Abalawi 4:1-35
-
Obuhere bw’erilolo (1-35)
4 Yehova mwasyabugha na Musa ati:
2 “Ubwire Abaisraeli uti, ‘Omundu amabikola erilolo butsira eriyiririra omw’ikola omughuma w’oko myatsi eyo Yehova abiribugha ati siyitolere ikakolwa:
3 “‘Omuhereri oyuhirirweko amaghuta, amabikola erilolo n’erileta oko bandu k’olubanza,* aho litolere inialeta embere sya Yehova enume y’ende eyikine nyilere kandi eyiteko bulema mo buhere bw’erilolo busana n’erilolo eryo alyakola.
4 Akendisyaleta enume y’ende eyo embere sya Yehova oko lukyo lw’ehema y’erihindanamo n’erihira ebyala biwe oko mutwe w’enume y’ende eyo n’erikerera enume y’ende eyo embere sya Yehova.
5 Neryo omuhereri oyuhirirweko amaghuta akendisyimya oko musasi w’enume y’ende eyo n’eriletagho omo hema y’erihindanamo;
6 n’omuhereri akendisyahira omunwe wiwe omo musasi oyo n’eritsatsangagho ngendo 7 embere sya Yehova embere sy’erido ly’ahabuyirire.
7 Kandi omuhereri akendisyimya oko musasi oyo inyahiragho oko mahembe w’ekiherero ky’erihisiryako obukwa, ekiri embere sya Yehova omo hema y’erihindanamo; n’omusasi wosi owasighalire w’enume y’ende eyo akendisyutagho omo ndina y’ekiherero ky’obuhere bw’eryokererya, ekiri oko lukyo lw’ehema y’erihindanamo.
8 “‘Akendisyalusya ebisabu byosi by’omo nume y’ende y’obuhere bw’erilolo, erihirako n’ebisabu ebikaswika eby’omo nda, n’ebisabu ebitimbire oko mala,
9 n’esyombiko ibiri n’ebisabu ebiri kusyo ebiri hakuhi n’embindi. Kandi akendisyalusya ebisabu ebiri oko makindi* haghuma n’esyombiko.
10 Bikendisyabya bighumerera ng’ebikanalusibawa omo nume y’ende y’obuhere bw’obuholo.* Neryo omuhereri akendisyahisiriryabyo oko kiherero ky’obuhere bw’eryokererya.
11 “‘Aliwe engobi y’enume y’ende eyo, enyama yayo yosi haghuma n’omutwe wayo, emilenge yayo, n’amala wayo, n’amase wayo—
12 ebyosi ebisighalire oko nume y’ende eyo—akendisyabugha ati bihekerawe endambi-ndambi w’ekambi omo mwanya ow’erire, aho eribu* rikaghusawa. Neryo akendisyahisyabyo omo muliro oko syongwi. Litolere ibyahisibwa eyo eribu rikaghusawa.
13 “‘Neryo endeko yosi ye Israeli yamabibyako olubanza* busana n’erikola erilolo butsira eriyiririra, aliwe endeko isiyilue yasi ngoko yabirikola omwatsi mulebe ogho Yehova abugha ati sibatolere erikola,
14 neryo erilolo eryo iryahika okw’iminywa, endeko yitolere iyaleta enume y’ende eyikine nyilere mo buhere bw’erilolo n’eriletayo embere sy’ehema y’erihindanamo.
15 Abasyakulu b’ekihanda, bakendisyahira ebyala byabo oko mutwe w’enume y’ende eyo embere sya Yehova, n’enume y’ende eyo ikendisyakererwa embere sya Yehova.
16 “‘Neryo omuhereri oyuhirirweko amaghuta akendisyaleta oko musasi w’enume y’ende eyo omo hema y’erihindanamo.
17 Omuhereri akendisyahira omunwe wiwe omo musasi oyo n’eritsatsanga kugho ngendo 7 embere sya Yehova embere sy’erido.
18 Enyuma sy’aho, akendisyimya oko musasi oyo inyahiragho oko mahembe w’ekiherero ekiri embere sya Yehova, ekiri omo hema y’erihindanamo; n’oghundi musasi wosi owakisighalire akendisyutagho omo ndina y’ekiherero ky’obuhere bw’eryokererya, ekiri oko lukyo lw’ehema y’erihindanamo.
19 Akendisyalusya muyo mw’ebisabu byamo byosi n’erihisiriryabyo oko kiherero.
20 Akendisyakolera enume y’ende eyo ngoko anakolera enume y’ende y’obuhere bw’erilolo. Kw’akendisyakola atya. N’omuhereri akendisyaliha embanulo busana nabo, neryo bakendisyaghanyirwa.
21 Akendisyabugha ati enume y’ende eyo yitwalawe endambi-ndambi w’ekambi, neryo iniahisyayo omo muliro ngoko anakolera enume y’ende y’erimbere. Ni buhere bw’erilolo busana n’endeko.
22 “‘Omukulu mughuma amabikola erilolo butsira eriyiririra, omw’ikola omughuma w’oko myatsi yosi eyo Yehova Mungu wiwe abugha ati siyitolere erikolwa, neryo inyabyako olubanza,*
23 kutse bamabimubwira ngoko abirikola erilolo busana n’eriketa omughambo, aho iniakendileta embaya eyikine nyilere eyiteko bulema mo buhere bwiwe.
24 Akendisyahira ebyala biwe oko mutwe w’embaya eyikine nyilere eyo n’erikererayo embere sya Yehova aho bakanakerera obuhere bw’eryokererya. Ni buhere bw’erilolo.
25 Omuhereri akendisyimya oko musasi w’obuhere bw’erilolo omo munwe wiwe n’erihiragho oko mahembe w’ekiherero ky’obuhere bw’eryokererya, n’omusasi wayo owakisighalire inyutagho omo ndina y’ekiherero ky’obuhere bw’eryokererya.
26 Akendisyahisya ebisabu byayo byosi oko kiherero ngoko analyahisaya ebisabu by’obuhere bw’obuholo.* N’omuhereri akendisyamulihira embanulo busana n’erilolo riwe, naye akendisyaghanyirwa.
27 “‘Omundu* wosi-wosi omo kati-kati k’abandu b’omo kihugho amabikola erilolo butsira eriyiririra n’eribyako olubanza* busana n’erikola omughuma w’oko myatsi eyo Yehova abiribugha ati siyitolere ikakolwa,
28 kutse bamabimubwira ngoko abirikola erilolo, aho iniakendileta embene y’obukali eyikine nyilere* kandi eyiteko obulema, mo buhere bwiwe busana n’erilolo eryo alyakola.
29 Akendisyahira ebyala biwe oko mutwe w’obuhere bw’erilolo obo n’erikererabo aho bakakerera obuhere bw’eryokererya.
30 Omuhereri akendisyimya oko musasi w’obuhere obo omo munwe wiwe n’erihiragho oko mahembe w’ekiherero ky’obuhere bw’eryokererya, n’omusasi wabo wosi owakisighalire inyutagho omo ndina y’ekiherero.
31 Akendisyalusya mubo mw’ebisabu byosi, ngoko analyalusaya ebisabu by’omo buhere bw’obuholo.* N’omuhereri akendisyahisiriryabyo oko kiherero mo kikumbo ekikatsemesaya* busana na Yehova; neryo omuhereri akendisyamulihira embanulo, naye akendisyaghanyirwa.
32 “‘Aliwe amabya iniakenditeka ekyana ky’embuli mo buhere bwiwe bw’erilolo, litolere inialeta ekyana ky’embuli ky’obukali* ekiteko bulema.
33 Akendisyahira ebyala biwe oko mutwe w’obuhere bw’erilolo obo n’erikera ekyana ky’embuli ekyo mo buhere bw’erilolo aho bakanakerera obuhere bw’eryokererya.
34 Omuhereri akendisyimya oko musasi w’obuhere bw’erilolo omo munwe wiwe n’erihiragho oko mahembe w’ekiherero ky’obuhere bw’eryokererya, n’omusasi wosi owakisighalire inyutagho omo ndina y’ekiherero ky’obuhere bw’eryokererya.
35 Akendisyalusya mukyo mw’ebisabu byakyo byosi, ngoko ebisabu by’omo mbangale eyikine nyilere y’obuhere bw’obuholo* bikanalusibawa. N’omuhereri akendisyahisiriryabyo oko kiherero endata oko mahere wa Yehova awakahisibawa omo muliro. Neryo omuhereri akendisyamulihira embanulo busana n’erilolo eryo alyakola, naye akendisyaghanyirwa.
Amaelezo awehikwa
^ Kutse “omusango.”
^ Kutse “obulepe.”
^ Kutse “obuhere bw’erisangania.”
^ Kutse “eribu ry’ebisabu.” Ni bugha ambu, eribu eririmo ebisabu ebikalua omo mahere.
^ Kutse “omusango.”
^ Kutse “omusango.”
^ Kutse “obuhere bw’erisangania.”
^ Kutse “enafsi.”
^ Kutse “omusango.”
^ Kutse “esuhene.”
^ Kutse “obuhere bw’erisangania.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “etsughutsi.”
^ Kutse “obuhere bw’erisangania.”
