Ebaruha oko Abanya Filipi 3:1-21
3 Oko nduli, baghala betu, mubye mukatsema kundi mukakwama Omukama. Eribahandikira emyatsi mighumerera sikiriniluhaya, kundi ikendibawatikya.
2 Muyiteghaye oko bandu abali ng’esyombwa. Muyiteghaye oko abakakola emyatsi eyikahutalaya misa-misa. Muyiteghaye oko bakahutalaya emibiri.
3 Kundi tubanibwe omo nzira y’ekwenene, kusangwa tukakolera oMungu, tukakwama obusondoli bw’ekirimu kiwe, kandi kundi situliyiketera eby’omubiri. Aliwe, tukayiketera Kristo Yesu.
4 Aliwe omo kati-kati k’abandu bosi, n’ingye niwite ebyangaleka omundu iniayihalamba busana n’omubiri.
Omundu amalengekania ati anawite ekyangaleka inyayiketera eby’omubiri, ingye niwite kubyo kumulenga:
5 Nabanibawa omo kiro ky’omunani. Niri Mwisraeli w’omo kihanda kya Benyamini. Niri Muebrania, oyo wabutawa n’Abaebrania. Nabya Mufarisayo, kandi nabya ngakwama kutsibu Emighambo.
6 Kundi nabya n’omuhwa, nabya ingaghalaya endeko. Nabya ngakangania ngoko siniwite ekosa omw’ikola emyatsi ngoko Emighambo yibughire.
7 Aliwe, emyatsi eyo nabya ngalangiramo y’omughaso okw’ingye lino ngalangirayo mo bule busana na Kristo.
8 Oko kwenene, ngalangira emyatsi yosi mo bule omughulu ngalinganisayayo n’emyatsi y’obughuli bunene eyo nabiriminya oko Kristo Yesu Omukama waghe. Busana naye, nabiriligha eriherya obuli kindu kandi ngalangira emyatsi yosi mo kyabu nitoke eribya mwira wa Kristo,
9 kandi nitoke eribya mundu wiwe. Sinitunganene busana n’erikwama emyatsi y’Emighambo. Aliwe, busana n’erikirirya Kristo, oMungu yukanighanzamo mutunganene busana n’eriminya Kristo.
10 Nanzire inaminya Kristo n’eriminya obutoki bw’erilubuka riwe, kandi nanzire eryaghalwa nga ye. Nanzire nibya inahola oluholo oluli ng’olwiwe
11 kusudi nitoke erisyalubuka okw’ilubuka ry’erimbere.
12 Sinirinabana ekihembo ekyo, kandi sinirinayirwamo mundu oyuhikene. Aliwe, ninemuyikasa erikola emyatsi eyaleka Kristo Yesu inianisombola.
13 Baghala betu, sinirilengekanaya niti nabiribana ekihembo. Aliwe, omwatsi mughuma ogho nasi wono: Ngibirirawa emyatsi ya kera n’erihira ameso oko biri embere.
14 Ninemuyikasa kutsibu nitoke erisyabana ekihembo. Ekihembo ekyo y’engebe y’elubula, eyo Mungu akatubirikirira erilabira Kristo Yesu.
15 Abosi abakulire bunya-kirimu batolere ibabya n’amalengekania ayo. Omundu omo kati-kati kenyu amabibya n’awandi malengekania, oMungu iniakendibakangania amalengekania awuwene.
16 Nomo twangabya itwabirilola embere omo lulengo lwahi, situlekere aho.
17 Baghala betu, inywe bosi muyikase eribya n’emibere eyiri ng’eyaghe. Kandi mulebaye abanemukwama emibere yetu.
18 Hali abandu banene abakayiyiramo syonzighu sya Kristo n’esyomuti wiwe w’amaghali.* Kangyi-kangyi nibeghere eryahulabo. Aliwe, lino ninemwahulabo inenemulira.
19 Bakaya okw’itsandibwa, omungu wabo sy’esyongumbu syabo.* Bakayihalamba busana n’emyatsi y’esisoni eyo bakakola. Bakalengekanaya oko myatsi y’ekihugho misa.
20 Aliwe itwe, ewetu y’elubula, kandi tukalindirira kutsibu omulamya oyukendisyalua elubula, ni bugha ambu Omukama Yesu Kristo.
21 Omubiri mutya-mutya ono akendisyabindulagho mo mubiri w’olukengerwa ng’owiwe. Akendisyakola ekyo omo kaghala kiwe kanene, akaghala akakamutokesaya eritabala ebindu byosi.
