Abalawi 18:1-30
-
Emyatsi y’engyingo eyitahamulirwe (1-30)
18 Yehova mwalola embere eribugha na Musa ati:
2 “Ukanaye n’Abaisraeli ubwirebo uti, ‘Ingye indi Yehova Mungu wenyu.
3 Isimwayighendaya ngoko bakayighendaya e Misri eyo mwabya mwikere, kandi isimwakola ngoko bakakola omo kihugho kye Kanana eyo ngabatwala, kandi isimwakwama emitsye yabo.
4 Litolere imwakwama emighambo yaghe, kandi litolere imwasikya ebyalayiro byaghe n’erikwamabyo. Ingye indi Yehova Mungu wenyu.
5 Litolere imwakwama ebyalayiro byaghe n’emighambo yaghe. Oyukakwamabyo, akendisyabyaho busana nabyo. Ingye indi Yehova.
6 “‘Omulume wosi-wosi omo kati-kati kenyu isyaseghera hakuhi n’omutunga wiwe ati akaghotsera* naye. Ingye indi Yehova.
7 Isiwakola emyatsi y’engyingo na baba waghu, kandi isiwakola emyatsi y’engyingo na mama waghu. Ni mama waghu, siritolere ukakola naye emyatsi y’engyingo.
8 “‘Isiwakola emyatsi y’engyingo n’omukali wa baba waghu; aho ukendibya iwamahemula* baba waghu.
9 “‘Siritolere ukakola emyatsi y’engyingo na mwali wenyu; abye mwali wa baba waghu kutse mwali wa mama waghu, abye iniabutawa omo nyumba nguma naghu kutse iyehe.
10 “‘Siritolere ukakola emyatsi y’engyingo na mwali wa mughala waghu kutse na mwali wa mwali waghu, kusangwa ni ndumbu yaghu.
11 “‘Siritolere ukakola emyatsi y’engyingo na mwali w’omukali wa baba waghu, olubuto lwa baba waghu, kusangwa ni mwali wenyu.
12 “‘Siritolere ukakola emyatsi y’engyingo na songali waghu, kusangwa ni mutunga wa hakuhi wa baba waghu.
13 “‘Siritolere ukakola emyatsi y’engyingo na mwali wabo mama waghu, kusangwa ni mutunga wa hakuhi wa mama waghu.
14 “‘Isiwahemula omughala wabo baba waghu omw’ikola emyatsi y’engyingo n’omukali wiwe, kusangwa ni mama waghu.
15 “‘Isiwakola emyatsi y’engyingo na mwalyana waghu, kusangwa ni mukali w’omughala waghu, siritolere ukakola naye emyatsi y’engyingo.
16 “‘Isiwakola emyatsi y’engyingo n’omukali w’omughala wenyu, kusangwa iwamahemula* mughala wenyu.
17 “‘Siritolere ukakola emyatsi y’engyingo n’omukali na mwali wiwe. Isiwimaya mwali wa mughala wiwe kutse omwali wa mwali wiwe uti ukakola nabo emyatsi y’engyingo. Ni batunga biwe ba hakuhi; oyo ni mwatsi owakita esisoni.*
18 “‘Isiwimaya omwali wabo mukali waghu mo mukali waghu w’akabiri, uti ukakola naye emyatsi y’engyingo omwali wabo iniakineho.
19 “‘Isiwaseghera hakuhi n’omukali iniane omo butsandirya bw’ebiro biwe by’omwisi* uti ukakola naye emyatsi y’engyingo.
20 “‘Siritolere ukakola emyatsi y’engyingo na mukali wa mulikyenyu,* ekyo ikikendileka iwabya oyuterire.
21 “‘Isiwasyaligha n’ahake omwana waghu akahererwa* oko Moleki. Siritolere ukatsandya erina ly’oMungu waghu omo nzira eyo. Ingye indi Yehova.
22 “‘Isiwaghotsera n’omulume ngoko ukaghotsera n’omukali, ekyo ni nye.
23 “‘Omulume siritolere akaghotsera n’enyama eriyitsandya muyo. N’omukali isyayihira embere sy’enyama ati akaghotsera nayo; ekyo sikirikoleka omo buhangwa.
24 “‘Isimwayitsandaya omo myatsi eyi, kusangwa ebihanda ebyo ngahigha embere syenyu byabiriyitsandya omo myatsi eyi;
25 ekyo kyabirileka ekihugho ekyo ikyatsanda, naghe ngendisuyirakyo busana n’ebibi byakyo, n’ekihugho ekyo kikendisyasala abikalani ba mukyo.
26 Aliwe inywe, litolere imwateya erihamula ryaghe n’emighambo yaghe. Simutolere mukakola omughuma w’oko myatsi y’esyonye eyi,
27 kusangwa abandu ababya bikere omo kihugho embere syenyu mubakola emyatsi y’esyonye yosi eyi, na busana n’ekyo, lino ekihugho ekyo sikyerire.
28 Neryo kundi inywe simwenditsandya ekihugho ekyo, sikyendisyabasala ngoko kikendisala ebihanda ebyabya embere syenyu.
29 Omundu wosi-wosi amabikola omughuma w’oko myatsi yosi eyikita nye eyi, abosi abakakolayo bakendisyalusibwa* omo kati-kati k’abandu babo.
30 Litolere imwateya ebihano byaghe. Isimwakwama emitsye eyikita nye eyabya ikakolwa n’ebihanda ebyabya embere syenyu, mukasyayitsandya muyo. Ingye indi Yehova Mungu wenyu.’”
Amaelezo awehikwa
^ Kinywa kwa kinywa, “erilangira endumbu yiwe.”
^ Kinywa kwa kinywa, “ni ndumbu ya baba waghu.”
^ Kinywa kwa kinywa, “ni ndumbu ya mughala wenyu.”
^ Kutse “omwatsi owakahemula; obutakenga obukalire.”
^ Kutse “omughesera; regle.”
^ Kutse “omuhimbani waghu; omwira waghu.”
^ Kutse “akahabwa oko Moleki.”
^ Kutse “bakendisyitwa.”
