Abalawi 24:1-23
24 Kandi Yehova mwabugha na Musa ati:
2 “Ubwire Abaisraeli uti bakuletere amaghuta w’emizeituni awatemo omutsafu kandi awengire ndeke busana n’erikolerya; esyotala sitoke eribya isinakire mughulu wosi.
3 Haruni akendisyakola ekyosi-kyosi, esyotala sibye sikabya isinakire mughulu wosi embere sya Yehova, eritsuka omw’igholo erihika omo tututu ehihya w’erido ry’Erisanduku ry’Endaghane eriri omo hema y’erihindanamo. Oyu ni mughambo w’omughulu wosi omo bizazi* byenyu byosi.
4 Akendisyabya akatonda esyotala syo ndeke-ndeke oko kindu ky’erihira sy’oko eky’ehoro eyerire sitoke eribya sikabya isinakire embere sya Yehova.
5 “Ukendisyimya eyisyano eyiswererere,* iwakokotya muyo mw’emikati 12 ey’omuviringo kandi eyirimo ebyuna. Obuli mukati akendisyakokotibwa omo bibiri by’omw’ikumi ebye efa.*
6 Ukendisyatondayo mo milondo ibiri embere sya Yehova oko mesa eyikokotibwe omo horo eyerire. Emikati 6 omo buli mulondo.
7 Ukendisyahira oko buli mulondo k’obubani obuwene eribya buhere bw’erisosekania* emikati eyo, obuhere obukahisibawa omo muliro busana na Yehova.
8 Oko buli kiro ky’Esabato, litolere iniabya akahira oko mesa kw’emikati mihya-mihya embere sya Yehova. Eyi ni ndaghane y’omughulu wosi haghuma n’Abaisraeli.
9 Likendisyabya righabo lya Haruni n’abaghala biwe. Bakendisyaliralyo ahabuyirire, kusangwa ni kindu ekibuyirire kutsibu ekikalusibawa oko mahere wa Yehova awakahisibawa omo muliro. Ni kyalayiro ky’ebiro byosi.”
10 Omo kati-kati k’Abaisraeli, mwabya omulwana, mama wiwe ini Muisraeli na baba wiwe ini Mumisri. Neryo kiro kighuma, omo kambi mumwabya amalwa omo kati-kati k’omulwana oyo n’oghundi mulume Muisraeli.
11 Omughala w’omukali Muisraeli oyo, mwatsuka eritsuma Erina* eryo n’eritakiralyo.* Neryo mubamuleta eyiri Musa. Kwesi mama w’omulwana oyo abya iyo Shelomiti omwali wa Diburi ow’omo kihanda kya Dani.
12 Neryo mubamuhira omo muliki bakalinda Yehova ng’akendisoha olubanza olo lo ati.
13 Neryo Yehova mwabwira Musa ati:
14 “Oyulyatsuma oyo, mumutwale ehihya w’ekambi. N’abosi abalyamwowa akatsuma, bahire ebyala byabo oko mutwe wiwe; n’enyuma sy’aho, endeko yosi ikendimwita omo mabwe.
15 Neryo ukendibwira Abaisraeli uti, ‘Omundu wosi-wosi amabitsuma oMungu wiwe, akendisyabyako olubanza lw’erilolo liwe.
16 Oyulyatsuma erina lya Yehova, litolere inyitwa butsira buhaka. Endeko yosi litolere iyamwita omo mabwe. Oyukatsuma Erina eryo, abye mubunga kutse mbutirwa ye Israeli, litolere inyitwa omo mabwe.
17 “‘Omundu amabibughaho* obuyingo b’oghundi mundu, litolere omundu oyo inyitwa.
18 Omundu wosi-wosi oyukahunza enyama* y’eka, neryo iyahola, litolere inialihayo, engebe busana n’engebe.*
19 Omundu amabihutalya mulikyabo, litolere omundu oyo naye iniakolerwa ekyo analyakolera mulikyabo.
20 Obubune busana n’obubune, eriso busana n’eriso, erino busana n’erino, ngoko anahutalaya mulikyabo naye ko linatolere iniahutalibwa atya.
21 Oyukahunza enyama neryo iyahola, akendisyalihayo, aliwe oyukahunza omundu neryo iniahola, naye litolere inyitwa.
22 “‘Eritswera ni righumerera okw’inywe bosi, abye mbutirwa kutse mubunga, kusangwa ingye indi Yehova Mungu wenyu.’”
23 Neryo Musa mwakania n’Abaisraeli, nabo mubaleta oyo watsuma oyo ehihya w’ekambi, bamamwita omo mabwe. Neryo Abaisraeli mubakola ngoko Yehova analayira Musa.
Amaelezo awehikwa
^ Kutse “esyondengo.”
^ Kutse “ey’enzelele.”
^ Ebibiri by’omw’ikumi bye efa ini litre 4.4. Ulebaye Endomeko B14.
^ Kutse “eribya righabo ry’ekibukyo (kiminyisyo) kyabo.”
^ Ni bugha ambu, erina rya Yehova, ngoko kikanganibwe omo mulondo owe 15 n’owe 16.
^ Kutse “eribugha kulyo ko muhanda.”
^ Kutse “amabihunza omundu neryo iniahola.”
^ Kutse “oyukaswiraya enafsi y’enyama.”
^ Kutse “enafsi busana n’enafsi.”
