Abalawi 16:1-34
-
Ekiro ky’Embanulo (1-34)
16 Abaghala ba Haruni babiri abasa embere sya Yehova babere babihola, Yehova mwakania na Musa.
2 Yehova mwabwira Musa ati: “Ubwire mughala wenyu ye Haruni uti, syabye akingira oko buli ndambi ahabuyirire enyuma w’erido; akasyahola, kusangwa ngendihulukira oko mufuniko w’erisanduku omo kitu.
3 “Bino byo Haruni akendisyabya akasa nabyo akasa ahabuyirire: enume y’ende eyikine nyilere y’obuhere bw’erilolo, n’embangale y’obuhere bw’eryokererya.
4 Akendisyambala ekanzu eyibuyirire y’ekitani n’akapitula* k’ekitani kakendisyaswika omubiri wiwe.* Akendisyambala omukaba w’ekitani omo mbindi yiwe n’erihira esapu y’ekilemba oko mutwe wiwe. Ni syongyimba esibuyirire. Akendisyanaba omo maghetse, neryo iniambalasyo.
5 “Akendisyimya erilua oko ndeko ye Isareli, esyombaya ibiri esikine nyilere-nyilere mo buhere bw’erilolo; n’embangale nguma mo buhere bw’eryokererya.
6 “Haruni akendisyaherera enume y’ende ey’obuhere bwiwe bw’erilolo. Akendisyaliha embanulo busana naye iyuwene-wene n’enyumba yiwe.
7 “Akendisyimya esyombene* ibiri esyo, inyimaniasyo embere sya Yehova oko lukyo lw’ehema y’erihindanamo.
8 Haruni akendisyakola obukanga oko syombene* ibiri esyo. Obukanga busana na Yehova n’obundi bukanga busana na Azazeli.*
9 Embene* eyo obukanga bukendisyasombola mo ya Yehova, Haruni akendisyahererayo n’erikolayo mo buhere bw’erilolo.
10 Aliwe embaya eyo obukanga bukendisyasombola mo ya Azazeli, ikendisyaletwa embere sya Yehova iyineho busana n’erikolera kuyo kw’erikinga ly’embanulo, neryo iyahighirwa omo mbwarara busana na Azazeli.
11 “Haruni akendisyaherera enume y’ende ey’obuhere bwiwe bw’erilolo; neryo iniateka embanulo busana naye na busana n’enyumba yiwe. Enyuma sy’aho, akendisyakera enume y’ende ey’obuhere bwiwe bw’erilolo.
12 “Neryo akendisyimya ekindu ky’erihekamo omuliro ekyoswiremo amakala awaliko omuliro erilua oko kiherero embere sya Yehova, n’ebyala bibiri ebyoswiremo obukwa bw’obubani; neryo akendisyaletabyo enyuma sy’erido.
13 Neryo akendisyahira obukwa oko muliro embere sya Yehova. N’omuki owakalua omo bukwa, akendisyaswika omufuniko w’oko Risanduku ry’Endaghane, akasyahola.
14 “Akendisyimya n’oko musasi w’enume y’ende eyo, iniatsatsangagho omo munwe wiwe embere sy’omufuniko oko luhande lw’eyo eryuba rikasira. Akendisyimya n’oko musasi oyo, inyatsatsangagho omo munwe wiwe ngendo 7 embere sy’omufuniko.
15 “Enyuma sy’aho, akendisyakera embene y’obuhere bw’abandu obw’erilolo. Akendisyaleta omusasi wayo enyuma w’erido, n’eriyira omusasi oyo ngoko analyayira omusasi w’enume y’ende. Akendisyatsatsangagho erilolera eyiri omufuniko n’embere sy’omufuniko.
16 “Akendisyalihira ahabuyirire h’embanulo busana n’amategheko w’obutsandirya bw’Abaisraeli, na busana n’amakosa wabo n’amalolo wabo. N’ekyo kyo atolere erikola busana n’ehema y’erihindanamo eyiri omo kati-kati kabo omo kati-kati k’amategheko wabo w’obutsandirya.
17 “Omughulu Haruni akingira omo hema y’erihindanamo akayateka embanulo ahabuyirire, siritolere oghundi mundu wosi-wosi inyabya omo hema y’erihindanamo erihika aho akendiluiramo. Akendisyaliha embanulo busana naye iyuwene-wene n’enyumba yiwe, na busana n’endeko yosi ye Israeli.
18 “Neryo akendisyahuluka, iniasa ahali ekiherero ekiri embere sya Yehova n’erilihirakyo embanulo. Akendisyimya oko musasi w’enume y’ende n’oko musasi w’embne iniahiragho oko mahembe w’ekiherero oko mbande syosi.
19 Akendisyimya n’oko musasi oyo inyatsatsangagho omo munwe wiwe oko kiherero ko ngendo 7. Akendisyeryakyo n’eriyirakyo mo kibuyirire busana n’amategheko w’obutsandirya bw’Abaisraeli.
20 “Akendisyabya abibugha eriteka embanulo busana n’ahabuyirire, n’ehema y’erihindanamo, n’ekiherero, akendisyaleta embene eyiriho.
21 Haruni akendisyahira ebyala biwe bibiri oko mutwe w’embaya eyiriho eyo. Akendisyaghungamira kuyo kw’ebibi byosi by’Abaisraeli, amakosa wabo, n’amalolo wabo. Akendisyahirabyo oko mutwe w’embaya eyo. Neryo akendisyahirayo omo byala by’omundu oyulyasombolawa erikola ekyo;* n’omundu oyo akendisyalwikirayo omo mbwarara.
22 Embne eyo ikendisyaheka amalolo wabo wosi omo mbwarara; neryo akendisyalwikirayo omo mbwarara.
23 “Neryo Haruni akendisyingira omo hema y’erihindanamo, inialusya esyongyimba sy’ekitani esyo alyambala akingira ahabuyirire; neryo akendisyasigha sy’omo.
24 Akendisyanaba omo maghetse omo mwanya owabuyirire; neryo inyambala esyongyimba siwe. N’enyuma sy’aho, akendisyasa iniaherera obuhere bwiwe bw’eryokererya n’obuhere bw’abandu bw’eryokererya busana n’eriyilihira embanulo n’erilihira abandu b’embanulo.
25 Akendisyahisirirya ebisabu by’obuhere bw’erilolo oko kiherero busana n’erilusya omuki.
26 “Omulume oyulyatwala embene busana na Azazeli, akendisyafula esyongyimba siwe n’erinaba omo maghetse; n’enyuma sy’aho, inianganasuba omo kambi.
27 “N’enume y’ende y’obuhere bw’erilolo n’embaya y’obuhere bw’erilolo, ebyo omusasi wabyo aletawa ahabuyirire busana n’eriliha embanulo, bikendisyatwalwa ehihya w’ekambi. Neryo esyongobi syasyo, esiswi syasyo, n’amase wasyo, bikendisyahisiriribwa omo muliro.
28 Oyukendisyahisyabyo, litolere inierya esyongyimba siwe n’erinaba omo maghetse; n’enyuma w’aho inianganasuba omo kambi.
29 “Oyu ni mughambo w’omughulu wosi busana nenyu: Oko kiro kye 10 omo mwisi we 7, mukendisyayaghalya* busana n’amalolo wenyu, kandi siritolere imwakola omubiiri wosi-wosi; abye mbutirwa y’omo kihugho kutse omubunga oyo wikere omo kati-kati kenyu.
30 Oko kiro ekyo mukendisyalihirwa embanulo mutoke eribya ab’erire. Mukendisyeribwa oko malolo wenyu wosi embere sya Yehova.
31 Ni sabato y’eriluhuka rinene busana nenyu. Litolere imwayaghalya.* Oyo ni mughambo w’omughulu wosi.
32 “Omuhereri oyukahirawako amaghuta, oyukasinga* erikola omubiiri w’obuhereri omo mwanya wa baba wiwe, akendisyabya akaliha embanulo kandi akendisyabya akambala esyongyimba sy’ekitani, esyongyimba esibuyirire.
33 Akendisyabya akaliha embanulo busana n’ahabuyirire kutsibu, n’ehema y’erihindanamo, n’ekiherero. Akendisyabya akaliha embanulo busana n’abahereri n’abandu bosi b’omo ndeko.
34 Oyu akendisyabya mughambo w’omughulu wosi busana nenyu; erilihira Abaisraeli b’embanulo busana n’amalolo wabo kaghuma oko mwaka.”
Neryo Haruni mwakola ngoko Yehova anabya iniabirilayira Musa.
Amaelezo awehikwa
^ Kutse “esyongyimba sy’eryambalira emwisi.”
^ Kutse “omubiri wiwe owakalangirika.”
^ Kutse “esyombaya.”
^ Kutse “esyombaya.”
^ Alinga kikamaanisaya embaya eyikabulirana.
^ Kutse “embaya.”
^ Kutse “omulume oyo wimeneho inianayiteghekire.”
^ Kutse “mukendisyaghalya esyonafsi syenyu.” Kangyi-kangyi ekinywa “eriyaghalya,” kikamaanisaya emihanda mbiriri-mbiriri y’eriyikagha emyatsi milebe; erihirako n’amafungo.
^ Kutse “mukendisyaghalya esyonafsi syenyu.”
^ Kinywa kwa kinywa, “oyo ebyala biwe bikendisyusulibwa.”
