Abalawi 3:1-17
3 “‘Obuhere bwiwe bwamabya ini buhere bw’obuholo* kandi amabya inialimayabo erilua omo kihangulo ky’esyonde, yibye y’obulume kutse y’obukali, litolere inialeta embere sya Yehova enyama eyiteko bulema.
2 Akendisyahira ebyala biwe oko mutwe w’enyama y’obuhere bwiwe, n’enyama eyo ikendisyakererwa oko lukyo lw’ehema y’erihindanamo; n’abaghala ba Haruni, abahereri bakendisyatsatsanga omusasi wayo oko syombande syosi sy’ekiherero.
3 Akendisyateka erighabo ry’oko buhere bw’obuholo* mo buhere obukahisibawa omo muliro busana na Yehova: ebisabu ebikaswika eby’omo nda, ebisabu byosi ebitimbire oko mala,
4 n’esyombiko ibiri n’ebisabu ebiri kusyo ebiri hakuhi n’embindi. Kandi akendisyalusya ebisabu ebiri oko makindi* haghuma n’esyombiko.
5 Abaghala ba Haruni bakendisyahisiriryabyo oko kiherero endata oko buhere bw’eryokererya obuli oko syongwi esiri oko muliro; ni buhere obukahisibawa omo muliro, ekikumbo ekikatsemesaya* Yehova.
6 “‘Obuhere obo akaherera Yehova mo buhere bw’obuholo* bwamabya ibukalua omo kihyo, akendisyaleta enyama y’obulume kutse ey’obukali eyiteko bulema.
7 Amabileta embangale eyikine nyilere mo buhere bwiwe, akendisyaletayo embere sya Yehova.
8 Akendisyahira ebyala biwe oko mutwe w’obuhere bwiwe, n’enyama eyo ikendisyakererwa embere sy’ehema y’erihindanamo. Abaghala ba Haruni bakendisyatsatsanga omusasi wayo oko mbande syosi sy’ekiherero.
9 Akendisyaleta ebisabu by’obuhere bw’obuholo* mo buhere bw’erihisirirya omo muliro busana na Yehova. Akendisyalusya omukira wosi owalimo ebisabu wo hakuhi n’erikuha ry’omughongo, ebisabu ebikaswika eby’omo nda, n’ebisabu byosi ebitimbire oko mala,
10 n’esyombiko ibiri n’ebisabu ebiri kusyo ebiri hakuhi n’embindi. Kandi akendisyalusya ebisabu ebiri oko makindi* haghuma n’esyombiko.
11 N’omuhereri akendisyahisiriryabyo oko kiherero ng’akalyo* busana n’erilusya omuki. Ni buhere obukahisibawa omo muliro busana na Yehova.
12 “‘Obuhere bwiwe bwamabya ini mbene, inyakendisyaletayo embere sya Yehova.
13 Akendisyahira ebyala biwe oko mutwe wayo, nayo ikendisyakererwa embere sy’ehema y’erihindanamo. N’abaghala ba Haruni bakendisyatsatsanga omusasi wayo oko mbande syosi sy’ekiherero.
14 Erighabo eryo akendisyaleta mo buhere obukahisibawa omo muliro busana na Yehova, bye bisabu ebikaswika eby’omo nda, n’ebisabu byosi ebitimbire oko mala,
15 n’esyombiko ibiri n’ebisabu ebiri kusyo ebiri hakuhi n’embindi. Kandi akendisyalusya ebisabu ebiri oko makindi* haghuma n’esyombiko.
16 Omuhereri akendisyahisiriryabyo oko kiherero ng’akalyo* busana n’erilusya omuki. Ni buhere obukahisibawa omo muliro busana n’ekikumbo ekikatsemesaya.* Ebisabu byosi ni bya Yehova.
17 “‘Ehosi-hosi eyo mwikere, simutolere mukalya ebisabu byosi-byosi kutse omusasi wosi-wosi. Ni mughambo w’omughulu wosi omo bizazi* byenyu.’”
Amaelezo awehikwa
^ Kutse “obuhere bw’erisangania”
^ Kutse “obuhere bw’erisangania.”
^ Kutse “obulepe.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “obuhere bw’erisangania.”
^ Kutse “obuhere bw’erisangania.”
^ Kutse “obulepe.”
^ Kinywa kwa kinywa, “omukati.” Ni bugha ambu, erighabo ry’oMungu ly’obuhere bw’obuholo.
^ Kutse “obulepe.”
^ Kinywa kwa kinywa, “omukati.” Ni bugha ambu, erighabo ry’oMungu ly’obuhere bw’obuholo.
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “esyondengo.”
