Ebaruha oko Abanya Efeso 1:1-23
1 Ebaruha eno ikalua oko Paulo, omukwenda wa Kristo Yesu busana n’erisonda ry’oMungu. Ngahandikira ababuyirire abali e Efeso, kandi abataleghula omo bughuma na Kristo Yesu.
2 Olukogho n’obuholo bw’oMungu Tata wetu n’Omukama wetu Yesu Kristo bibye haghuma nenyu.
3 OMungu na Tata w’Omukama wetu Yesu Kristo apipawe, kundi omo lubula abiritutsumula omw’ituha emiyisa mbiriri-mbiriri eyikalua oko kirimu kundi tuli omo bughuma na Kristo.
4 Mwatusombola eribya omo bughuma naye, embere efondasyo y’ekihugho ihiraweho. Mwakola atya tutoke eribya babuyirire n’abateko bulema embere siwe omo lwanzo.
5 Kundi abya iniabiritusombola embere tutoke eritasyayirwamo baghala biwe erilabira Yesu Kristo, erikwamana n’erisonda riwe n’ebyo abya anzire.
6 Kandi mwakola atya abandu batoke erimupipa busana n’olukogho lwiwe oluwene nga, olo anza eritukangania erilabira Omughala wiwe mwanzwa.
7 Erilabira Omughala oyo, tukaboholawa busana n’embanulo y’omusasi wiwe. Oko kwenene, tukaghanyirawa busana n’omusasi wiwe. Olukogho lw’oMungu ni lunene kutsibu.
8 Olukogho olo, oMungu abiritukakanganialo omo lulengo lunene omo menge n’obwenge bosi.
9 Mwakola atya omw’ituminyisya ekumbo* nyibuyirire y’erisonda riwe. Ekumbo eyo yihambene n’ebyo abya anzire kandi n’ebyo abya iniabiriyisogha
10 erihiraho obwimaniri oko nduli y’emighulu eyahirawaho, ni bugha ambu, erihindania emyatsi yosi omo Kristo, emyatsi eyiri elubula n’emyatsi eyiri oko kihugho. Emyatsi yosi yikendisyahindanibwa omo Kristo,
11 oyo tuli omo bughuma naye. Kandi twabirisombolwa erihabwa omwandu haghuma naye kundi mutwasombolwa embere erikwamana n’erisonda ry’oMungu, oyukaberereraya emyatsi yosi eyo abiriyisogha erikwamana n’ebyo anzire,
12 neryo itwe twatsuka erihira amaha omo Kristo, tubye ekyangaleka oMungu iniapipwa n’erihabwa olukengerwa.
13 Aliwe nenyu, mumwahira amaha omw’iye mwabyowa ekinywa ky’ekwenene, engulu mbuya y’omulamo wenyu. Mwabere mwabikirirya, mwabahirako ekiminyikalo erilabira ekirimu kibuyirire ekyalaghawa,
14 ekikakanganaya embere sy’endambi ngoko tukendisyahabwa omwandu,* abandu b’oMungu batoke eriboholwa erilabira embanulo, n’oMungu atoke eripipwa n’erihabwa olukengerwa.
15 Busana n’ekyo, eritsuka omughulu naghe nowa ngoko mwabirikirirya Omukama Yesu n’olwanzo olo mukakanganaya ababuyirire bosi,
16 sindinataleka erisima oMungu busana nenyu. Ngabya ininemubahira omo misabe yaghe,
17 kusudi oMungu w’Omukama wetu Yesu Kristo, Tata w’olukengerwa, abahe ekirimu ky’amenge, kandi mwowe emyatsi eyo akabisula mutoke erimuminya ndeke-ndeke.
18 Abirikingula obwenge bwenyu* mutoke eriminya amaha awaleka iniababirikira, ebindu bibuya ebyo akendisyaha ababuyirire mo mwandu,
19 kandi mutoke eriminya akaghala kanene akabiritukangania itwe twikirirye. Akaghala ako kabirilangirika omo bindu ebyo akola omo butoki bwiwe bunene.
20 Mwakolesya akaghala ako oko Kristo omughulu amulubukaya n’erimwikalya oko luhande lwiwe lw’amali elubula,
21 endata kutsibu oko buli butabali, obukulu, amaka, obukama, n’obuli rina eryangahulwa omo kihugho kino* n’omo kihugho ekikendisyasa.
22 Kandi oMungu mwamuyiramo mutabali w’ebindu byosi n’erimuyiramo mukulu w’emyatsi yosi eyilebirye endeko.
23 Endeko eyo w’omubiri wiwe. Iye yukasulaya muyo mw’emyatsi yosi omo nzira syosi.
Amaelezo awehikwa
^ Kutse “esiri.”
^ Kutse “eavase.”
^ Kinywa kwa kinywa, “Abirikolerya ameso w’omutima wenyu.”
^ Kutse “omughulu ono.” Ulebaye amaana w’ebinywa.
