Ebaruha oko Abanya Efeso 4:1-32
4 Kandi, ingye nibohirwe busana n’Omukama, ngabasaba niti muyighendaye ngoko ritolere eribirikirwa eryo mwabirikirawa.
2 Biro byosi, mubye mukayikehya. Mubye bolo. Kandi, mubye mukahanda omutima. Mubye mukavumiliana omo lwanzo.
3 Muyikase eribya imune omo bughuma obukalua oko kirimu, kandi omo buholo obukaleka abandu ibabya omo bughuma.
4 Hali omubiri mughuma, ekirimu kighuma, ngoko hali amaha maghuma ogho mwabirikirawako.
5 Hali Omukama mughuma, obwikirirya bughuma, olubatiso lughuma,
6 oMungu mughuma na Tata w’abosi, oyuli endata kutsibu oko bosi, erilabira abosi n’omo bosi.
7 Aliwe, olukogho lwahabawa obuli mundu ngoko Kristo alengera obuli mundu ekihembo kya busa.
8 Kundi Amasako akabugha ati: “Omughulu ahetukira endata, mwaheka abanyewa. Mwatuha abalume mo bihembo.”
9 Neryo ekinywa “mwahetuka,” ni bugha ambuki? Ni bugha ambu mwatsuka erindaghalira omo biharo by’eyikwa. Ebiharo ebyo ky’ekihugho.
10 Oyo wandaghala yo wanerukira endata oko lubula losi, atoke eriberererya emyatsi yosi.
11 Kandi mwatuha abandi mo bakwenda, abandi mo baminyereri, abandi mo bahubiri b’engulu mbuya, abandi mo balisya n’abakangirirya,
12 busana n’eriwatikya ababuyirire babye n’emibere eyuwene, busana n’erikola omubiiri w’oMungu, busana n’erihimba omubiri wa Kristo,
13 erihika omughulu itwe bosi tukendisyabya n’obwikirirya bughuma, n’eriminya Omughala w’oMungu yo ndeke, n’erihika okw’ibya mundu oyukulire nga Kristo.
14 Neryo situsyabye ng’abana balere. Situtwalawe eyi n’eyi n’ebisunda, n’erihekwa eyi n’eyi n’obuli rihunga ry’amakangirirya, erilabira amayele w’abandu, erilabira amabehi awakatungawa omo mayele.
15 Aliwe, tubye tukabugha ekwenene n’eribya n’olwanzo. N’ekyo kikendituwatikya erikula omo myatsi yosi n’eriyighendya omo nzira eyikatsemesaya Kristo, omukulu wetu.
16 Erilabira Kristo ebitsuko byosi by’omubiri bikaluka-lukana n’eriwatikyagho erikola ndeke. Omughulu obuli kitsuko ky’omubiri kikakola ndeke, ekyo kikaleka omubiri iniakula n’eriyihimba omo lwanzo.
17 Neryo ekyo ngabugha n’eribahana embere sy’Omukama kya kino: Siritolere mukatasyayighendya ng’abandu b’ebihanda abakakwama amalengekania wabo awatawite omughaso.
18 Obwenge bwabo bulimo mwirima. Kandi bali hali n’engebe ya kera na kera ey’oMungu akendisyatuha, kundi sibasi kindu, kandi babirikalya emitima yabo.
19 Kundi sibakyasi ekibuya n’ekibi, babiribya n’emighendere y’obutakw’isoni. Ekyo kikaleka ibabeghera erikola emyatsi yosi-yosi eyiterire n’omururu.
20 Aliwe, Kristo mwatabakangirirya atya,
21 mwamabya oko kwenene imwamowa kera n’erikangiriribwa naye erikwamana n’ekwenene eyo Yesu akangiriraya.
22 Mumwakangiriribwa erileka emibere ya kera eyihambene n’emighendere yenyu ya kera, n’eyikaleka imwatsanda busana n’erikwama esyongumbu nyibi.
23 Kandi mubye mukayira amalengekania wenyu awakabasondola* mo mahya-mahya.
24 Kandi mubye n’emibere mihya-mihya eyabumbawa n’oMungu erikwamana n’erisonda riwe omo ritunganene n’omo butaleghula bw’ekwenene.
25 Neryo kundi lino mwabirileka amabehi, obuli mundu abye akabwira omulikyabo y’ekwenene, kundi muli bitsuko by’omubiri mughuma.
26 Muhitane, aliwe isimwakola erilolo. Eryuba isiryalenga imukinahitene.
27 Isimwaha Diabolo y’akanya.
28 Omwibi syasyiba. Aliwe, atumike kutsibu, akole omubiiri owuwene omo byala biwe atoke eribana ekyo angawatikyamo oyulayire oko buwatikya.
29 Ekinywa ekihondire isikyalua omo buno bwenyu. Aliwe, mubye mukabugha ebinywa ebyuwene bitoke erihimba abakowabyo, kandi abakowabyo batoke eribana mubyo mw’endundi.
30 Kandi isimwita ekirimu kibuyirire ky’oMungu ky’obulighe, ekyo oMungu akolesaya busana n’eribahirako ekiminyikalo mutoke erisyasabulwa erilabira embanulo omo kiro ky’erisabulwa.
31 Muyihighule oko bukali-kali bosi-bosi, erikapikira, erihitana, erikarama, n’ebitsumi, n’ebyosi ebikahutalaya.
32 Aliwe, mubye mukakolerana ndeke, erikwira abandi b’obulighe. Mubye mukaghanyirana omwanza, ngoko oMungu naye mwabaghanyira omwanza, erilabira Kristo.
Amaelezo awehikwa
^ Kutse “akaghala akakatabala obwenge bwenyu.” Kinywa kwa kinywa, “ekirimu ky’obwenge bwenyu.”
