Ebaruha oko Abanya Filipi 2:1-30
2 Muyikase erisubya abandi b’omutima omo Kristo, erikirania abandi omo lwanzo, eribya omo bughuma bw’Ekikristo, eryanza abandi n’eribakwira obulighe.
2 Mwamakola mutya, imukendinitsemesya kutsibu. Mubye n’amalengekania maghuma, mwanzane, mukole omo bughuma, n’erilengekania kighuma.
3 Simukole omwatsi wosi-wosi busana n’omwagha kutse busana n’eriyilabirirya. Aliwe, muyikehaye n’erilangira ngoko abandi babalengire.
4 Isimwarondaya endundi yenyu inywe basa, aliwe murondaye n’endundi y’abandi.
5 Biro byosi mubye n’amalengekania ano agho Kristo abya nagho:
6 Nomo anabya ng’oMungu, mwatalengekania eripura omwanya w’oMungu, ni bugha ambu ati alingirirane n’oMungu.
7 Mwatakola atya. Aliwe, mwasigha obuli kindu. Kandi mwaligha eribya mughombe, n’eribya mundu.
8 Kandi omughulu asa ng’omundu, mwayikehya. Kandi mwabya mutaleghula erihika oko luholo, inga, oluholo oko muti w’amaghali.*
9 Busana n’ekyo, oMungu mwamuyiramo mukulu kutsibu kulenga abandi bosi, n’erimuha erina eriri endata kulenga awandi mena.
10 OMungu mwakola atya kusudi obuli mundu asikaye erina rya Yesu, ni bugha ambu, abali elubula, abali oko kihugho, n’abali emwisi sy’ekitaka.
11 Obuli mundu atolere iniakangania embere sy’abandu ngoko Yesu Kristo ni Mukama busana n’eriha oMungu y’olukengerwa.
12 Neryo banzwa baghe, biro byosi mukowa. Mukowa omughulu niri haghuma nenyu, kandi nibya mukowa kwilaba aho omughulu nite haghuma nenyu. Neryo ngabasaba, kisi muyikase kutsibu mutoke erisabuka. Mukole mutya omo buba n’erititimana.
13 OMungu yukabaha akaghala mutoke erimutsemesya ndeke-ndeke, kandi yukabahira m’omuhwa, n’eribaha obutoki bw’erikola mutya.
14 Mukole emyatsi yosi butsir’iyilungumula, kandi butsira buhaka.
15 Mukole mutya mutoke eribya bana b’oMungu abate n’ekosa n’abateko olubanza. Omwibya butsira kosa, mukoleraye ng’ekyakakala kinene nomo mune omo kati-kati k’abandu ababiritsanda, n’abakakola amalolo.
16 Mumakirire ekinywa ky’engebe. Neryo ekyo kikendisyaleka inatsema omo kiro ky’Omukama kundi ininasi ngoko ebyo nayikasa erikola si bya busa.
17 Aliwe, nomo ninemutulwa ng’ekihembo ky’obwabu, ninemusangira oko buhere obo munemuherera, n’oko mubiiri ogho munemukolera oMungu butaleghula. Niri n’obutseme kandi ngatsema haghuma n’inywe bosi.
18 Nenyu ngabasaba eritsema haghuma naghe.
19 Nikirirye ngoko Omukama Yesu amanza, ngendituma Timoteo ewenyu hatya-hatya nitoke erisubibwa mutima omughulu akendinibwira nga muli muti.
20 Siniwite oghundi mundu oyuli nga ye kandi oyutsomene emyatsi yenyu.
21 Abandi bosi batsomene emyatsi yabo misa, sibatsomene emyatsi ya Yesu Kristo.
22 Aliwe, munasi ngoko abirikangania ko ni w’eriyiketera. Kandi ngoko omwana akakola na baba wiwe, naghe mwakola kutsibu haghuma naye eriwatikya abandu bangyi eriminya engulu mbuya.
23 Oyo musa yo nanganatuma. Ngendimutuma nabilangira emyatsi yaghe nga yamaghenda yiti.
24 Aliwe, nikirirye ngoko Omukama amanza naghe ingendyasa luba.
25 Lino nanzire inabatumira Epafrodito omughala wetu oyo tukakolera naye Omukama. Kandi ni musuda wa Kristo nga twe. Mwabya mukamutuma okw’ingye atoke eriniwatikya.
26 Lino, anzire eribalolako inywe bosi. Akahanga-hangaya omo mutima kundi mumwowa ngoko alwere.
27 Oko kwenene, mwatoha kandi abya iniakisigha iniahola. Aliwe, oMungu mwamukwira obulighe naghe kutya kusudi isinabya omo bulighe bunene.
28 Ngendimutuma luba kyamatokekana, neryo mukendibya mwamulangira imwabya n’obutseme, n’ekyo kikendileka initasyahangya-hangya busana nenyu.
29 Mumukokaye n’obutseme ngoko mubeghere erikokya abandi bigha b’Omukama. Kandi mubye mukasikya abandu abali nga ye.
30 Abya iniakisiya iniahola busana n’erikolera Omukama. Mwahira engebe* yiwe omo hatari busana naghe kundi mwabya isimuli hano mutoke eriniwatikya.
