Abalawi 9:1-24
-
Haruni amaherera (1-24)
9 Oko kiro kye 8, Musa mwabirikira Haruni n’abaghala biwe n’abasyakulu ba Israeli.
2 Mwabwira Haruni ati: “Uyimiraye ekyana ky’ende mo buhere bw’erilolo, n’embangale mo buhere bw’eryokererya. Isibyabyako obulema. Neryo uletebyo embere sya Yehova.
3 Aliwe ukendibwira Abaisraeli uti, ‘Mwimaye embaya busana n’obuhere bw’erilolo n’ekyana ky’ende n’embangale eyikine nyilere; ebyosi eby’omwaka mughuma kandi ebiteko obulema busana n’obuhere bw’eryokererya,
4 n’enume y’ende n’embangale mo mahere w’obuholo,* busana n’erihererabyo embere sya Yehova, n’obuhere bw’eyisyano obutulungene n’amaghuta. Kusangwa munabwire Yehova akendibahulukira.’”
5 Mubaleta ebyo Musa alayirabo embere sy’ehema y’erihindanamo. Neryo endeko yosi muyaseghera hakuhi, yamimana embere sya Yehova.
6 Musa mwabugha ati: “Eki kyo Yehova abirilayira ati mukole, olukengerwa lwa Yehova lutoke eribahulukira.”
7 Neryo Musa mwabwira Haruni ati: “Useghere hakuhi n’ekiherero uherere obuhere bwaghu bw’erilolo n’obuhere bwaghu bw’eryokererya, eriyilihira embanulo busana naghu ighuwene-wene na busana n’ekihanda kyaghu, uherere n’obuhere bw’abandu busana n’eribalihira embanulo ngoko Yehova anabirilayira.”
8 Haruni mwalw’iniaseghera hakuhi n’ekiherero, amakera ekyana ky’ende ky’obuhere bwiwe bw’erilolo.
9 Abaghala ba Haruni mubamuletera omusasi, naye mwahira omunwe wiwe omo musasi oyo, amahiragho oko mahembe w’ekiherero, n’omusasi owasaka mutagho omo ndina y’ekiherero.
10 Mwahisirirya ebisabu, n’esyombiko, n’ehisabu hy’oko makindi,* eby’obuhere bw’erilolo bitoke erilusya omuki oko kiherero, ngoko Yehova anabya iniabirilayira Musa.
11 Esiswi, n’engobi, mwahisyabyo omo muliro ehihya w’ekambi.
12 Neryo mwakera embangale y’obuhere bw’eryokererya. N’abaghala ba Haruni mubamuletera omusasi, naye mwatsatsangagho oko mbande syosi sy’ekiherero.
13 Mubamuhererya amaghabo w’obuhere bw’eryokererya, haghuma n’omutwe, naye mwahisiriryabyo oko kiherero busana n’erilusya omuki.
14 Enyuma sy’aho mwerya amala n’emilenge. Mwahisiriryabyo oko kiherero endata w’obuhere bw’eryokererya busana n’erilusya omuki.
15 Neryo mwaleta obuhere bw’abandu. Mwimya embene y’obuhere bw’erilolo eyabya busana n’abandu. Mwakerayo, amahererayo mo buhere bw’erilolo, ng’ey’erimbere.
16 Mwaleta obuhere bw’eryokererya, amahererabo erikwamana n’emiteghekerere y’obuli kiro eyabya iyabirihirwaho.
17 Enyuma sy’aho, mwaleta obuhere bw’eyisyano. Musulya kubo omo byala biwe, amahisiriryabo oko kiherero, eritomeka oko buhere bw’eryokererya bw’etututu.
18 Enyuma sy’aho mwakera enume y’ende n’embangale esy’obuhere bw’obuholo* esyabya busana n’abandu. Neryo abaghala ba Haruni mubamuhererya omusasi, naye mwatsatsangagho oko mbande syosi sy’ekiherero.
19 Nikwa amaghabo w’ebisabu by’enume y’ende, omukira w’embangale owalimo ebisabu, ebisabu ebikaswika eby’omo nda, esyombiko n’ehisabu hy’oko makindi;*
20 mubahira amaghabo w’ebisabu wosi ayo oko bikuba. Enyuma sy’aho mwahisirirya amaghabo w’ebisabu ayo oko kiherero busana n’erilusya omuki.
21 Aliwe ebikuba n’ekihinga ky’amali, Haruni mwahungya-hungyabyo mo buhere bw’erihungya-hungya embere sya Yehova, ngoko Musa anabya iniabirilayira.
22 Neryo Haruni mwasumba ebyala biwe, amaloleryabyo eyiri abandu, amatsumulabo. Neryo Haruni abere abiherera obuhere bw’erilolo, n’obuhere bw’eryokererya n’amahere w’obuholo,* mwakima.
23 Okw’ibuyirira, Musa na Haruni mubingira omo hema y’erihindanamo, kandi mubahuluka, bamatsumula abandu.
Neryo olukengerwa lwa Yehova mulwahulukira abandu bosi,
24 n’omuliro mwalua eyiri Yehova amahisya obuhere bw’eryokererya n’amaghabo w’ebisabu awali oko kiherero. Abandu babere balangira ekyo, mubuta obwogho busana n’erisweka kandi mubatulama oko kitaka.
Amaelezo awehikwa
^ Kutse “amahere w’erisangania.”
^ Kutse “amalepe.”
^ Kutse “esy’obuhere bw’erisangania.”
^ Kutse “amalepe.”
^ Kutse “amahere w’erisangania.”
