Abalawi 15:1-33
-
Omutsafu erilua omo bitsuko by’olubuto (1-33)
15 Yehova mwasyabugha na Musa na Haruni ati:
2 “Mubwire Abaisraeili muti, ‘Omulume amabisendya omutsafu omo kitsuko* kiwe ky’olubuto, ekyo kikaleka iniabya oyuterire.
3 Erisendya omutsafu eryo likendileka iniabya oyuterire. Omutsafu oyo abye inianemusenda omo bitsuko biwe by’olubuto kutse iniabya ng’amumbya erisenda, akendisighala iniane oyuterire.
4 “‘Engyingo yosi-yosi eyo oyukasendaya omutsafu akendisyaghotserako, ikendisyabya eyiterire. N’ekindu kyosi-kyosi ekyo akendisyikalako, nakyo kikendisyabya ekiterire.
5 Omundu oyukendisyatula oko ngyingo yiwe, akendisyafula esyongyimba siwe kandi akendisyanaba omo maghetse n’eribya oyuterire erihika omw’igholo.
6 N’omundu wosi-wosi oyukendisyikala oko kindu ekilue kikereko omundu oyukasendaya omutsafu, akendisyafula esyongyimba siwe, inyanaba omo maghetse, n’eribya oyuterire erihika omw’igholo.
7 Owosi-wosi oyukatula oko mubiri w’omundu oyukasendeya omutsafu, akendisyafula esyongyimba siwe, inyanaba omo maghetse n’eribya oyuterire erihika omw’igholo.
8 Omundu oyukasendaya omutsafu amabitwira oko mundu oyo werire kw’amatandi, omundu oyo akendisyafula esyongyimba siwe, inyanaba omo maghetse, n’eribya oyuterire erihika omw’igholo.
9 Ekindu kyosi-kyosi eky’erikalirako oko mughongo w’enyama, ekyo omundu oyukasendaya omutsafu akendisyikalako, kikendisyabya ekiterire.
10 Omundu wosi-wosi oyukatula oko kindu ekyo oyukasendaya omutsafu alue ikereko, akendisyabya oyuterire erihika omw’igholo. N’oyukendisyaheka ebindu ebyo, akendisyafula esyongyimba siwe, inyanaba omo maghetse n’eribya oyuterire erihika omw’igholo.
11 Omundu oyukasendaya omutsafu amabitula oko mundu isyalitanaba oko byala, litolere omundu oyo inyafula esyongyimba siwe n’erinaba omo maghetse n’eribya oyuterire erihika omw’igholo.
12 Ekindu kyosi-kyosi ekikokotibwe omo ribumba ekyo omundu oyukasendya omutsafu akendisyatulako, kikendisyatulangwa, n’ekindu ekikokotibwe omo muti kikendisyeribwa omo maghetse.
13 “‘Erisendya omutsafu erilue rikaleka iniabya oyuterire ryamabyumbya, omundu oyo akendisyaghanza ebiro 7 busana n’eryeribwa riwe; neryo akendisyafula esyongyimba siwe, inianabira omo maghetse awakasenda, neryo iniabya oyo werire.
14 Oko kiro kye 8, akendisyimya ehitungula hibiri kutse ehipijo hibiri ehikine hilere-hilere, neryo inialetahyo embere sya Yehova oko lukyo lw’ehema y’erihindanamo, iniahahyo omuhereri.
15 Omuhereri akendisyahererahyo, akaghuma mo buhere bw’erilolo n’akandi mo buhere bw’eryokererya; neryo omuhereri akendisyaliha embanulo busana naye embere sya Yehova, busana n’obutsandirya bwiwe.
16 “‘Omulume amabiluamo obuhalya* litolere inianaba oko mubiri wosi omo maghetse n’eribya oyuterire erihika omw’igholo.
17 Olukimba oluliko obuhalya* n’engobi yosi-yosi eyiriko obuhalya akendisyeryabyo omo maghetse kandi bikendisyabya ebiterire erihika omw’igholo.
18 “‘Omulume amabighotsera n’omukali neryo omulume inialusya obuhalya,* ababiri bosi bakendisyanaba omo maghetse n’eribya abaterire erihika omw’igholo.
19 “‘Omukali amabiluako omusasi kundi ali omo biro biwe by’omwisi,* akendisyabya oyuterire omo biro 7. N’omundu wosi-wosi oyukamutulako akendisyabya oyuterire erihika omw’igholo.
20 Ekindu kyosi-kyosi ekyo akendisyaghotserako iniakine omo butsandirya bwiwe bw’ebiro biwe by’omwisi* kikendisyabya ekiterire; n’ekindu kyosi-kyosi ekyo akendisyikalako kikendisyabya ekiterire.
21 Omundu wosi-wosi oyukendisyatula oko ngyingo y’omukali oyo, akendisyafula esyongyimba siwe, inyanaba omo maghetse, n’eribya oyuterire erihika omw’igholo.
22 Omundu wosi-wosi oyukikala oko kindu ekyo alyikalako, akendisyafula esyongyimba siwe, inyanaba omo maghetse, n’eribya oyuterire erihika omw’igholo.
23 Omundu wosi-wosi oyukendisyatula oko ngyingo kutse oko kindi kindu ekyo omukali oyo alue ikereko, akendisyabya oyuterire erihika omw’igholo.
24 N’omulume amabighotsera naye neryo omutsafu w’omo biro biwe by’omwisi* inyamuhikako, akendisyabya oyuterire omo biro 7. N’engyingo yosi-yosi eyo omulume oyo akendisyaghotserako, ikendisyabya eyiterire.
25 “‘Omukali amabiluako omusasi omo biro bingyi kandi isi bye biro biwe by’omwisi,* kutse omusasi amabilola embere erimuluako erilabya oko biro biwe by’omwisi, akendisyabya oyuterire omo biro byosi by’eriluako omusasi oyo, ngoko akanabya oyuterire omo biro biwe by’omwisi.
26 Engyingo yosi-yosi eyo akendisyaghotserako kutse ekindu kyosi-kyosi ekyo akendisyikalako omo biro biwe by’eriluako omusasi, bikendisyabya ebiterire ng’omughulu w’obutsandirya bw’ebiro biwe by’omwisi.*
27 Omundu wosi-wosi oyukatula kubyo, akendisyafula esyongyimba siwe, inianaba omo maghetse, n’eribya oyuterire erihika omw’igholo.
28 “‘Aliwe ekiro akendisyera okw’iluako omusasi riwe, akendisyayighanzira ebiro 7, n’enyuma sy’aho akendisyabya oyo werire.
29 Oko kiro kye 8 akendisyaleta ehitungula hibiri kutse ehipijo hibiri ehikine hilere-hilere. Akendisyaleterahyo omuhereri oko lukyo lw’ehema y’erihindanamo.
30 Omuhereri akendisyayira akaghuma mo buhere bw’erilolo n’akandi mo buhere bw’eryokererya. Neryo omuhereri akendisyaliha embanulo busana naye embere sya Yehova busana n’obutsandirya bw’eriluako omusasi riwe.
31 “‘Ko mukendisyateya* mutya Abaisraeli oko butsandirya bwabo, bakasyahola omo butsandirya bwabo busana n’erihalya oko tabernakulo yaghe eyiri omo kati-kati kabo.
32 “‘Oyu wo mughambo owalebirye omulume oyukasendaya omutsafu, omulume oyukabya oyuterire busana n’erilusya obuhalya,*
33 owalebirye omukali omughulu ali omo butsandirya bwiwe bw’ebiro by’omwisi,* omulume kutse omukali oyukaluamo omutsafu omo mubiri wiwe, n’omulume oyukaghotsera n’omukali oyuterire.’”
Amaelezo awehikwa
^ Kinywa kwa kinywa, “omubiri wiwe.”
^ Kutse “sperme.”
^ Kutse “sperme.”
^ Kutse “sperme.”
^ Kutse “omughesera; regle.”
^ Kutse “omughesera; regle.”
^ Kutse “omughesera; regle.”
^ Kutse “omughesera; regle.”
^ Kutse “omughesera; regle.”
^ Kutse “mukendisyahighula.”
^ Kutse “sperme.”
^ Kutse “omughesera; regle.”
