Abalawi 7:1-38

CHINGULA

Amahano busana n’amahere (1-21)
- Obuhere bw’olubanza (1-10)
- Obuhere bw’obuholo (11-21)
Erighania erirya ebisabu kutse omusasi (22-27)
Erighabo ry’abahereri (28-36)
Ebinywa by’eribughirira ebilebirye amahere (37, 38)

7 “‘Omughambo owalebirye obuhere bw’olubanza* w’ono: Ni kindu ekibuyirire kutsibu: ² Bakendisyakerera enyama y’obuhere bw’olubanza* aho bakanakerera enyama y’obuhere bw’eryokererya. N’omusasi wayo akendisyatsatsangwa oko mbande syosi sy’ekiherero. ³ Akendisyaherera ebisabu byayo byosi n’erihirako n’omukira owalimo ebisabu, n’ebisabu ebikaswika eby’omo nda, ⁴ n’esyombiko ibiri n’ebisabu byako ebiri hakuhi n’embindi, kandi akendisyalusya ebisabu by’oko makindi* haghuma n’esyombiko. ⁵ Omuhereri akendisyahisyabyo oko kiherero bitoke erilusya omuki mo buhere obukahisibawa omo muliro busana na Yehova. Ni buhere bw’olubanza.* ⁶ Obuli mulume omo kati-kati k’abahereri akendisyalya kubo kandi litolere ibwalirwa ahabuyirire. Ni kindu ekibuyirire kutsibu. ⁷ Omughambo owalebirye obuhere bw’erilolo alebirye n’obuhere bw’olubanza;* ni bw’omuhereri oyukahererabo akaliha embanulo. ⁸ “‘Omughulu omuhereri akaherera obuhere bw’eryokererya busana n’omundu mulebe, engobi y’enyama y’obuhere bw’eryokererya eyo balyamuletera ikendisyabya yiwe. ⁹ “‘Obuhere bwosi bw’eyisyano obukahukawa omo furu kutse obukahukawa omo nyungu kutse oko luyo, bukendisyabya bw’omuhereri oyukahererabo, bukendisyabya righabo liwe. ¹⁰ Aliwe obuhere bwosi bw’eyisyano obutulungenemo amaghuta kutse obumire,* bukendsyabya bw’abaghala ba Haruni bosi; abosi bakendisyabana amaghabo awalingirirene. ¹¹ “‘Omughambo owalebirye obuhere bw’obuholo* obo omundu angaletera Yehova w’ono: ¹² Amabya iniakaletabo mo buhere bw’ewasingya, iniakendisyaleta obuhere bw’ewasingya haghuma n’emikati y’omuviringo eyirimo ekyuna eyitemo elevire* eyitulungenemo amaghuta, n’ehitumbura ehitemo levire ehihakireko amaghuta, n’emikati y’omuviringo eyirimo ekyuna eyiryakokotibwa omo yisyano eyiswererere* eyitulungene ndeke kandi eyitulungenemo amaghuta. ¹³ Akendisyaleta obuhere bwiwe haghuma n’emikati y’omuviringo eyirimo ekyuna eyirimo elevire,* n’obuhere bwiwe bw’ewasingya bw’amahere wiwe w’obuholo.* ¹⁴ Oko buhere obo, akendisyimyako omukati mughuma-mughuma, oko buli muhanda w’emikati ogho akendisyaherera mo righabo eribuyirire busana na Yehova; rikendisyabya ly’omuhereri oyulyatsatsanga oko kiherero kw’omusasi w’obuhere bw’obuholo.* ¹⁵ Enyama y’obuhere bw’ewasingya ey’amahere wiwe w’obuholo ikendisyalibwa ekiro ekyo kisa-kisa ekyo analyahererayo. Isyabika kuyo erihika engyakya. ¹⁶ “‘Obuhere bw’ehongo yiwe bwamabya ini lahirya kutse ini buhere bw’eriyanzira, bukendisyalibwa ekiro ekyo kisa-kisa ekyo alyahereramo obuhere bwiwe, n’ebikasaka kubo byanganalibwa engyakya. ¹⁷ Aliwe ebikasaka oko nyama y’obuhere obo, oko kiro ky’akasatu bikendisyahisibwa omo muliro. ¹⁸ Nikwa, enyama y’obuhere bwiwe bw’obuholo* yamabilibwa oko kiro ky’akasatu, oyulyahererayo isyendiliwa. Obuhere obo isibwendimuletera endundi yosi-yosi; ni kindu ekikita nye, n’omundu wosi-wosi oyukalya kuyo akendisyabyako ebitsibu ebikaluira omo kosa yiwe. ¹⁹ Enyama eyikatulaya oko kindu ekiterire isiyalibawa. Ikendisyahisibwa omo muliro. Obuli mundu oyo werire, anganalya enyama eyerire. ²⁰ “‘Nikwa omundu* wosi-wosi oyuterire amabirya oko nyama y’obuhere bw’obuholo* obwa Yehova, omundu oyo akendisyalusibwa* omo kati-kati k’abandu biwe. ²¹ Omundu* amabitula oko kindu ekiterire, bubye butsandirya bw’omundu, enyama eyiterire kutse ekindu kyosi-kyosi ekikita nye ekiterire, kandi amabirya oko nyama y’obuhere bwa Yehova bw’obuholo,* omundu oyo akendisyalusibwa* omo kati-kati k’abandu biwe.’” ²² Yehova mwasyabwira Musa ati: ²³ “Ubwire Abaisraeli uti, ‘Isimwalya ebisabu byosi-byosi by’enume y’ende kutse eby’embangale eyikine nyilere kutse eby’embene. ²⁴ Ebisabu by’enyama eyiryayiholera, n’ebisabu by’enyama eyiryitawa n’eyindi nyama, byanganakola oghundi mubiiri, aliwe isimwalyabyo. ²⁵ Kusangwa omundu wosi-wosi oyukalya ebisabu by’enyama eyo alyaletera Yehova mo buhere bw’erihisya omo muliro, litolere inialusibwa* omo kati-kati k’abandu biwe. ²⁶ “‘Ehosi-hosi eyo mwikere, isimwanatalya omusasi wosi-wosi; angabya w’esyonyunyu kutse ow’esyonyama. ²⁷ Owosi-wosi* oyukalya omusasi wosi-wosi, litolere inialusibwa* omo kati-kati k’abandu biwe.’” ²⁸ Yehova mwasyabugha na Musa ati: ²⁹ “Ubwire Abaisraeli uti, ‘Owosi-wosi oyukaletera Yehova yo buhere bw’obuholo* akendisyaleta erighabo erilua oko buhere bwiwe bw’obuholo, mo buhere busana na Yehova. ³⁰ Akendisyasa inianahekire omo byala biwe, ebisabu n’ekikuba, mo buhere bw’erihisya omo muliro busana na Yehova, kandi akendisyahungya-hungyabo mo buhere bw’erihungya-hungya embere sya Yehova. ³¹ Omuhereri akendisyahisirirya ebisabu by’oko kiherero busana n’erilusya omuki, nikwa ekikuba kikendisyabya kya Haruni n’abaghala biwe. ³² “‘Oko mahere wenyu w’obuholo mukendisyabya mukaha omuhereri y’ekihinga ky’amali mo righabo eribuyirire. ³³ Omughala wa Haruni oyukaherera omusasi w’amahere w’obuholo n’ebisabu akendisyahabwa ekihinga ky’amali mo righabo riwe. ³⁴ Kusangwa oko mahere w’obuholo* w’Abaisraeli, namimya ekikuba ky’obuhere bw’erihungya-hungya n’ekihinga eky’erighabo ribuyirire; namahabyo Haruni n’abana biwe. Ni mughambo w’omughulu wosi busana n’Abaisraeli. ³⁵ “‘Eri rye righabo erilua omo mahere wa Yehova awakahisibawa omo muliro, eryahighulawa busana n’abahereri, Haruni n’abaghala biwe, oko kiro aletabo eribya bahereri ba Yehova. ³⁶ Ekiro bahirawako amaghuta, Yehova mwalayira ati Abaisraeli bahebo erighabo eryo. Ni kyalayiro ky’omughulu wosi omo bizazi* byabo.’” ³⁷ Oyu wo mughambo busana n’obuhere bw’eryokererya, obuhere bw’eyisyano, obuhere bw’erilolo, obuhere bw’olubanza,* obuhere bw’erisingya, n’obuhere bw’obuholo,* ³⁸ ngoko Yehova analayira Musa oko Kitwa kye Sinai, ekiro alayira Abaisarelli ati baletere Yehova y’amahere omo mbwarara ye Sinai.

Amaelezo awehikwa

^ Kutse “obuhere bw’omusango.”

^ Kutse “obulepe.”

^ Kutse “obuhere bw’omusango.”

^ Kutse “obutemo amaghuta.”