Abalawi 14:1-57
14 Yehova mwasyabugha na Musa ati:
2 “Omughambo w’erikwama ekiro omuhagha akendisyahulwa mo mundu oyo werire, omughulu akendisyaletwa eyiri omuhereri w’ono:
3 Omuhereri akendisyaya ehihya w’ekambi, neryo iniayiteghererya omundu oyo. Ebihagha byamabya ibyabirilama,
4 omuhereri akendisyamutswa ehinyunyu hibiri ehiriho ehy’erire, omuti w’omuerezi, olukimba lw’erangyi y’omusasi eyihena-henirye, n’ehisopo, atoke eryeribwa.
5 Omuhereri akendisyabugha ati akanyunyu kaghuma kitirawe omo kindu ky’omutaka ekirimo amaghetse awalyatehawa oko lusi.
6 Nikwa akendisyimya akanyunyu akakiriho, haghuma n’omuti w’omuerezi, olukimba lw’erangyi y’omusasi eyihena-henirye, n’ehisopo, n’erilubikabyo haghuma omo musasi w’akanyunyu akalyakererawa endata oko maghetse w’olusi.
7 Akendisyatsatsangagho ngendo 7 oko mundu oyukayeraya oko bihagha n’erimwahula mo oyo werire. Neryo akendisyaleka akanyunyu akaliho ikaghenda.
8 “Oyukayeraya litolere inyafula esyongyimba siwe n’erisisa esyonzwiri siwe syosi n’erinaba omo maghetse, neryo iniabya oyo werire. Enyuma sy’aho inianganasa omo kambi, nikwa akendisyikala ehihya w’ehema yiwe ebiro 7.
9 Oko kiro kye 7, akendisyasisa esyonzwiri syosi sy’oko mutwe wiwe, esyonderu siwe, n’ebikighe* biwe. Akendisyabya abisisa esyonzwiri siwe syosi, inyafula esyongyimba siwe n’erinaba omo maghetse. Neryo akendisyabya oyo werire.
10 “Oko kiro kye 8, akendisyimya esyombangale ibiri esiteko bulema esikine nyilere-nyilere, embuli y’obukali* ey’omwaka mughuma eyiteko bulema, ebisatu by’omw’ikumi bye efa* by’eyisyano eyiswererere* eyitulungene n’amaghuta mo buhere bw’eyisyano, n’elogi* nguma y’amaghuta.
11 N’omuhereri oyukahula omundu oyo mo oyo werire akendisyaleta omundu oyukayeraya oyo haghuma n’amahere, embere sya Yehova oko lukyo lw’ehema y’erihindanamo.
12 Omuhereri ekendisyimya embangale nguma eyikine nyilere, iniahererayo mo buhere bw’olubanza* haghuma n’akalengyi kaghuma k’elogi ak’amaghuta. Akendisyahungya-hungyabyo mo buhere bw’erihungya-hungya embere sya Yehova.
13 Neryo akendisyakerera embangale eyo ahakanakererawa obuhere bw’erilolo, n’obuhere bw’eryokererya, omo mwanya owabuyirire. Kusangwa ng’obuhere bw’erilolo, obuhere bw’olubanza* nabo ni bw’omuhereri. Ni kindu ekibuyirire kutsibu.
14 “Neryo omuhereri akendisyimya oko musasi w’obuhere bw’olubanza.* Akendisyahiragho oko luhande lw’eyikwa lw’okutu kw’amali kw’oyukayeraya, n’oko kikumo ky’ebyala biwe by’amali n’oko rinono ly’obulume ly’ekisando kiwe ky’amali.
15 Omuhereri akendisyimya oko maghuta, akalengyi kaghuma k’elogi n’eryutagho omo kighanza ky’ebyala biwe by’amalembe.
16 Neryo omuhereri akendisyatulya omunwe wiwe w’amali omo maghuta awali omo kighanza ky’ebyala biwe by’amalembe, n’eritsatsanga amaghuta awali oko munwe ayo ngendo 7 embere sya Yehova.
17 Neryo omuhereri akendisyimya oko maghuta awakisiya omo kighanza kiwe. Akendisyahiragho oko luhande lw’eyikwa l’okutu kw’amali kw’oyukayeraya n’oko kikumo ky’ebyala biwe by’amali n’oko rinono riwe ry’obulume ly’oko kisando kiwe ky’amali, endata oko musasi w’obuhere bw’olubanza.*
18 Omuhereri akendisyahira amaghuta awakisiya omo kighanza ky’ebyala biwe oko mutwe w’oyukayeraya. Neryo akendisyamulihira embanulo embere sya Yehova.
19 “Omuhereri akendisyaherera obuhere bw’erilolo n’erilihira embanulo omundu oyo oyukayeraya oko butsandirya bwiwe, n’enyuma sy’aho akendisyakera obuhere bw’eryokererya.
20 Omuhereri akendisyaherera obuhere bw’eryokererya n’obuhere bw’eyisyano oko kiherero, neryo akendisyamulihira embanulo. Neryo omundu oyo iniabya omundu oyo werire.
21 “Nikwa amabya ini mwera, isyawiteki, akendisyaleta embangale nguma eyikine nyilere mo buhere bw’olubanza busana n’obuhere bw’erihungya-hungya, busana n’eriyilihira embanulo. Akendisyaleta n’ekighuma ky’omw’ikumi kye efa* ky’eyisyano eyiswererere* eyitulungenemo amaghuta mo buhere bw’eyisyano, n’elogi nguma y’amaghuta,
22 n’ehitungula hibiri kutse ehipijo hibiri ehikine hilere-hilere erikwamana n’ebyo angabana; akaghuma busana n’obuhere bw’erilolo n’akandi busana n’obuhere bw’eryokererya.
23 Oko kiro kye 8, akendisyaletabyo eyiri omuhereri oko lukyo lw’ehema y’erihindanamo embere sya Yehova busana n’eryera liwe.
24 “Omuhereri akendisyimya embangale eyikine nyilere ey’obuhere bw’olubanza* n’elogi y’amaghuta. Neryo akendisyahungya-hungyabyo embere sya Yehova mo buhere bw’erihungya-hungya.
25 Neryo akendisyakera embangale eyikine nyilere ey’obuhere bw’olubanza* n’erimya oko musasi w’obuhere bw’olubanza, iniahiragho oko luhande lw’eyikwa lw’okutu kw’amali kw’oyukayeraya, n’oko kikumo ky’ebyala biwe by’amali, n’oko rinono ry’obulume ry’ekisando kiwe ky’amali.
26 Omuhereri akendisyuta oko maghuta ayo omo kighanza ky’ebyala biwe by’amalembe.
27 Neryo amaghuta awali omo kighanza ky’ebyala biwe by’amalembe ayo, akendisyimya kugho omo munwe wiwe w’amali n’eritsatsangagho ngendo 7 embere sya Yehova.
28 Omuhereri akendisyahira oko maghuta awali omo kighanza kiwe oko luhande lw’eyikwa l’okutu kw’amali kw’oyukayeraya n’oko kikumo ky’ebyala biwe by’amali n’oko rinono ry’obulume ry’ekisando kiwe ky’amali, aho analyahira omusasi w’obuhere bw’olubanza.*
29 Amaghuta awakisiya omo kighanza kiwe ky’ebyala, omuhereri akendisyahiragho oko mutwe w’oyukayeraya busana n’erimulihira embanulo embere sya Yehova.
30 “Akendisyaherera akaghuma k’oko hitungula kutse akaghuma k’oko hipijo hilere-hilere, erikwamana n’ekyo angabana;
31 akaghuma mo buhere bw’erilolo n’akandi mo buhere bw’eryokererya, erikwamana n’ebyo angabana, haghuma n’obuhere bw’eyisyano. Neryo omuhereri akendisyaliha embanulo busana n’oyukayeraya embere sya Yehova.
32 “Oyu wo mughambo busana n’oyulue alwere ebihagha, aliwe isyawite ekindu omughulu w’eryeribwa liwe.”
33 Neryo Yehova mwabugha na Musa na Haruni ati:
34 “Mukendisyabya mwabihika omo kihugho kye Kanana, ekyo ngabaha mo mwandu, neryo namabihunza enyumba nguma omo kihugho kyenyu omo bihagha,
35 omwenye enyumba eyo litolere iniaghenda ew’omuhereri n’erimubwira ati, ‘Omo nyumba yaghe mwabiribya obuli nga bukoni.’
36 Omuhereri akendisyalayira ati balusaye ebindu byosi by’omo nyumba embere ase erisyayiteghererya obukoni obo. Akendisyakola atya, akasyahula ebindu byosi ebiri omo nyumba eyo mo ebiterire. N’enyuma sy’aho, omuhereri akendisyingira n’eriyiteghererya enyumba eyo.
37 Omuhereri akendisyayiteghererya ahali obukoni. Neryo oluhimbo lwamabyamo emyanya eyabirihodoka ey’erangyi y’ejone* eyirimo erangyi y’ekiti kibisi kutse ey’olusasi-sasi kandi iyabya nga yingire omo luhimbo mw’emwisi,
38 omuhereri akendisyahuluka inyimana oko lukyo lw’enyumba eyo neryo iniahighulayo omo biro 7.
39 “Oko kiro kye 7, omuhereri akendisyasubayo inyayiteghererya enyumba eyo. Obukoni bwamabya ibwabirilanda omo syombimbo sy’enyumba eyo,
40 omuhereri akendisyabugha ati bahimbule amabwe awaliko abukoni n’erighusagho ehihya w’omuyi, omo mwanya owaterire.
41 Neryo akendisyabugha ati bahale ndeke oluhimbo lw’enyumba eyo, emwisi. Neryo epoto y’erisiripamo n’epoto y’erihimbirako eyikendisyahalwa, iyaghuswa ehihya w’omuyi, omo mwanya owaterire.
42 Neryo bakendisyimya awandi mabwe n’erihiragho aho balyalusaya awandi. Kandi litolere iniakolesya eyindi poto n’eribugha ati enyumba isiripawe.
43 “Nikwa, enyuma sy’erilusya oko nyumba eyo kw’amabwe n’erihalayo n’eritasyasiripayo, obukoni bwamabisyasuba,
44 omuhereri akendisyingiramo n’eriyiteghereryayo. Obukoni bwamabya ibwabirilanda-landa omo nyumba, ebyo ini bihagha ebikalire ebyabiryasa omo nyumba, enyumba eyo siyerire.
45 Akendisyabugha ati enyumba eyo yiteribawe—amabwe wayo, esyombagho syayo, epoto yosi y’erihimbirako, n’epoto y’erisiripamo—ibyahekerwa ehihya w’omuyi, omo mwanya owaterire.
46 Nikwa owosi-wosi oyukingira omo nyumba eyo omo biro byayo by’erihighulwa, akendisyabya oyuterire erihika omw’igholo-gholo;
47 n’owosi-wosi oyukaghotsera omo nyumba eyo, litolere inyafula esyongyimba siwe. N’owosi-wosi oyukalira omo nyumba eyo, litolere inyafula esyongyimba siwe.
48 “Aliwe enyumba eyo yabitasyasiripwa, omuhereri amabisyayiteghereryayo, neryo inieya obukoni isibwetalanda, omuhereri akendisyahula enyumba eyo mo eyerire, kundi obukoni ibwabirilama.
49 Busana n’eryerya enyumba eyo oko butsandirya,* akendisyimya ehinyunyu hibiri, omuti w’omuerezi, olukimba lw’erangyi y’omusasi eyihena-henirye, n’ehisopo.
50 Akendisyakerera akanyunyu kaghuma omo kindu ky’omutaka ekirimo amaghetse awalyatehawa oko lusi.
51 Neryo akendisyimya omuti w’omuerezi, ehisopo, olukimba lw’erangyi y’omusasi eyihena-henirye, n’akanyunyu akakiriho, inialubikabyo omo musasi w’akanyunyu akalyakerawa n’omo maghetse awalyatehawa oko lusi, iniatsatsangagho oko nyumba eyo ngendo 7.
52 Akendisyerya enyumba eyo oko butsandirya* erilabira omusasi w’akanyunyu, amaghetse awalyatehawa oko lusi, akanyunyu akakiriho, omuti w’omuerezi, ehisopo, n’olukimba lw’erangyi y’omusasi eyihena-henirye.
53 Enyuma sy’aho, akendisyalwikira akanyunyu akakiriho ehihya w’omuyi, inialihira enyumba eyo y’embanulo, neryo iyabya ey’erire.
54 “Oyu wo mughambo owalebirye obukoni bosi-bosi bw’ebihagha, obukoni bw’oko ngoba y’omutwe, kutse ob’oko syonderu,
55 ebihagha by’olukimba kutse eby’enyumba,
56 n’owalebirye ebisusu, ebikokyo, n’ebitingu,
57 busana n’erisoha omughulu ekindu kyerire n’omughulu kiterire. Oyu wo mughambo owalebirye ebihagha.”
Amaelezo awehikwa
^ Kutse “amakiki.”
^ Kutse “etsughutsi.”
^ Ebisatu by’omw’ikumi bye efa ini litre 6.6. Ulebaye Endomeko B14.
^ Kutse “ey’enzelele.”
^ Elogi nguma ini litre 0.31. Ulebaye Endomeko B14.
^ Kutse “obuhere bw’omusango.”
^ Kutse “obuhere bw’omusango.”
^ Kutse “obuhere bw’omusango.”
^ Kutse “obuhere bw’omusango.”
^ Ekighuma ky’omw’ikumi kye efa ini litre 2.2. Ulebaye Endomeko B14.
^ Kutse “ey’enzelele.”
^ Kutse “obuhere bw’omusango.”
^ Kutse “obuhere bw’omusango.”
^ Kutse “obuhere bw’omusango.”
^ Kutse “erangyi y’ekisande; erangyi y’ekikene.”
^ Kinywa kwa kinywa, “erilolo.”
^ Kinywa kwa kinywa, “erilolo.”
