Abalawi 5:1-19
5 “‘Omundu amabya imwakalangira omwatsi mulebe kutse imwakowagho, aho ini mwimiri w’omwatsi oyo. Kandi amabyowa ngoko banemubirikira abimiri ambu base batulegho, aliwe iniaghana eritulagho, aho iniamakola erilolo; neryo akendisyatonda busana n’erilolo liwe.
2 “‘Kutse omundu* amabitula oko kindu kyosi-kyosi ekiterire, kibye kinda ky’enyama y’omoli eyiterire, kutse eky’enyama y’eka eyiterire kutse eky’ebihangyikwa ebiterire ebikaghenda mo bikumula, aho naye iniamabibya mundu oyuterire kandi akendisyabyako olubanza* nibya nomo angabya isyalue asi.
3 Kutse omo butaminya omundu amabitula oko butsandirya bw’abandu—ekindu kyosi-kyosi ekiterire ekyangaleka iniabya mundu oyuterire—neryo iniahikira eriminyakyo, aho iniamabyako olubanza.*
4 “‘Kutse omundu* amabilapa butsir’ilengekania ati akendikola omwatsi mulebe—abye mwatsi mubuya kutse mubi, nomo angabya mwatsi wa muhanda wahi—kandi inyalue isyasi aliwe iniahikira eriminya ngoko mwalapa butsira erilengekania, aho iniamabyako olubanza.*
5 “‘Amabibyako olubanza* busana n’omughuma w’oko myatsi eyi, aho litolere iniakangania* nga mwakakola erilolo lyahi.
6 Akendisyaletera Yehova y’obuhere bw’olubanza* busana n’erilolo eryo alyakola, ni bugha ambu, enyama y’obukali erilua omo kihyo, ekyana ky’embuli eky’obukali* kutse embene y’obukali eyikine nyilere* mo buhere bw’erilolo. Neryo omuhereri akendisyamulihira embanulo busana n’erilolo liwe.
7 “‘Nikwa amabya isyangabana ekyana ky’embuli, inyakendisyaletera Yehova y’ehitungula hibiri kutse ehipijo hibiri ehikine hilere-hilere mo buhere bw’olubanza* busana n’erilolo; akaghuma busana n’obuhere bw’erilolo n’akandi busana n’obuhere bw’eryokererya.
8 Akendisyaleterahyo omuhereri. N’omuhereri akendisyatsuka eriherera ak’obuhere bw’erilolo. Akendisyakonyola omutwe wako oko bikya byako aliwe butsira erilusya w’oko.
9 Akendisyimya oko musasi w’obuhere bw’erilolo inyatsatsangagho oko luhande lw’ekihero, aliwe akendisyasononokerya omusasi owakisighalire omo ndina y’ekiherero. Ni buhere bw’erilolo.
10 Akendisyaherera akandi mo buhere bw’eryokererya erikwamana n’emiteghekerere; n’omuhereri akendisyamulihira embanulo busana n’erilolo eryo alyakola, naye akendisyaghanyirwa.
11 “‘Amabya isyangabana ehitungula hibiri kutse ehipijo hibiri ehikine hilere-hilere, akendisyaleta busana n’obuhere bw’erilolo riwe, ekighuma ky’omw’ikumi kye efa eky’eyisyano eyiswererere* mo buhere bw’erilolo. Syendisyahira kuyo kw’amaghuta kutse obubani kusangwa ni buhere bw’erilolo.
12 Akendisyaleterayo omuhereri, n’omuhereri akendisyimya kuyo kw’ekighanza ky’ebyala ekyoswire mo kisosekanio* ky’obuhere obo, neryo akendisyahisiriryabyo oko kiherero endata oko mahere wa Yehova awakahisibawa omo muliro. Ni buhere bw’erilolo.
13 Omuhereri akendisyamulihira embanulo busana n’erilolo eryo alyakola; erilolo ryosi-ryosi ry’oko malolo awabirikanibwako, naye akendisyaghanyirwa. Ebikasaka oko buhere obo, bikendisyabya by’omuhereri, ngoko bikanabya oko buhere bw’eyisyano.’”
14 Yehova mwalola embere erikania na Musa ati:
15 “Omundu* mulebe amabileghula, omw’ihalya oko bindu ebibuyirire bya Yehova butsira eriyiririra, akendisyaletera Yehova y’embangale eyiteko obulema erilua omo kihyo mo buhere bw’olubanza.* Obughuli bwayo omo shekeli* y’efeza* bukendisyatswerwa erikwamana n’eshekeli y’ahabuyirire.*
16 Kandi akendisyalihira erilolo eryo alyakola oko ahabuyirire. Kandi akendisyatomekako ekitswe kighuma ky’oko bitano ky’ebyo alyaliha. Akendisyahabyo omuhereri, omuhereri atoke erimulihira embanulo haghuma n’embangale y’obuhere bw’olubanza,* naye akendisyaghanyirwa.
17 “Omundu* amabikola erilolo, omw’ikola omughuma w’oko myatsi eyo Yehova abiribugha ati siyitolere ikakolwa, nomo angabya isyalue asi, akendisyabyako olubanza,* n’ebitsibu ebikaluira omo rilolo riwe, bikendisyamubyako.
18 Akendisyaletera omuhereri y’embangale eyiteko bulema erilua omo kihyo erikwamana n’obughuli obulyatswerawa, mo buhere bw’olubanza.* Neryo omuhereri akendisyamulihira embanulo busana n’ekosa ey’eritendiyiririra eyo alyakola omo butaminya, naye akendisyaghanyirwa.
19 Ni buhere bw’olubanza.* Kwenene mwakabyako olubanza* busana n’erihalya oko Yehova.”
Amaelezo awehikwa
^ Kutse “enafsi.”
^ Kutse “omusango.”
^ Kitokekene omundu oyo syetaberererya eriyilagha liwe.
^ Kutse “enafsi.”
^ Kutse “omusango.” Alinga kundi syetabererya erilapa liwe.
^ Kutse “omusango.”
^ Kutse “iniaghungama.”
^ Kutse “obuhere bw’omusango.”
^ Kutse “akatsughutsi.”
^ Kutse “esuhene.”
^ Kutse “obuhere bw’omusango.”
^ Kutse “ey’enzelele.”
^ Kutse “erighabo ry’ekibukyo kyabo.”
^ Kutse “enafsi.”
^ Kutse “obuhere bw’omusango.”
^ Eshekeli nguma ini grama 11.4. Ulebaye Endomeko B14.
^ Ni kindu ky’obughuli ekikalua omo kitaka.
^ Kutse “eshekeli eyibuyirire.”
^ Kutse “obuhere bw’omusango.”
^ Kutse “enafsi.”
^ Kutse “omusango.”
^ Kutse “obuhere bw’omusango.”
^ Kutse “obuhere bw’omusango.”
^ Kutse “omusango.”
