Ebaruha oko Abanya Filipi 4:1-23
4 Baghala betu abo nanzire, kandi abo nanzire kutsibu erilolako, inywe mukaleka inatsema, kandi inywe mbita yaghe. Banzwa baghe, ngabalemba-lemba niti mubye bataleghula oko Mukama.
2 Ngasaba ye Evodi na Sentike niti bahulikirirane, kundi bakakwama Omukama.
3 Naghu mulikyetu mutaleghula omo mubiiri w’Omukama, ngakusaba niti sighuleke eriwatikya abakali abo. Babirikola kutsibu haghuma naghe eritulaghania engulu mbuya. Oko kwenene, abakali abo na Klema n’abandi abo amena wabo ali omo kitabu ky’engebe.
4 Mutseme mughulu wosi omo Mukama, ngatasyasubamo niti, mutseme!
5 Abandu bosi balangire ngoko simulimakirira amalengekania wenyu.* Omukama ali hakuhi.
6 Simuhanga-hangaye busana n’omwatsi wosi-wosi. Aliwe, mubye mukasaba oMungu. Mubye mukamuhatikana atoke eribasondola omo myatsi yosi, kandi mubye mukamuha ewasingya.
7 Mwamakola mutya, obuholo bw’oMungu obulengire ebyosi ebyo abandu bangalengekania, ibukenditeya emitima yenyu n’obwenge bwenyu, kundi mukakwama Kristo Yesu.
8 Oko nduli, mubye mukahira amalengekania wenyu oko myatsi y’ekwenene, eyitolere, eyitunganene, eyerire, eyitolere eryanzwa, eyikabughawako ndeke, eyuwene, n’eyitolere eripipwa.
9 Mukwame ndeke-ndeke emyatsi eyo mwowa n’eriligha okw’ingye, n’eyo mwalangira okw’ingye. Mwamabikola mutya, oMungu w’obuholo iniakendibya haghuma nenyu.
10 Ngatsema kutsibu n’erisima Omukama kundi mwabiritasyanitsomana. Mwabya imunanitsomene, aliwe mumwatasunga akanya k’erikangania ngoko munitsomene.
11 Siniribugha nitya kundi nilaghire oko buwatikya. Nabirigha eritsemera ebyo niweteko omo hali yosi.
12 Ninasi eribyaho n’ebindu bike, n’eribyaho n’ebindu binene. Omo buli hali, nabiriminya ekumbo* y’eritsemera ebindu ebyo niwiteko: erikwa enzala, eribya n’ebindu binene, n’eribulirwa.
13 OMungu yukamba akaghala omo myatsi yosi.
14 Aliwe, mumwakola ndeke eriniwatikya omo maligho waghe.
15 Oko kwenene, inywe Banya Filipi munasi ngoko omughulu nalua e Makedonia mwabyowa engulu mbuya engendo y’erimbere, endeko yenyu nyisa yo yaniwatikaya.
16 Omughulu nabya e Tesalonika, mumwanitumira ebindu ebyo nabya nilaghireko. Mumutakola mutya kaghuma kasa, aliwe mumwakola mutya kabiri.
17 Si bugha ambu ngasondaya ebihembo, aliwe nanzire imwabana emiyisa eyo omundu akabana busana n’erihitya.
18 Ninawite ebindu byosi ebyo nilaghireko, kandi binene. Sinilaghire oko kindu kundi Epafrodito abirinitumira ebyo mulyanitumira. Ebihembo byenyu biri ng’ekikumbo ekyuwene, ng’obuhere obukatsemesaya oMungu.
19 Busana n’ekyo, oMungu waghe oyuwite ebindu binene ebyuwene, akendibaha omo lulengo lunene ebyosi ebyo mulaghireko erilabira Kristo Yesu.
20 OMungu na Tata wetu ahabawe olukengerwa kera na kera. Amina.
21 Muramukaye ababuyirire bosi b’oMungu abali omo bughuma na Kristo Yesu. Abaghala betu abali haghuma naghe bamabaramukya.
22 Ababuyirire bosi, kutsibu-tsibu abakakolera* Kaisari, bamabaramukya.
23 Olukogho lw’Omukama Yesu Kristo lubye haghuma n’omutima owuwene ogho muli nagho.
Amaelezo awehikwa
^ Kutse “simulilabayaho kateho, simuli n’erighundu, simulighemera oko luhande lughuma, muli b’olulengo.”
^ Kutse “esiri.”
^ Kinywa kwa kinywa, “ab’omo nyumba ya.”
