Ebaruha oko Abanya Efeso 5:1-33
5 Neryo mubye n’emibere eyiri ng’ey’oMungu, kundi muli bana biwe banzwa.
2 Kandi mubye mukakangania olwanzo omo ngebe yenyu, ngoko Kristo naye mwatwanza* n’eriyiherera busana netu* atoke eribya kihembo n’obuhere, ni bugha ambu ekikumbo ekyuwene eky’oMungu akatsemera.
3 Oburaghane* bosi-bosi, eritendyera ryosi-ryosi, kutse omururu isibyanatahulawa omo kati-kati kenyu, kundi sibitolere oko bandu babuyirire.
4 Omo kati-kati kenyu, simubye n’emighendere eyikita esisoni, ebinywa bitya-bitya, emitububu, kundi eyo ni myatsi eyitatolere. Mubye mukaha oMungu y’ewasingya.
5 Kundi munasi, kandi inyw’ibene-bene munasi ndeke-ndeke ngoko omundu wosi-wosi oyukakola oburaghane,* omundu wosi-wosi oyuterire, kutse omundu wosi-wosi w’omururu, ni bugha ambu, oyukaramaya esanamu syendisyingira omo Bwami bwa Kristo n’obw’oMungu.
6 Omundu isyabateba omo binywa bitya-bitya, kundi emyatsi eyi ikaleka oMungu iniahitana oko bandu abatyowa.
7 Simubye mukakola ng’abo.
8 Kera mwabya mwirima, aliwe lino muli kyakakala kundi muli omo bughuma n’Omukama. Mubye mukayighendya ng’abana b’ekyakakala.
9 Kundi ekyakakala kikatuwatikaya erikola ebibuya, ebitunganene n’eby’ekwenene.
10 Mubye mukalebya ebyo mukakola nga byanganatsemesya Omukama kutse iyehe.
11 Kandi muleke erikola emyatsi y’omwirima, eyitawite omughaso. Aliwe, mukanganaye ngoko siyuwene.*
12 Kundi nibya kikita esisoni eryahula emyatsi eyo bakakola omo bubiso-biso.
13 Aliwe, emyatsi yosi eyikakoleribawa omo kyakakala ikalangirika, kundi ekyosi ekikalangirika ni kyakakala.
14 Busana n’ekyo, Amasako akabugha ati: “Buka, iwe ughotsere. Ulubuke, na Kristo akendikukolerya.”
15 Neryo muyiteghaye, simubye mukayighendya ng’abandu abatawite amenge, aliwe ng’abawite amenge.
16 Mubye mukakolesya ndeke endambi* yenyu, kundi ebiro bino si byuwene.
17 Busana n’ekyo, simubye ng’abandu abatawite amenge aliwe mubye mukalebya ebyo Yehova* anzire imwakola.
18 N’ekindi, simubye mukatamira edivai, eyikaleka omundu iniakola ebibi. Aliwe, mubye mukusulamo ekirimu kibuyirire.
19 Omughulu mukakanaya n’abandi, ebinywa byenyu bibyemo esyonyimbo, ebinywa by’eripipa oMungu, n’esyonyimbo sy’obunya-kirimu. Mubye mukimbira Yehova* imunemukwamana n’omuzike omo mitima yenyu.
20 Obuli kiro mubye mukasima oMungu na Tata wetu busana n’emyatsi yosi omo rina ry’Omukama wetu Yesu Kristo.
21 Obuli mundu abye akayikehya oko ghundi busana n’erisagha Kristo.
22 Abakali babye bakowa abalume babo ngoko bangowa Omukama,
23 kundi omulume y’omukulu w’omukali wiwe, ngoko Kristo y’omukulu w’endeko, oyukasabulayo kundi endeko ni mubiri wiwe.
24 Kutya ngoko endeko ikakwama obusondoli bwa Kristo, n’abakali batolere erikwama obusondoli bw’abalume babo omo myatsi yosi.
25 Inywe balume, simuleke eryanza abakali benyu. Mubye nga Kristo oyo wataleka eryanza endeko, kandi mwayiherera busana nayo.
26 Mwakola atya atoke eriyirayo mo nyibuyirire, eryeryayo omo maghetse, ni bugha ambu, Ekinywa ky’oMungu,
27 endeko yitoke eribya iyinakangabasenie embere siwe, eyiteko omutsafu, kutse omukunyo, kutse ekindi kindu ekiri ng’ebyo. Aliwe, yibye nyibuyirire n’eyiteko bulema.
28 Ritolere abalume nabo ibanza abakali babo ng’emibiri yabo. Omundu oyo wanzire omukali wiwe akabya iniayanzire.
29 Kundi sihali omundu oyo abiripona omubiri wiwe. Aliwe, akalisayagho, n’erisughagho ngoko Kristo akakolera endeko.
30 Kundi tuli bitsuko by’omubiri wa Kristo.
31 “Busana n’omwatsi oyu, omulume akendisyasigha baba na mama wiwe, naye akendisyamatana* na mukali wiwe, neryo ibo babiri bakendisyabya mubiri mughuma.”
32 Ekumbo* nyibuyirire eyi ni nyikulu. Aliwe, ngakanaya oko Kristo, n’oko ndeko.
33 Nikwa ritolere obuli mundu inianza omukali wiwe ngoko ayanzire. Omukali naye atolere iniasikya kutsibu omulume wiwe.
Amaelezo awehikwa
^ Kutse kandi, “mwabanza.”
^ Kutse alinga, “busana nenyu.”
^ Omo Kigiriki ni por·neiʹa. Ulebaye amaana w’ebinywa.
^ Ulebaye amaana w’ebinywa, “Oburaghane.”
^ Kutse “mukanganayebo ngoko sibuwene.”
^ Kinywa kwa kinywa, “Mubye mukaghula endambi.”
^ Ulebaye endomeko A5.
^ Ulebaye endomeko A5.
^ Kutse “akendisyikala, akendisyasighala na.”
^ Kutse “esiri.”
