Abalawi 6:1-30
6 Yehova mwalola embere eribugha na Musa ati:
2 “Omundu* amabikola erilololo n’erileghula oko Yehova omw’iteba omuhimbani wiwe busana n’ekindu kilebe ekyo amubikisaya kutse ekyo amusighira busana n’edeni, kutse amabiiba omuhimbani wiwe, kutse amamunyegha ebindu biwe,
3 kutse amabibughula ekindu ekilue ikyabirihera neryo inyateba busana nakyo, kutse amabilapa ery’amabehi oko rilolo ryosi-ryosi eriri ng’eri eryo angabya iniabirikola, ekyo atolere erikola kya kino:
4 Amabya imwakakola erilolo n’eribyako olubanza,* litolere iniasubulya ekyo alyiba, ekyo alyapura, ekyo alyalimaya, ekyo bamubikisaya, kutse ekindu ekilue ikyabirihera ekyo alyabughula,
5 kutse ekindu kyosi-kyosi ekyo alapa ery’amabehi busana nakyo. Litolere iniasubulya ebilingene nakyo n’eritomekako ekighuma ky’okw’itano ky’obughuli bwakyo. Akendisyahakyo omwenyekyo ekiro olubanza lwiwe lukendisyaminywa.
6 Kandi busana n’obuhere bwiwe bw’olubanza,* akendisyaletera omuhereri y’embangale eyiteko bulema erilua omo kihyo erikwamana n’obughuli bwayo obwabiritswerwa, akendisyaletayo mo buhere bwiwe bw’olubanza busana na Yehova.
7 Omuhereri akendisyamulihira embanulo embere sya Yehova, naye akendisyaghanyirwa ekyosi-kyosi ekyo angabya iniabirikola, ekiryaleka iniabyako olubanza.”*
8 Yehova mwalola embere eribugha na Musa ati:
9 “Ubwire Haruni n’abaghala biwe uti, ‘Omughambo owalebirye obuhere bw’eryokererya w’ono: obuhere bw’eryokererya bukendisyabya ibune oko liko ly’ekiherero omo kiro kyosi erihika omo tututu, n’omuliro akendisyabya inianemubetekererwa oko kiherero, akasyalima.
10 Omuhereri akendisyambala esyongyimba siwe sy’obuhereri esy’ekitani, n’eryambala akapitula* kiwe k’ekitani. Neryo akendisyalusya oko kiherero kw’eribu* ry’obuhere bw’eryokererya obo omuliro abirihisya n’erihiralyo emusike w’ekiherero.
11 N’enyuma sy’aho akendisyalusya esyongyimba siwe n’eryambala esindi, neryo iniatwala eribu ehihya w’ekambi omo mwanya ow’erire.
12 Omuliro akendisyabya inyanemubetekererwa oko kiherero, syatolere akalima. Omo buli tututu, omuhereri akendisyabya akakya esyongwi oko kiherero n’eritonda kusyo k’obuhere bw’eryokererya, n’erihisirirya oko muliro oyo ebisabu by’obuhere bw’obuholo.*
13 Omuliro akendisyabya inianakire oko kiherero mughulu wosi. Siritolere akalima.
14 “‘Omughambo owalebirye obuhere bw’eyisyano w’ono: Inywe baghala ba Haruni, mukendisyabya mukaletabo embere sy’ekiherero, imwahererabo embere sya Yehova.
15 Omughuma wa kubo akendisyimya ekighanza kighuma ky’ebyala ekyoswire oko yisyano eyiswererere* y’obuhere bw’eyisyano, inyimya oko maghuta wabo n’obubani bosi b’obuhere bw’eyisyano. Neryo akendisyahisiriryabyo oko kiherero busana n’ekikumbo ekyuwene* mo kisosekanio* ky’obuhere obo busana na Yehova.
16 Ebikendisyasaka kubo, Haruni n’abaghala biwe bakendisyalyabyo. Bikendisyalirwa ahabuyrire ng’omukati owatemo elevire.* Bakendisyalirabyo omo butala bw’ehema y’erihindanamo.
17 Isiyahukawa n’ekindu kyosi-kyosi ekirimo elevire.* Ni righabo lyabo eryo nabirihabo erilua oko mahere waghe awakahisibawa omo muliro. Ni kindu ekibuyirire kutsibu, ng’obuhere bw’erilolo n’obuhere bw’olubanza.*
18 Obuli mulume omo kati-kati k’abana ba Haruni akendisyalyabo. Ni righabo ryabo mughulu wosi omo bizazi* byenyu byosi erilua oko mahere wa Yehova awakahisibawa omo muliro. Obuli kindu kyosi-kyosi ekikendisyatulya kubyo* kikendisyabya kibuyirire.’”
19 Yehova mwasyabugha na Musa ati:
20 “Obuhere obo Haruni n’abaghala biwe bakendisyaleta embere sya Yehova omughulu Haruni akendisyahirwako amaghuta bwa buno: ekighuma ky’omw’ikumi kye efa* eky’eyisyano eyiswererere mo buhere bw’eyisyano bw’ebiro byosi, ekitswe kyabo omo tututu, n’ekitswe kyabo omw’igholo.
21 Bikendisyatulunganibwa n’amaghuta n’erihukwa oko luyo.* Ukendisyaletayo iyabiritulunganibwa ndeke n’amaghuta n’eriletabyo mo bihande-bihande ebyabirihukwa eby’obuhere bw’eyisyano y’ekikumbo ekikatsemesaya* Yehova.
22 Omuhereri oyuhirirweko amaghuta, oyukendisyamusubuka erilua omo kati-kati k’abaghala biwe akendisyakola emyatsi mighumerera eyo. Ni mughambo w’omughulu wosi: Obosi bukendisyokibwa erilusya omuki busana na Yehova.
23 Obuli buhere bw’eyisyano bw’omuhereri, bukendisyahererwa obosi. Sibutolere bukalibwa.”
24 Yehova mwasyabugha na Musa ati:
25 “Ubwire Haruni n’abaghala biwe uti, ‘Omughambo owalebirye obuhere bw’erilolo w’ono: Ahakakererawa obuhere bw’eryokererya, ho buhere bw’erilolo nabo bukendisyabya bukakererwa embere sya Yehova. Ni kindu ekibuyirire kutsibu.
26 Omuhereri oyukahererabo busana n’erilolo akendisyalyabo. Bukendisyalirwa ahabuyirire, omo kibugha ky’ehema y’erihindanamo.
27 “‘Ekindu kyosi-kyosi ekikatula oko nyama y’obuhere obo, kikendisyabya kibuyirire. N’omundu amabilahukirya omusasi wayo oko lukimba lwiwe, ekiryalahukirako omusasi, ukendisyereryakyo ahabuyirire.
28 Enyungu y’eribumba eyiryahuka enyama eyo litolere iyatulangwa. Aliwe yamabya iyiryahukawa omo nyungu y’ekwivre,* enyungu eyo yitolere iyakurutwa n’eryeribwa omo maghetse.
29 “‘Obuli mulume omo kati-kati k’abahereri akendisyalya kuyo; ni kindu ekibuyirire kutsibu.
30 Aliwe, obuhere bw’erilolo sibutolere bukalibwako, omusasi wabo amabya imwakatwalawako omo hema y’erihindanamo eriliha embanulo ahabuyirire. Bukendisyahisibwa omo muliro.
Amaelezo awehikwa
^ Kutse “enafsi.”
^ Kutse “omusango.”
^ Kutse “obuhere bw’omusango.”
^ Kutse “omusango.”
^ Kutse “esyongyimba sy’emwisi.”
^ Kutse “eribu ry’ebisabu.” Ni bugha ambu, eribu eririmo ebisabu ebikalua omo mahere.
^ Kutse “obuhere bw’erisangania.”
^ Kutse “erighabo ry’ekibukyo kyabo.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “ey’enzelele.”
^ Kutse “ekihamya.”
^ Kutse “ekihamya.”
^ Kutse “obuhere bw’omusango.”
^ Kutse “esyondengo.”
^ Kutse “amahere.”
^ Ekighuma ky’omw’ikumi kye efa ini litre 2.2. Ulebaye Endomeko B14.
^ Kutse “ekindu ky’erikalangako.”
^ Kutse “ekikatuleraya; ekikabonderaya.” Kinywa kwa kinywa, “ekikaluhukaya.”
^ Kutse “omulinga.”
