Abalawi 26:1-46
26 “‘Isimwayikokoteraya emiungu yosi-yosi. Emiungu eyo siyiwite omughaso. Kandi isimwayihiriraho esyosanamu esibatsire, kutse esyonduyi esibuyirire. Kandi omo kihugho kyenyu isimwabatsa amabwe busana n’eribya mukakoleragho; kusangwa ingye indi Yehova Mungu wenyu.
2 Litolere imwateya esyosabato syaghe n’erisikya* ahabuyirire haghe. Ingye indi Yehova.
3 “‘Mwamabilola embere erilendera omo bihano byaghe n’erikwama emighambo yaghe n’erikola ebyo ngababwira,
4 ingendisyabya ngabaha embula nene oko kirimo kyayo n’ekitaka ikikendisyerya ndeke, n’emiti y’omo malima iyikendisyahetya amatunda wayo.
5 Ekirimo kyenyu ky’erihumba ikikendisyahika oko omughulu w’eryoha emizabibu, n’eryoha emizabibu erihika oko kirimo ky’eribiba, n’erirya akalyo kenyu imughuta n’eriikala omo buholo omo kihugho kyenyu.
6 Ingendisyahira obuholo omo kihugho, imukendisyayaghotsera isihali oyukabubahisaya. Kandi ingendisyalusya esyonyama esikalire omo kihugho kyenyu, n’omuyali w’amalwa isyendisyalaba omo kihugho kyenyu.
7 Oko kwenene imukendisyahigha esyonzighu syenyu, nenyu imukendisyakindasyo omo muyali.
8 Abatano b’okw’inywe ibakendisyahigha 100, ne 100 y’okw’inywe ibakendisyahigha 10 000, nenyu imukendisyakinda esyonzighu syenyu omo muyali.
9 “‘Kandi ingendisyabatsumula* n’eribakanyirirya n’eriberererya endaghane yaghe haghuma nenyu.
10 Imukinalya ebyalya ebyo mweraya oko mwaka w’aho nyuma, imukendisyayilusyako ebyalya bya kera imo mwasunga omwanya w’erihiramo bihya-bihya.
11 Kandi ingendisyahanda etabernakulo yaghe omo kati-kati kenyu, naghe* isinendisyabaghana.
12 Ingendisyabya haghuma nenyu n’eribya Mungu wenyu, nenyu imukendisyabya bandu baghe.
13 Ingye indi Yehova Mungu wenyu oyo wabalusaya omo kihugho kye Misri, eribalusya omo bukobe bwabo, n’eritwa emiti y’omuketo* wenyu, n’erileka imwalendera imunasumbire emitwe yenyu.
14 “‘Nikwa mwamatendinyowa kutse mwamatenditeya ebihano byosi ebi,
15 kandi mwamaghana emighambo yaghe, n’eripona ebyalayiro byaghe neryo imutasikya ebihano byaghe byosi, aliwe imwatwa endaghane yaghe,
16 ingendisyabakolera bino: ingendisyabasuyira omo maligho, omo bukoni bw’ekikuba kinene, n’erihuhana rinene ry’omubiri, ameso wenyu iniaghana eritasyalangira ndeke, n’erileka emibiri yenyu iyaleghetsana. Mwamahera, imukendisyaluhira busa, kusangwa esyonzighu syenyu isikendisyabya sikalyabyo.
17 Ingendisyabahitanako, n’esyonzighu syenyu isikendisyabakinda; n’ababaponire ibakendisyabalyatangirira, nenyu imukendisyatibita isihali n’oyubakwamire.
18 “‘Mwamatendyowa busana n’emyatsi eyi, ingendisyabasuyira ngendo 7 busana n’amalolo wenyu.
19 Ingendisyabalusyamo erighundu ryenyu, n’eriyira olubula lwenyu ng’ekyuma n’ekitaka kyenyu inayirakyo ng’ekwivre.*
20 Imukendisyakola kutsibu aliwe akaghala kenyu ikakwa busa, kusangwa ekitaka kyenyu isikyendisyerya, n’emiti y’omo kihugo kyenyu isiyendisyahetya ebighuma.
21 “‘Nikwa mwamalola embere erinihirako erighundu n’erighana erinihulikirira, ingendisyabahunza ngendo 7 kwilaba aho erikwamana n’amalolo wenyu.
22 Ingendisyabatumako esyonyama sy’omoli, nasyo isikendisyababughako abana n’ebihangulo byenyu n’erikehya emighanzo yenyu, n’esyonzira syenyu isikendisyasuna.
23 “‘Nikwa mwamabilola embere erikalya emitima yenyu, n’eritendyowa erisuyira ryaghe n’erilola embere erinikangania erighundu, nibya n’enyuma sy’erihikirwa n’emyatsi eyi,
24 eryo naghe ingendisyalwa nenyu n’eribahunza ngendo 7 busana n’amalolo wenyu.
25 Ingendisyabaletera omuyali w’erikisya busana n’eritwa endaghane. Mwamayikuma-kumira omo muyi wenyu, ingendisyatuma endwala omo kati-kati kenyu, nenyu imukesyahirwa omo byala by’enzighu.
26 Ingendisyabya nabitsandya aho mukabika omukati,* abakali 10 ibakendisyahukira omukati* omo furu nguma, n’eripima omukati ogho mukendirya oko kilo; nenyu imukendisyalya aliwe isimwendisyughuta.
27 “‘Mwamatendinihulikirira, imwalola embere erikangania erighundu nibya n’emyatsi eyi iyabiribahikira,
28 ingendisyabahitanako kutsibu, naghe ingyuwene-wene ingendisyabasuyira ngendo 7 busana n’amalolo wenyu.
29 Neryo imukendisyalya abana benyu b’obulume n’erirya abana benyu b’obukali.
30 Ingendisyasambula aho mukaramiraya* emiungu yenyu y’amabehi n’erikondera ahisi ebiherero byenyu by’obukwa, kandi ingendisyalundika ebinda byenyu by’oko binda by’esyosanamu syenyu esikita nye,* naghe ingendisyabakwa esyonye, n’eribalolyako omughongo.
31 Ingendisyaherya emiyi yenyu n’eriyira ahabuyirire henyu mo matongo, n’ekikumbo ky’amahere wenyu isikyendisyasyanitsemesya.
32 Ingendisyayira ekihugho kyosi mo matongo, n’esyonzighu syenyu esikere mukyo isikendisyasweka sikalangira ekyo.
33 Kandi ingendisyabapanza-panzira omo bihanda, kandi ingendisyabalusirya omuyali omo lubo lwagho, n’ekihugho kyosi ikikendisyabya matongo, n’emiyi yenyu yosi iyikendisyatsandibwa.
34 “‘Oko mughulu oyo ekitaka kikendisyaliha esyosabato syakyo, ebiro byosi ebyo kikendisyabya butsira bandu, imune omo kihugho ky’esyonzighu syenyu. Oko mughulu oyo ekitaka kikendisyaluhuka,* kundi litolere ikyaliha esyosabato syakyo.
35 Ebiro byosi ebyo kikendisyabya matongo ikikendisyaluhuka, kundi omughulu mwabya mwikere mukyo imukitaluhuka omo syosabato syenyu.
36 “‘N’abokw’inywe abakendisyabala, ingendisyahira omo mitima yabo mw’erihandabuka ibane omo bihugho by’esyonzighu syabo; eribuya-buya ry’ekiti ekikaghuluka omo rihunga irikendisyaleka ibatibita, kandi ibakendisyatibita ng’oyukatibita akasagha omuyali n’eriwa ahisi isihali n’oyubakwamire.
37 Ibakendisyatwikalanako bakatibita ng’abakatibita bakasagha omuyali, nibya isihali n’oyubakwamire. Isimwendisyatoka erilwa n’esyonzighu syenyu.
38 Imukendisyahwerera omo bihanda, n’ekihugho ky’esyonzighu syenyu ikikendisyabamera.
39 N’ab’okw’inywe abakendisyasighala, ibakendisyahwerekerera* omo bihugho by’esyonzighu syenyu busana n’erilolo ryenyu. Ibakendisyahwerekerera busana n’erilolo ry’abo baba wabo.
40 Neryo ibakendisyaghungama erilolo ryabo n’erilolo n’ebibi by’abotata wabo n’eriligha ngoko mubahalya omughulu baghana erikwama ebyo ngababwira.
41 Neryo naghe munalwa nabo omw’iletabo omo kihugho ky’esyonzighu syabo.
“‘Ingendisyakola nitya niti mbino emitima yabo eyitabanibwe* ikendisyayikehya neryo ibaliha erilolo lyabo.
42 Naghe ingendisyibuka endaghane yaghe eyo nakola na Yakobo, n’endaghane eyo nakola na Isaka, kandi ingendisyibuka endaghane yaghe eyo nakola na Abrahamu, kandi ingendisyibuka ekihugho ekyo.
43 Omughulu balua omo kihugho, ekihugo mukyaliha esyosabato syakyo n’erisighala matongo babilua mukyo. Kandi babya bakaliha busana n’erilolo lyabo, kusangwa mubaghana emighambo yaghe n’erikwa ebyalayiro byaghe byo nye.
44 Nomo ebyosi ebyo byangabya ibane omo kihugho ky’esyonzighu syabo, sinendisyaghanabo olosi, kutse erilekeraniabo erihika okw’ihwerekereryabo, kundi aho isinitasikya endaghane eyo nakola nabo, kundi ingye indi Yehova Mungu wabo.
45 Busana n’endundi yabo, ingendisyibuka endaghane yaghe eyo nakola n’abotata-kulu wabo abo nalusaya omo kihugho kye Misri omo meso w’ebihanda, erikangania ngoko niri Mungu wabo. Ingye indi Yehova.’”
46 Ebi bye bihano, ebyalayiro, n’emighambo ebyo Yehova ahiraho omo kati-kati kiwe n’Abaisraeli oko Kitwa kye Sinai erilabira Musa.
Amaelezo awehikwa
^ Kinywa kwa kinywa, “eryubaha.”
^ Kinywa kwa kinywa, “ingendisyabinduka n’eribatungerera.”
^ Kutse “enafsi yaghe.”
^ Kutse “engomo.”
^ Kutse “omulinga.”
^ Kinywa kwa kinywa, “ekibikiro.” Alinga eryahula ekindu ky’eribikamo emikati.
^ Kutse “akalyo.”
^ Kinywa kwa kinywa, “emyanya y’endata eyibuyirire.”
^ Ekinywa ky’Ekiebrania eki kyanganakolesibwa eryahula ebise. Kandi kikakolesibawa oko kindu ekikita nye.
^ Kutse “kikendisyasikya esabato.”
^ Kinywa kwa kinywa, “ibakendisyabonda.”
^ Kutse “emitima eyirimo erighundu.”
