Ebaruha oko Abanya Galatia 2:1-21
2 Neryo habere habihwa emyaka 14, kandi munaya na Barnaba e Yerusalema. Tito naye mwaghenda naghe.
2 Munayayo kundi munabisulirwa ngoko ritolere inayayo. Neryo munakanirya abaghala betu b’emyatsi eyilebirye engulu mbuya eyo ninemuhubirya omo kati-kati k’ebihanda. Munabakanirya ahate abandi bandu. Aliwe, munakanirya abaghala betu abasikibwe kutsibu. Munakola nitya kundi nabya nanzire eriminya omubiiri ogho ngakolera oMungu ng’anuwene kutse iyehe. Bite bitya, ebyo nakola byangabere bule.
3 Nibya ye Tito, oyo twabya naye, mwatasabwa eribanibwa, nomo anabya Mugiriki.
4 Aliwe, omwatsi w’eribanibwa mwahuluka busana n’abaghala betu b’amabehi abayimbomberaya omw’itwe, abingira omw’itwe ng’abapelelezi bakasonda eritsandya obwiranda obo tuli nabo kundi tuli omo bughuma na Kristo Yesu, batoke erituyiramo bakobe.
5 Mututahulikirirabo n’ekiro n’ekighuma,* kusudi ekwenene y’engulu mbuya ilole embere omo kati-kati kenyu.
6 Abandu ababya bakalangirikamo b’omughaso, ingye sinabya ngabalangira nitya, kundi oMungu syalitswera omundu erikwamana n’ebikalangirika. Abandu abo ababya basikibwe kutsibu mubatanibwira omwatsi muhya-muhya.
7 Aliwe, babere babilangira ngoko nabirihabwa omubiiri w’erihubirya engulu mbuya oko batabanibwe, ngoko Petro naye ahabawa omubiiri w’erihubirya ababanibwe,
8 kundi oyo waha Petro y’obutoki bw’eribya mukwenda w’ababanibwe, naghe yo wamba obutoki bw’eribya mukwenda w’abandu b’ebihanda,
9 kandi omughulu balangira ngoko nabirikanganibwa olukogho, Yakobo, Kefa,* na Yohana ababya bakalangirika mo syonduyi, mubamba ingye na Barnaba ebyala by’amali, erikangania ngoko tuli omo bughuma nabo. Mubakola batya kusudi itwe tuyahubiraye abandu b’ebihanda, nabo bayahubiraye ababanibwe.
10 Ekyo batusaba kisa kya kino: Mubabugha bati tubye tukibuka abera. N’ekyo kyo nabiriyikasa erikola.
11 Aliwe, omughulu Kefa* ahika e Antiokia, munamukunga embere sy’abandu. Kundi kyabya kilangirikire ngoko mwatitakola ekyuwene.
12 Embere abandu balebe abalua ewa Yakobo bahike, abya abeghere erirya n’abandu b’ebihanda. Aliwe babere babihika, mwaleka erikola atya kandi mwayihighula okw’ibo kusangwa abya akasagha abandu ababanibwe.
13 N’abandi Bayahudi mubakola obulimba-limba* nga ye. Nibya na Barnaba mwakwamabo omo bulimba-limba* bwabo.
14 Aliwe, nabere nabilangira ngoko sibalikwama ekwenene y’engulu mbuya, munabwira Kefa* embere sy’abandu bosi niti: “Iwe Muyahudi, wamabya ukakola ng’abandu b’ebihanda butsira ng’Abayahudi, busanaki ukakasa abandu b’ebihanda erikwama emibere y’Abayahudi?”
15 Twabutawamo Bayahudi, situli ng’abandu b’ebihanda abakakola amalolo.
16 Tunasi ngoko omundu syalighanzawamo mutunganene busana n’erikwama emighambo, aliwe akaghanzawamo mutunganene busana n’erikirirya Yesu Kristo risa. Neryo twabirikirirya Kristo Yesu tutoke erighanzwamo batunganene busana n’erikirirya Kristo, butsira busana n’erikwama emighambo. Kundi sihali omundu n’omughuma oyukendisyaghanzwamo mutunganene busana n’erikwama emighambo.
17 Neryo netu twamabya itwaghanzawamo bakoli b’amalolo omughulu twabya tukasonda erighanzwamo batunganene erilabira Kristo, ekyo ni bugha ambu Kristo ni mughombe w’abakakola amalolo? Kobite bitya!
18 Namabya ininemutasyahimba emyatsi eyo nahimbula, aho ingakanganaya ngoko niri mukoserya.
19 Kundi munahola busana n’erikwama emighambo, nitoke eribyaho busana n’erikolera oMungu.
20 Nabirikongomererwa oko muti haghuma na Kristo. S’ingye niriho, aliwe Kristo yuliho omo bughuma naghe. Oko kwenene, ngoko niriho lino omo mubiri, niriho busana n’erikirirya Omughala w’oMungu, oyo wanianza n’eriyiherera busana naghe.
21 Sinirighana olukogho lw’oMungu. Kundi omundu amabya iniakaghanzawamo mutunganene busana n’erikwama emighambo, ni bugha ambu Kristo mwahola bule.
Amaelezo awehikwa
^ Kinywa kwa kinywa, “omo saha nguma.”
^ Kandi akahulawamo Petro.
^ Kandi akahulawamo Petro.
^ Kutse “obunafiki.”
^ Kutse “obunafiki.”
^ Kandi akahulawamo Petro.
