Abalawi 22:1-33
22 Yehova mwasyabugha na Musa ati:
2 “Ubwire Haruni n’abaghala biwe uti, ibayiteya oko mibere eyo bakakoleramo ebindu ebibuyirire eby’Abaisraeli. Kandi isibatsandaya ebindu ebibuyirire oko mwatsi owalebirye ebindu ebyo bakahighula* busana naghe. Ingye indi Yehova.
3 Ubwirebo uti, ‘Omo bizazi* byenyu byosi, omundu* wosi-wosi oyuterire omo kati-kati k’abana benyu, oyukaseghera hakuhi n’ebindu ebibuyirire ebyo Abaisraeli bakahighula* busana na Yehova, omundu* oyo litolere inyalusibwa* embere syaghe. Ingye indi Yehova.
4 Omo bana ba Haruni, omundu oyukwire ebihagha kutse oyukasendaya omutsafu, isyalya oko bindu ebibuyirire erihika omughulu akendisyera; kutse omundu oyuterire busana n’eritula oko kinda ky’omundu, kutse omulume oyukalusaya obuhalya,*
5 kutse omundu oyukatula oko kihangyikwa ekiterire ekikaghenda omo kikuto kutse oyulyatula oko mundu oyuterire busana n’omwatsi wosi-wosi, neryo omundu oyo inanganaleka iniabya oyuterire.
6 Omundu* oyukatula oko bindu ng’ebi, akendisyabya oyuterire erihika omw’igholo. Kandi omundu oyo syatolere erirya ekindu kyosi-kyosi ekibuyirire; nikwa litolere inianaba omo maghetse.
7 Eryuba lyabilenga, akendisyabya oyo werire; neryo enyuma sy’aho, inianganalya oko bindu ebibuyirire kusangwa k’akalyo kiwe.
8 Kandi syangalya enyama yosi-yosi eyiryayiholera, kutse ekindu kyosi-kyosi ekiryatulangawa n’esyonyama sy’omoli, eriyiyira mo oyuterire busana nakyo. Ingye indi Yehova.
9 “‘Litolere ibateya ebyo ngabasaba erikola bakasyabya kw’erilolo busana nabyo n’erihola busana nabyo, kundi mubakatsandayabyo. Ingye indi Yehova oyukahighulabo.*
10 “‘Omundu oyutahamulirwe* syangalya ekindu kyosi-kyosi ekibuyirire. Omubunga oyulyalenderera omuhereri kutse omuhingyi wiwe syangalya ekindu kyosi-kyosi ekibuyirire.
11 Nikwa omuhereri amaghula omundu oko syofranga siwe, omundu oyo anganalya kubyo; n’abakobe abakabutirawa omo nyumba yiwe, nabo banganalya oko kalyo kiwe.
12 Omwali w’omuhereri amabitahibwa n’omundu oyute muhereri,* omwali w’omuhereri oyo syangalya oko bihembo by’ebindu ebibuyirire.
13 Nikwa omwali w’omuhereri amabibya mukwakali kutse amabitwa endwa n’iba wiwe kandi isyawite abana, neryo iniasuba omo nyumba ya baba wiwe, ng’omughulu abya iniakine mumbesa, aho inianganalya oko kalyo ka baba wiwe. Aliwe omundu wosi-wosi oyutahamulirwe,* isyalya kuko.
14 “‘Omundu amabirya oko bindu ebibuyirire omw’itendiyiririra, akendisyatomeka kubyo kw’ekighuma ky’ebitano byabyo, neryo iniaha omuhereri y’ekihembo ekibuyirire ekyo.
15 Neryo isibatsandaya ebindu ebibuyirire ebyo Abaisraeli bakateka mo lusunzo busana na Yehova,
16 n’erileka abandu ibasuyirwa busana n’olubanza lw’erirya ebindu byabo ebibuyirire. Kusangwa ingye indi Yehova oyukabayira mo babuyirire.’”
17 Yehova mwasyabugha na Musa ati:
18 “Ukanaye na Haruni n’abaghala biwe n’Abaisraeli bosi, ubwirebo uti, ‘Omughulu Omuisraeli kutse omubunga oyo wikere omo Israeli akaletera Yehova y’obuhere bw’eryokererya busana n’eriberererya ebyo abirilagha kutse busana n’erileta obuhere bwiwe bw’olusunzo,
19 litolere inialeta enume eyiteko obulema erilua omo bihangulo, esyombangale esikine nyilere, kutse esyombene, atoke eriliwa.
20 Isimwaleta enyama yosi-yosi eyiriko obulema, kusangwa siyangaleka imwaliwa.
21 “‘Omundu amaletera Yehova y’obuhere bw’obuholo* busana n’eriliha ebyo abirilagha kutse busana n’obuhere bw’olusunzo, litolere inialeta enyama eyiteko obulema erilua omo bihangulo kutse omo bihyo; isiyabyako obulema bosi-bosi.
22 Enyama y’obuhere, isiyabya ndimetime, eyibunikire, eyiriko ekironda, eyikwire omukurutu, eyikwire obuhere kutse olukerere. Esyonyama esiri ng’esyo, isimwaleterasyo Yehova kutse eriherera Yehova y’obuhere obuli ng’obu oko kiherero.
23 Mwanganateka enume y’ende kutse embuli eyiriko okughulu kuli kutse kukuhi, mo buhere bw’olusunzo, aliwe mwamabitekayo mo buhere bw’ebyo mulyalagha, siyangaliwa.
24 Isimwaherera Yehova y’enyama eyiriko ebiheghe ebitsandire, ebipondekene, eyibarwire,* kutse ey’ebiheghe ebitwire. Isimwaherera esyonyama esiri ng’esyo omo kihugho kyenyu.
25 Siritolere mukaligha esyonyama esiri ng’esyo erilua oko babunga muti mukahererasyo mo mukati w’oMungu wenyu; kusangwa sitsandire kandi siriko obulema, sisyangaliwa.’”
26 Yehova mwasyabugha na Musa ati:
27 “Omughulu enume y’ende kutse embangale kutse embene ikabutawa, ikendisyabya na mama wayo omo biro 7. Nikwa eritsuka oko kiro kye 8, ikendisyaliwa mo buhere, obuhere obukahisibawa omo muliro busana na Yehova.
28 N’oko bilebirye enume y’ende kutse embuli, isimwakerayo oko kiro kighuma n’ekyana kyayo.
29 “Mwamaherera Yehova y’obuhere bw’ewasingya, litolere imwahererabo omo nzira eyangaleka imwaliwa.
30 Litolere ibwalibwa ekiro ekyo kisa-kisa. Siritolere mukabika kubo erihika engyakya. Ingye indi Yehova.
31 “Litolere imwateya ebihano byaghe, n’erikola ngoko ngabahana. Ingye indi Yehova.
32 Isimwatsandaya erina lyaghe eribuyirire, kandi litolere inayirwa mo mubuyirire omo kati-kati k’Abaisraeli. Ingye Indi Yehova oyukabayira mo babuyirire,
33 oyukabalusaya omo kihugho kye Misri erikangania ngoko niri Mungu wenyu. Ingye indi Yehova.”
Amaelezo awehikwa
^ Kutse “ebyo bakayira mo bibuyirire.”
^ Kutse “esyondengo.”
^ Kutse “enafsi.”
^ Kutse “ebyo bakayira mo bibuyirire.”
^ Kutse “enafsi.”
^ Kutse “inyitwa.”
^ Kutse “sperme.”
^ Kutse “enafsi.”
^ Kutse “oyukabayira mo babuyirire.”
^ Kinywa kwa kinywa, “ow’ehandi.” Ni bugha ambu, omundu wosi-wosi oyute w’omo kihanda kya Haruni.
^ Kutse “amatahibwa n’ow’ehandi.”
^ Kutse “ow’ehandi.” Ni bugha ambu, omundu wosi-wosi oyute w’omo kihanda kya Haruni.
^ Kutse “obuhere bw’erisangania.”
^ Kutse “enzaghara.”
