Abalawi 2:1-16
-
Obuhere bw’eyisyano (1-16)
2 “‘Omundu* amabiletera Yehova y’obuhere bw’eyisyano, litolere inialeta eyisyano eyiswererere.* Kandi litolere inyuta kuyo kw’amaghuta n’erihira kuyo k’obubani.
2 Neryo akendisyaleterayo abaghala ba Haruni, abahereri. N’omuhereri akendisyimya ekighanza ky’ebyala ekyoswire ky’eyisyano eyiswererere* eyo n’amaghuta n’obubani bwayo bwosi. Neryo akendisyahisiriryayo oko kiherero mo kisosekanio* ky’obuhere obo busana n’erilusya omuki, obuhere obukahisibawa omo muliro, ekikumbo ekikatsemesaya* busana na Yehova.
3 Eyisyano yosi-yosi eyikasaka oko buhere bw’eyisyano, ni ya Haruni n’abaghala biwe. Ni kindu ekibuyirire kutsibu ekikalua omo mahere wa Yehova awakahisibawa omo muliro.
4 “‘Bamabileta obuhere bw’eyisyano eyiryasusawa oko furu, litolere iyabya eyisyano eyiswererere,* emikati y’omuviringo eyitemo elevire* n’eyirimo amaghuta, kutse emikati eyiri ng’ekitunza eyitemo elevire eyabirihakwako amaghuta.
5 “‘N’obuhere bwaghu bwamabya ini buhere bw’eyisyano eyikalangire oko luyo,* bukendisyabya bw’eyisyano eyiswererere* eyitemo elevire,* eyitulungene mw’amaghuta.
6 Litolere iyaghabwa mo hike-hike n’eryutwako amaghuta. Ni buhere bw’eyisyano.
7 “‘Obuhere bwaghu bwamabya ini buhere bw’eyisyano eyiryahukawa omo nyungu, litolere ibwabya bw’eyisyano eyiswererere* haghuma n’amaghuta.
8 Ukendisyaleta obuhere bw’eyisyano obulyakolawa omo bindu ebi embere sya Yehova. Neryo bukendisyaleterwa omuhereri naye inyaletabo hakuhi n’ekiherero.
9 N’omuhereri akendisyimya oko buhere bw’eyisyano obo ko hike mo kisosekanio* ky’obuhere obo n’erihisiriryahyo oko kiherero mo buhere bw’erihisya omo muliro, ekikumbo ekikatsemesaya* busana na Yehova.
10 Eyisyano eyikasaka oko buhere bw’eyisyano, ni ya Haruni n’abaghala biwe, ni kindu ekibuyirire kutsibu ekikalua omo mahere wa Yehova awakahisibawa omo muliro.
11 “‘Isimwaherera Yehova y’obuhere bosi-bosi bw’eyisyano obulimo elevire.* Kusangwa simutolere erihisirirya obundu bw’omukati obulimo elevire kutse obuki mo buhere obukahisibawa omo muliro busana na Yehova.
12 “‘Mwanganaleterabyo Yehova mo buhere bw’eby’erimbere ebikatsuka eryera. Aliwe siritolere bikaletwa oko kiherero mo buhere bw’ekikumbo ekikatsemesaya.*
13 “‘Obuli buhere bw’eyisyano obo ukaherera, litolere ibwalungwa omo munyu; kandi litolere iwakola ekyosi-kyosi omunyu w’endaghane y’oMungu waghu isyabula omo buhere bwaghu bw’eyisyano. Amahere waghu wosi ukendisyabya ukahereragho n’omunyu.
14 “‘Wamabiletera Yehova y’obuhere bw’eyisyano bw’eby’erimbere ebikatsuka eryera, ukendisyaleta enafaka nyihya-nyihya eyisusire oko muliro; enafaka nyihya-nyihya* eyabiritundulwa ndeke mo buhere bw’eyisyano bw’eby’erimbere ebyo ukatsuka eryerya.
15 Ukendisyuta kubo kw’amaghuta n’erihira kubo k’obubani. Ni buhere bw’eyisyano.
16 Omuhereri akendisyahisiriryabo mo kisosekanio* ky’obuhere obo butoke erilusya omuki, ni bughambu, ebyo alyimaya oko yisyano eyabiritundulwa ndeke, n’amaghuta n’obubani bwabo bosi. Ni buhere obukahisibawa omo muliro busana na Yehova.
Amaelezo awehikwa
^ Kutse “enafsi.”
^ Kutse “ey’enzelele.”
^ Kutse “ey’enzelele.”
^ Kutse “erighabo ry’ekibukyo kyayo.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “ey’enzelele.”
^ Kutse “ekihamya.”
^ Kutse “ey’enzelele.”
^ Kutse “ekihamya.”
^ Kutse “ekindu ky’erikalangako.”
^ Kutse “ey’enzelele.”
^ Kutse “erighabo ry’ekibukyo kyabo.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “ekihamya.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “amakundi awakine musekwa.”
^ Kutse “erighabo ry’ekibukyo kyabo.”
