, omuhereri akendisyayiteghererya omundu oyo. Obukoni bwamabilangirika nga bwabirilama, sibwetatanda oko ngobi, omuhereri akendisyahighula omundu oyo oko bandi omo bindi biro 7.
6 “Oko kiro kye 7, kandi omuhereri akendisyayiteghererya omundu oyo. Obukoni bwamabya ibwabiribulirana, isibwetatanda oko ngobi, omuhereri akendisyahula omundu oyo mo oyo werire, aho ikilue kikokyo buyira. Omundu oyo akendisyafula esyongyimba siwe neryo iniabya mundu oyo werire.
7 Nikwa ekikokyo* kyamabitanda oko mubiri wiwe enyuma sy’omuhereri eriyiteghererya omundu oyo erilebya ng’anerire, litolere omundu oyo iniatasyasuba* eyiri omuhereri.
8 Omuhereri akendisyayiteghereryakyo, n’ekikokyo ekyo kyamabya ikyabiritanda oko ngobi, omuhereri akendisyahula omundu oyo mo oyuterire; ebyo ni bihagha.
9 “Omubiri w’omundu mulebe amabisungikako ebihagha, litolere omundu oyo inialetwa embere sy’omuhereri.
10 N’omuhereri akendisyayiteghererya omundu oyo. Engobi yiwe yamabya iyiriko ekisusu ekihenirye n’eriyira obweya mo bweru-bweru kandi ekisusu ekyo kyamabibyamo ekironda,
11 ebyo ini bihagha by’omughulu muli oko ngobi yiwe. N’omuhereri akendisyahula omundu oyo mo oyuterire; syendisyamuhighula kusangwa ni mundu oyuterire.
12 Nikwa ebihagha byamabyasa oko ngobi yiwe yosi, n’ebihagha ibyabya oko mundu oyo iye wosi, eritsuka oko mutwe erihika oko bisando, erikwamana n’ebyo omuhereri angalangira,
13 n’omuhereri abiyiteghererya omundu oyo, inialangira ngoko ebihagha byabiryusula oko mubiri wiwe wosi, akendisyamwahula mo oyo werire.* Engobi yosi yabiribinduka nyeru-nyeru, ni mundu oyo werire.
14 Aliwe engobi yamabisungikamo ekironda, iniakendibya mundu oyuterire.
15 Omuhereri akendisyabya alangira ekironda ekyo, akendisyahula omundu oyo mo oyuterire. Ekironda ekyo sikyerire; ni bihagha.
16 Nikwa ekironda ekyo kyamabitasyabya kyeru-kyeru, iniakenditasyasuba eyiri omuhereri.
17 Omuhereri akendisyayiteghererya omundu oyo. Obukoni bwamabya ibwabiribya bweru-bweru, akendisyahula omundu oyu mo oyo werire. Ni mundu oyo werire.
18 “Omundu amabikwa ekimata* oko ngobi yiwe n’ekimata ekyo ikyalama,
19 nikwa omo mwanya owalimo ekimata* imwabya ekisusu kyeru-kyeru, kutse ekitingu ekihena-henirye, litolere iniaya eyiri omuhereri.
20 Omuhereri iniakendiyiteghereryakyo. Kyamabilangirika nga sikiri endata-ndata, aliwe kingire omo ngobi, n’obweya bwaho bwamabya ibwabiribya bweru-bweru, omuhereri akendisyahula omundu oyo mo oyuterire. Ebyo ini bihagha ibyo byabiryasa omo kimata.*
21 Nikwa omuhereri amabiyiteghereryakyo n’erilangira ngoko sikirimo olweya losi-losi lweru-lweru, kandi ikiri endata-ndata oko ngobi kandi ikyabya nga kyabiribulirana, aho omuhereri iniakendisyamuhighula oko bandi omo biro 7.
22 Kyamabya ikyabirilangirika ndeke-ndeke ngoko kyabirilanda oko ngobi, omuhereri akendisyamwahula mo oyuterire. Obo ni bukoni.
23 Nikwa ekitingu kyamabya haghumerera isikyetalanda, aho ini bugha ambu, ekimata* mukikasamo obubimbe. Aho omuhereri akendisyamwahula mo oyo werire.
24 “Kutse omundu amabibyako engolu y’obuhye bw’omuliro, n’engolu eyo yamabya kitingu ekihena-henirye kutse kyeru-kyeru,
25 omuhereri akendisyayiteghererya obweya b’omo buhye obo. Bwamabya ibwabiribya bweru-bweru kandi ikyalangirika nga sibuli endata-ndata aliwe bwingire omo ngobi mw’emwisi, eryo ebyo ini bihagha ibyabiryasa omo ngolu eyo. N’omuhereri akendisyamwahula mo oyuterire. Ebyo ni bihagha.
26 Nikwa omuhereri amabiyiteghereryakyo n’erilangira ngoko ekitingu ekyo sikirimo olweya losi-losi oluhena-henirye kandi ikyalangirika ngoko kiri endata-ndata oko ngobi, kandi nga kyabiribulirana, aho omuhereri akendisyamuhighula oko bandi omo biro 7.
27 Oko kiro kye 7 omuhereri akendisyayiteghererya omundu oyo. Ekitingu ekyo kyamabya ikyabirilangirika ndeke-ndeke ngoko kyabirilanda oko ngobi, aho omuhereri akendisyahula omundu oyo mo oyuterire. Obo ni bukoni bw’ebihagha.
28 Nikwa ekitingu kyamabisighala haghumerera isikyetalanda oko ngobi, kandi ikyabya nga kyabiribulirana, ekyo ni kisusu ky’omo ngobi, omuhereri akendimwahula mo oyo werire, kusangwa engobi imuyikabimba lisa.
29 “Omulume kutse omukali amasako obukoni oko mutwe kutse oko kaleghulo,
30 omuhereri akendisyayiteghererya obukoni obo. Bwamabilangirika nga bwingire emwisi erilaba oko ngobi, n’obweya bwaho bwamabya ibwabirisasuka n’eribya n’erangyi y’ejone* kandi ibwabiribya buke-buke, omuhereri iniakendyahula omundu oyo mo oyuterire. Ni bukoni bw’engobi y’oko mutwe kutse obw’esyonderu. Ni bihagha by’oko mutwe kutse eby’oko kaleghulo.
31 Nikwa omuhereri amalangira obukoni obo ibuli oko ngobi kw’endata-ndata, kandi isihali olweya losi-losi olukinire, litolere omuhereri iniahighula omundu oyo oko bandi omo biro 7.
32 Oko kiro kye 7, omuhereri akendisyayiteghererya obukoni obo. Ahalue obukoni hamabya isihetalanda kandi hamabya isihetasa olweya losi-losi olusasukire n’eribya n’erangyi y’ejone* kandi obukoni ibwalangirika nga buli endata-ndata oko ngobi sibwingire emwisi,
33 omundu oyo litolere iniasiswa. Aliwe isyendisiswa ahali obukoni; neryo omuhereri iniamuhighula oko bandi omo biro 7.
34 Oko kiro kye 7, omuhereri akendisyasyayiteghererya ahali obukoni. Obukoni b’oko ngobi y’omutwe n’ob’omo nderu, bwamabya isibwetalanda oko ngobi, kandi ibwalangirika nga sibwingire emwisi oko ngobi, aho omuhereri iniakendyahula omundu oyo mo oyo werire; naye litolere inyafula esyongyimba siwe, neryo iniera.
35 Nikwa enyuma sy’eryera riwe, kyamabilangirika ngoko obukoni obo bwabirilanda oko ngobi,
36 omuhereri akendisyayiteghererya omundu oyo. Obukoni obo bwamabya ibwabiritanda oko ngobi, omuhereri isyendisyayikenderya erirondya olweya lw’ejone;* omundu oyo sy’erire.
37 Nikwa omughulu akayitegereraya omundu oyo, amalangira obukoni isibwetatanda, n’obweya obukinire ibwabirilasaho, aho ini bugha ambu obukoni bwabirilama. Omundu oyo erire, n’omuhereri akendisyamwahula mo oyo werire.
38 Omulume kutse omukali amabyasako ebitingu oko ngobi* n’ebitingu ebyo ini byeru-byeru,
39 omuhereri akendisyayiteghererya ebitingu ebyo. Ebitingu ebyo byamabya ini byeru hake, eryo obo ini buhere buyira ibwabirilasa oko ngobi, omundu oyo erire.
40 “Esyonzwiri sy’omulume syamabilaghala oko mutwe wiwe neryo iniasako oluhala, aho inianerire.
41 Esyonzwiri syamabilaghala oko luhande lw’embere oko mutwe wiwe neryo iniabyako oluhala aho inianerire.
42 Aliwe omo luhala n’omo mitwano y’oko mbumo yiwe mwamabyasa ekiri nga kisuli ekihena-henirye, ebyo ini bihagha ebyamabilasa oko ngobi y’omutwe wiwe kutse oko mbumo yiwe.
43 Omuhereri akendisyayiteghererya ekisusu ekiryamubyako busana n’obukoni ekiri omo luhala l’oko mutwe wiwe kutse oko mbumo yiwe. Kyamabya ini kyeru-kyeru kandi ikisosire ebihagha oko ngobi yiwe,
44 oyo ini muhagha, sy’erire. Omuhereri akendisyamwahula mo oyuterire busana n’obukoni obuli oko mutwe wiwe.
45 Omundu oyukwire ebihagha esyongyimba siwe sikendisyatulangwa, n’esyonzwiri sy’oko mutwe wiwe sisyendisyasuwa, kandi akendisyaswika esyonderu sy’oko buno bwiwe* n’eribirikira ati: ‘Sinyerire! Sinyerire!’
46 Omo biro byosi by’obukoni bwiwe, akendisyabya oyuterire. Kundi sy’erire, akendisyayikala hali oko bandi. Akendisyikala ehihya w’ekambi.
47 “Obukoni bw’ebihagha bwamabyasa omo lukimba, lubye lukimba lw’obweya bw’embuli kutse olw’ekitani,
48 kibye omo buli kutse omo butambi bw’ekitani kutse bw’olukimba lw’obweya bw’embuli kutse oko ngobi kutse omo kindu ekikokotibwe omo ngobi,
49 ekitingu ekiryasa busana n’obukoni eky’erangyi y’ejone* eyirimo erangyi y’ebiti bibisi kutse erangyi y’olusasi-sasi, kyamabyasa omo lukimba, oko ngobi, kutse kyamabyasa omo buli kutse omo butambi-tambi kutse omo kindu kyosi-kyosi ekikokotibwe omo ngobi, obo ini bukoni bw’ebihagha; litolere ekyo ikyakanganibwa omuhereri.
50 Omuhereri akendisyayiteghererya obukoni obo n’erihighula ekindu ekyo omo biro 7.
51 Oko kiro kye 7, omughulu akayiteghereraya ekitingu ekyo, neryo inialangira ngoko kyabiritandirira omo lukimba omo luhande lw’obuli kutse olw’obutambi-tambi kutse oko ngobi (engobi eyo nomo yangabya iyikakolesibawa oko mubiiri wahi), ebyo ini bihagha ebikalire; ekindu ekyo isikyerire.
52 Litolere inyatimya olukimba olo kutse ahalukire omo buli-buli kutse omo butambi-tambi omo lukimba lw’obweya bw’embuli kutse omo kitani kutse omo kindu kyosi-kyosi ekikokotibwe omo ngobi ekiryasako obukoni. Kusangwa ebyo ni bihagha ebikalire, litolere ilwatimibwa omo muliro.
53 “Nikwa omughulu omuhereri akayiteghereraya olukimba, amalangira ngoko obukoni sibwetatandirira omo lukimba, kutse ahakokotibwe omo buli-buli kutse omo butambi-tambi, kutse omo kindu kyosi-kyosi ekikokotibwe omo ngobi,
54 omuhereri akendisyalayira ati ekindu ekyo ekiluemo obukoni, kyeribawe, neryo iniahighulakyo omo bindi biro 7.
55 Enyuma sy’eryeribwa ndeke, omuhereri akendisyasyayiteghererya ekindu ekyo. Ekitingu kyamabya ikikinasosire ngoko kinalue, nibya nomo obukoni obo bwangabya isibwetatandirira, ekindu ekyo isikyerire. Litolere iwatimyakyo omo muliro kusangwa kyabirilibwa n’ebihagha, emwisi wakyo kutse ehihya wakyo.
56 “Aliwe omuhereri abiyiteghererya ekindu ekyo kyabyeribwa ndeke, inialangira ngoko ekitingu ekyo kinemubya nga kikabulirana, akendisyasara ekitingu ekyo oko lukimba kutse oko ngobi kutse oko ahalukire omo buli-buli kutse omo butambi-tambi.
57 Nikwa kyamabya ikikinalangirika ahandi handu omo lukimba oko ahalukire omo buli-buli kutse omo butambi-tambi kutse oko kindu kyosi-kyosi ky’engobi, aho ekitingu ekyo ikinemutandirira. Litolere iwatimya ekindu ekiriko obukoni omo muliro.
58 Nikwa obukoni bwamabibulirana omo lukimba kutse oko halukire omo buli-buli kutse omo butambi-tambi kutse oko kindu kyosi-kyosi ky’engobi ekyo ulyeraya, litolere ekindu ekyo ikyatasyeribwa, neryo kikendisyabya ekyerire.
59 “Oyu wo mughambo owalebirye obukoni bw’ebihagha ebyangasa omo lukimba lw’obweya bw’embuli, kutse omo lukimba lw’ekitani, kutse, omo halukire omo buli-buli kutse omo butambi-tambi, kutse obwangasa oko kindu kyosi-kyosi ky’engobi, busana n’eryahulakyo mo kyerire kutse ekiterire.”
Amaelezo awehikwa
^ Ekinywa ky’Ekiebrania ekikabindulawa mo “bihagha” kiwite amaana mangyi, kandi kyanganahiramo n’awandi makoni w’engobi awakasighalira. Kyanganabyamo n’amakoni awakasungika omo syongyimba n’oko manyumba.
^ Kinywa kwa kinywa, “oko ngoba y’omubiri wiwe.”
^ Kutse “obukoni.”
^ Kutse “engendo y’akabiri.”
^ Kutse “syangasighalirya obukoni.”
^ Kutse “ekihute.”
^ Kutse “ekihute.”
^ Kutse “kihute.”
^ Kutse “ekihute.”
^ Kutse “erangyi y’ekisande; erangyi y’ekikene.”
^ Kutse “erangyi y’ekisande; erangyi y’ekikene.”
^ Kutse “erangi y’ekisande; erangyi y’ekikene.”
^ Kinywa kwa kinywa, “oko ngobi y’emibiri yabo.”
^ Kutse “esyonderu sy’oko munywa wiwe w’endata.”
^ Kutse “erangyi y’ekisande; erangyi y’ekikene.”
