Ebaruha oko Abanya Efeso 3:1-21
3 Busana n’ekyo, ingye Paulo, oyubohirwe busana na Kristo Yesu, kandi busana nenyu inywe bandu b’ebihanda,
2 kwenene-kwenene mwamabya imwabiryowa ngoko nabirihabwa omubiiri w’eribawatikya eribana olukogho* lw’oMungu,
3 kandi ngoko oMungu mwanibisulira ekumbo* nyibuyirire, ngoko nilwe inabiribahandikira omo kikuhi.
4 Neryo omughulu mukasoma ebyo niryahandika, mukendilangira ngoko nabiriminya ekumbo* nyibuyirire ya Kristo.
5 Omo mighulu eyalaba, oMungu mwatabisulira abandu ekumbo* nyibuyirire eyo, ngoko abiribisulirayo lino abakwenda babuyirire n’abaminyereri erilabira ekirimu.
6 Ekumbo* eyo y’eno: Abandu b’ebihanda abali omo bughuma na Kristo Yesu bakendisyahabwa oko mwandu wa Kristo n’eribya mubiri mughuma. Nabo bakendisyahabwa ebindu ebyo oMungu abiritulagha busana n’engulu mbuya.
7 Nabiribya omughombe w’ekumbo* eyo busana n’olukogho olo Mungu anikanganaya busa, kandi olw’anikanganaya erilabira obutoki bwiwe.
8 Ingye muke w’omo bake, n’ingye nahabawa olukogho olo, nitoke eribwira abandu b’ebihanda engulu mbuya eyilebirye emiyisa ya Kristo eyo tutetwangatoka erighanza.
9 Kandi nitoke eriwatikya obuli mundu eriminya obwimaniri bw’ekumbo* nyibuyirire eyo oMungu oyo wahangyika ebindu byosi abya iniabiribisa omo myaka mingyi.
10 Ekyo kyabya kitya, kusudi erilabira endeko, amenge w’oMungu, awakalangirika omo nzira nyingyi, atoke eriminyisibwa abatabali n’abakulu abali elubula.
11 Ekyo kihambene n’omupango wa kera na kera w’oMungu ogho ahiraho kandi owalebirye Kristo Yesu Omukama wetu.
12 Busana naye, tukabugha butsir’isagha kandi tukaseghera bweghu-bweghu hakuhi n’oMungu itune n’amaha, kundi twikirirye Kristo.
13 Neryo ngabasaba niti isimwabunika mutima busana n’amaligho agho ninemulabamo busana nenyu, kundi amaligho ayo akaleka imwahabwa olukengerwa.
14 Ekyo kyo kikaleka inakukama embere sya Tata,
15 oyukaha erina obuli kihanda ekiri elubula n’ekiri oko kihugho.
16 Ngasaba niti kumbe erilabira olukengerwa lwiwe lunene, asikaye omutima wenyu* omo butoki bw’ekirimu kiwe.
17 Kandi kusudi erilabira obwikirirya bwenyu mwikalaye Kristo omo mitima yenyu omo lwanzo. Mubye n’emirihi n’erikala imunasikire oko fondasyo,
18 kusudi inywe haghuma n’ababuyirire bosi muminye ndeke-ndeke obughali,* obuli, obuli eriya endata, obuli erindaghala,
19 n’eriminya olwanzo lwa Kristo, olulengire emyatsi eyo bandu basi, mutoke eryusulamo ebibuya byosi ebyo oMungu akatuha.
20 Neryo, oMungu oyo wangatoka busana n’obutoki bwiwe obunemukolera omw’itwe akole emyatsi mingyi kutsibu kulenga emyatsi yosi eyo tukasaba n’erilengekania.
21 Kandi ahabawe olukengerwa erilabira endeko n’erilabira Kristo Yesu oko mighulu yosi kera na kera. Amina.
Amaelezo awehikwa
^ Kinywa kwa kinywa, “obwimaniri bw’olukogho.”
^ Kutse “esiri.”
^ Kutse “esiri.”
^ Kutse “esiri.”
^ Kutse “Esiri.”
^ Kutse “w’esiri.”
^ Kutse “bw’esiri.”
^ Kinywa kwa kinywa, “omundu wenyu w’emwisi.”
^ Kutse “obukuhi”
