Ebaruha oko Abanya Filipi 1:1-30
1 Ebaruha eno ikalua oko Paulo na Timoteo, abakobe ba Kristo Yesu. Tukatumirayo ababuyirire bosi abali e Filipi, abali omo bughuma na Kristo Yesu, n’abasyakulu n’abaghombe bawatikya.
2 Olukogho n’obuholo bw’oMungu Tata wetu, n’Omukama wetu Yesu Kristo bibye haghuma nenyu.
3 Obuli kiro ngasima oMungu omughulu ngabibuka.
4 Obuli ndambi ngabya ininemubasabira inywe bosi. Kandi ngakola nitya n’obutseme.
5 Ngakola nitya busana n’omubiiri ogho mukakola ow’eritulaghania engulu mbuya,* eritsuka ekiro ky’erimbere ekyo mwowayo erihika na lino.
6 Nikirirye ngoko oMungu akendisyabughirira omubiiri owuwene ogho atsukisaya omw’inywe. N’omubiiri oyo akendisyalola embere erihika ekiro Kristo Yesu akendisyasa.
7 Nisingene eribalengekaniako nitya, kundi nibanzire kutsibu omo mutima waghe, kandi munemubana endundi omo lukogho lw’oMungu haghuma naghe. Kandi mumwaniwatikya omughulu nabya omo muliki, kandi mumwaniwatikya erimira engulu mbuya n’eriminyisyayo embere sy’abakulu b’eleta.
8 OMungu anasi ngoko nanzire kutsibu eribalolako inywe bosi. Nibanzire ngoko Kristo naye abanzire.
9 Ngabya ininemusaba niti ngambe olwanzo lwenyu ilwakanyirira, kandi imwaminya ekwenene n’eryowa ndeke-ndeke ebyo oMungu anzire.
10 Ngasaba niti, ngambe imwatoka eriminya emyatsi y’omughaso munene, kusudi mubye butsira bulema n’eritenditwikalya abandi erihika oko kiro kya Kristo.
11 Kandi ngasaba niti emibiiri yosi eyuwene eyo Yesu Kristo anemukola erilabira omw’itwe yibaletere endundi, neryo abandu batoke eriha oMungu y’olukengerwa n’erimupipa.
12 Baghala betu, nanzire imwaminya ngoko ehali eyo nirimo yabirileka engulu mbuya iyalola embere.
13 Abateya bosi b’Omwami we Roma n’abandi bandu bosi babiriminya ngoko nibohirwe busana n’erikwama Kristo.
14 Lino abalikyetu bangyi abakakolera Omukama sibakisagha busana n’eribohwa ryaghe, kandi babiribya n’omuhwa munene w’erihubirya ekinywa ky’oMungu butsir’isagha.
15 Ni kwenene, abandi bakahubiraya emyatsi eyilebirye Kristo kundi bali n’eritsuro n’omwagha. Aliwe, abandi banemuhubirya n’omutima owuwene.
16 Banemuhubirya emyatsi eyilebirye Kristo busana n’olwanzo. Bakakola batya kundi banasi ngoko nasombolawa busana n’erilwira oko ngulu mbuya.
17 Aliwe, abakahubiraya busana n’eritsuro n’omwagha sibalikola batya n’omutima owuwene. Aliwe, banzire eritasyanitomekera oko maligho agho ninemulolako omo ngomo.
18 Ekyo kyabirileka ihabyaki? Ekyo kyabirileka engulu mbuya eyilebirye Kristo iyatulaghanibwa omo nzira syosi, nomo yangabya iyahubiribawa n’omutima owuwene, kutse iyehe. Ngatsema busana n’ekyo, kandi ngendisyabya ininatsemire,
19 kundi ninasi ngoko ekyo kikendisyaleka imwasabuka erilabira obuwatikya bw’ekirimu kya Yesu Kristo n’emisabe yenyu y’erihatikana.
20 Ekyo kyo nanzire kutsibu, kandi kyo niyiketere ngoko sihendisyabya ekyangaleka inahemuka. Nikirirye ngoko ngendisyatoka eribya ininemubugha butsir’isagha, nitoke eripipa Kristo lino ngoko nabya ngamupipa embere omo ngebe yaghe, kutse omo luholo lwaghe.
21 Ingye eribya inineho, niriho busana na Kristo. Aliwe, erihola lyanguwanire okw’ingye.
22 Nikwa namatendilusibwa omo mubiri ono, ingendikola omubiiri munene. Aliwe, sinasi ekyo nangasombola.
23 Ngabula nganisomboleki oko myatsi ibiri eyo, kundi nanzire erilusibwa omo mubiri ono nitoke eribya haghuma na Kristo. Oko kwenene, ekyo kyo kyuwene kutsibu.
24 Aliwe, nikine omo mubiri ono busana n’endundi yenyu.
25 Busana n’eriyiketera ekyo, ninasi ngoko ngendisyabya inine haghuma nenyu inywe bosi mutoke erilola embere, n’eribya n’obutseme omo bwikirirya.
26 Omughulu ngenditasyabya haghuma nenyu, mukenditasyayiketera Kristo Yesu yo kutsibu busana naghe.
27 Kino kisa kyo mukole: Muyighendaye* ngoko engulu mbuya eyilebirye Kristo yikabugha. Mwamakola mutya, nomo nangasa erisyababana, kutse nomo nangabya isiniri haghuma nenyu, ingendyowa emyatsi eyuwene okw’inywe n’eryowa ngoko munasikire, kandi ngoko muli omo bughuma, ngoko mukalandamirira ekindu kighuma, ngoko mukakola omo bughuma eriwatikya abandu bikiriraye engulu mbuya.
28 Isimwasagha n’ahake busana n’esyonzighu syenyu. Obutubaha bwenyu bukakanganaya ngoko bakendisyatsandibwa. Aliwe, bukakanganaya ngoko inywe mukendisyasabuka. N’ekyo kikalua oko Mungu.
29 Kundi mwabirihabwa olusunzo lw’erikirirya Kristo n’olw’eryaghalwa busana naye.
30 Munemulaba omo maligho maghumerera nagho mwalangira ngalabamo, kandi munemwowa ngoko nikinalaba mugho na lino.
Amaelezo awehikwa
^ Kutse “busana n’ekyo mwakola tutoke erilola embere.”
^ Kutse “Muyighendaye ng’abakalani.”
