Abalawi 20:1-27
20 Yehova mwasyabugha na Musa ati:
2 “Ubwire Abaisraeli uti, ‘Omuisraeli wosi-wosi kutse omubunga wosi-wosi oyo wikere omo Israeli oyukaha omwana wiwe oko Moleki litolere inialw’inyitwa. Abandu b’omo kihugho litolere ibamwita omo mabwe.
3 Naghe ngendisyahinia obusu bwaghe* busana n’omundu oyo kandi ngendisyamulusya* omo kati-kati k’abandu biwe kusangwa mwakaha omughuma w’oko bana biwe oko Moleki kandi mwakahalaya oko habuyirire haghe n’eritsandya erina lyaghe eribuyirire.
4 Abandu b’omo kihugho bamabiliba ameso omw’iyiririra oko ekyo omulume oyo akakola, akaha mughala wiwe oko Moleki, ibatamwita,
5 aho ingye, ingyuwene-wene ingendisyahinirya* omundu oyo n’ekihanda kiwe b’obusu bwaghe. Ingendisyalusya* omundu oyo omo kati-kati k’abandu biwe haghuma n’abosi abalyayighunga okw’iye omw’iraghana na Moleki.
6 “‘Omundu oyukaya oko abakakanaya n’esyombinga n’abalaghuli busana n’erikola nabo oburaghane bw’obunya-kirimu, kwenene-kwenene ngendisyahitana oko mundu oyo,* n’erimulusya* omo kati-kati k’abandu biwe.
7 “‘Litolere imwayihighula n’eribya babuyirire, kusangwa ingye indi Yehova Mungu wenyu.
8 Litolere imwateya emighambo yaghe n’erikwamayo, indi Yehova oyukabayira mo babuyirire.
9 “‘Hamabya omundu oyukatsuma* baba wiwe kutse mama wiwe, omundu oyo litolere inyitwa. Omusasi wiwe akendisyabya okw’iye kundi mwakatsuma baba wiwe kutse mama wiwe.
10 “‘Neryo oko oyukasingira n’omukali wa mulikyabo, ko bikendisyabya bitya: Oyukasingira n’omukali wa mulikyabo litolere iniakwa; omulume musingiri n’omukali musingiri.
11 Oyukaghotsera n’omukali wa baba wiwe akabya iniamahemula baba wiwe; abosi babiri litolere ibakwa. Omusasi wabo ali oko mitwe yabo.
12 Omundu amabighotsera na mwalyana wiwe litolere ababiri bosi ibakwa butsira buhaka. Mubakakola ekitekoleka omo buhangwa; omusasi wabo ali oko mitwe yabo.
13 “‘Omulume amaghotsera n’omulume ngoko omundu akaghotsera n’omukali, ababiri bosi bakabya ibamakola omwatsi w’esyonye. Litolere ibitwa n’omusasi wabo ali oko mitwe yabo.
14 “‘Omulume amabimya omukali kandi inyimya na mama w’omukali oyo, ekyo ni kitsibu.* Litolere omulume oyo inyatimibwa omo muliro, n’omukali oyo na mama wiwe nabo ibatimibwa omo muliro, emyatsi mibi ng’eyo ikasyalola embere omo kati-kati kenyu.
15 “‘Omulume amabighotsera n’enyama, litolere imwamwita, imwita n’enyama eyo.
16 Omukali amabiyihira embere sy’enyama busana n’erighotsera nayo, litolere imwamwita, imwita n’enyama eyo. Litolere ibitwa, n’omusasi wabo ali okw’ibo.
17 “‘Omulume amabikola emyatsi y’engyingo na mwali wabo, omwali wa baba wiwe kutse omwali wa mama wiwe, inialangira endumbu ya mwali wabo, na mwali wabo inialangira endumbu yiwe, oyo ni mwatsi owakit’isoni. Litolere ibalusibwa* omo meso w’abaghala b’abandu babo. Omulume oyo litolere iniaheka olubanza lwiwe.
18 “‘Omulume amabighotsera n’omukali oyuli omo biro biwe by’omwisi* n’erikola naye emyatsi y’engyingo, iye n’omukali oyo babiriswikula eriluako musasi ly’omukali oyo. Litolere ababiri bosi ibalusibwa* omo kati-kati k’abandu babo.
19 “‘Isiwakola emyatsi y’engyingo na mwali wabo mama waghu kutse na songali waghu kusangwa aho iwamahemula omutunga waghu wa hakuhi. Litolere ibaheka olubanza lwabo.
20 Omulume amabimya omukali wa mughala wabo baba wiwe, aho iniamahemula* omughala wabo baba wiwe. Litolere ibabyako olubanza busana n’erilolo lyabo. Ngambe ibahola butsira eributa mwana.
21 Omulume amabimya omukali wa mughala wabo, oyo ni mwatsi owakita nye, aho akabya iniamahemula* mughala wabo. Ngambe ibahola butsira eributa omwana.
22 “‘Litolere imwateya ebihano byaghe n’emighambo yaghe n’erikwamabyo, ekihugho ekyo ngabatwalamo eriyikala mukyo kikasyabasala.
23 Isimwayighendaya erikwamana n’emitsye y’ebihanda ebyo ngahigha embere syenyu. Kusangwa ebihanda ebyo byabirikola emyatsi eyi, naghe ngalangirabyo mo nye.
24 Ekyo kyo kyaleka inababwira niti: “Mukendisyimya ekihugho kyabo, naghe ngendisyabahakyo mo mwandu; ekihugho ekikasendamo amasabu n’obuki. Ingye indi Yehova Mungu wenyu oyo wabahighula oko bihanda.”
25 Litolere imwasolola omo kati-kati k’esyonyama esyerire n’esiterire, n’omo kati-kati k’esyonyunyu esiterire n’esyerire. Isimwayiyira mo nye omo nyama kutse enyunyu, kutse ekindu kyosi-kyosi ekikakululuka oko kitaka ekyo nabirihighula okw’inywe erikilangira mo ekiterire.
26 Okw’ingye, litolere imwabya babuyirire, kundi naghe Yehova nibuyirire, kandi ngabahighula oko bihanda by’abandi bandu mutoke eribya baghe.
27 “‘Omulume kutse omukali oyukakola obukumu kutse oyukalaghula,* litolere inyitwa. Litolere abandu ibitabo omo mabwe. Omusasi wabo akendisyabya okw’ibo.’”
Amaelezo awehikwa
^ Kutse “ngendisyaghana.”
^ Kutse “ngendisyamwita.”
^ Kutse “ingendisyaghana.”
^ Kutse “ingendisyita.”
^ Kutse “enafsi eyo.”
^ Kutse “erimwita.”
^ Kutse “oyukatakira.”
^ Kutse “ni mwatsi owakit’isoni; ni butakenga obukalire.”
^ Kutse “ibitwa.”
^ Kutse “omughesera; regle.”
^ Kutse “ibitwa.”
^ Kinywa kwa kinywa, “ni ndumbu ya mughala wabo baba wiwe.”
^ Kinywa kwa kinywa, “ni ndumbu ya mughala wabo.”
^ Kutse “oyuwite ekirimu ky’eriminyerera eby’embere.”
